(સંવાદદાતા દ્વારા) સુરેન્દ્રનગર, તા.૧૪
સાયલાના સામૂહિક આરોગ્ય કેન્દ્રમાં ફરજ બજાવતી નર્સ પર વાટાવછના ઈકો ચાલકે બળાત્કારનો પ્રયાસ કરતા તાબે ન થતાં નર્સના માથામાં બોથડ પદાર્થ મારી હત્યા કર્યાનું પોલીસમાં નોંધાતાં સનસનાટી મચી ગઈ છે. પોલીસે ઈકો ચાલક કાઠી શખ્સ સામે ગુનો નોંધી શોધખોળ હાથ ધરી છે. આ અંગેની પોલીસમાંથી પ્રાપ્ત વિગત મુજબ સાયલા તાલુકાના ઉમાપુર ગામના વતની અને સાયલા સામૂહિક આરોગ્ય કેન્દ્રમાં નર્સ તરીકે ફરજ બજાવતાં દિપ્તીબેન રાયધનભાઈ વજકાણી નામની ર૮ વર્ષની કોળી પરિણીતા વડિયા ગામના તળાવ પાસે ગંભીર રીતે ઘવાયેલી હાલતમાં કુટુંબીને મળેલી. તેણીના પતિ રાયધનભાઈ કોળીને ઘટનાસ્થળે બોલાવ્યા બાદ સારવાર માટે સુરેન્દ્રનગર અને ત્યાંથી વધુ સારવાર માટે અમદાવાદ ખસેડવામાં આવે તે પહેલાં સાણંદ નજીક પહોંચ્યા ત્યારે દિપ્તીબેનનું મોત નિપજ્યું હતું. ગંભીર રીતે ઘવાયેલી હાલતમાં દિપ્તીબેન કોળી દિવાળીની રજામાં ઉમાપુર ગામે પોતાના વતન આવ્યા હતા અને ગઈકાલે સવારે સાયલા ફરજ પર હાજર થવા માટે જવા ઉમાપુરથી શાંતુભાઈ બાવકુભાઈ ખાચરની ઈકો કારમાં બેઠા હતા. ઈકો કારમાં દિપ્તીબેન કોળી એકલા જ બેઠા હોવાથી વડિયા ગામ નજીક પહોંચ્યા ત્યારે કારચાલક શાંતુભાઈ ખાચરે દિપ્તીબેન પર નિર્લજ્જ હુમલો કરતા તેને તાબે ન થતાં શાંતુભાઈ ખાચરે માથામાં બોથડ પદાર્થ મારી તળાવ નજીક ફેંકી ભાગી ગયાનું દિપ્તીબેન કોળીએ પોતાના પતિ રાયધનભાઈને જણાવ્યું હતું. દિપ્તીબેન કોળીને અમદાવાદ હોસ્પિટલ પહોંચે તે પહેલાં સાણંદ નજીક મૃત્યુ નિપજતાં લાશને પોસ્ટમોર્ટમ માટે રાજકોટ મેડિકલ કોલેજમાં ખસેડી હતી. સાયલા પીએસઆઈ રાણા સહિતના સ્ટાફે રાયધનભાઈ ભનાભાઈ કોળીની ફરિયાદ પરથી ઈકો ચાલક શાંતુભાઈ બાવકુભાઈ ખાચર સામે હત્યાનો ગુનો નોંધી શોધખોળ હાથ ધરી છે.
