મુંબઈના ‘ઈનઓર્બિટ મોલ’માં હિન્દુત્વવાદી જૂથોના દબાણને કારણે નમાઝ ખંડ બંધ કરાયો
(એજન્સી) તા.૨
મુંબઈના મલાડમાં આવેલા ‘ઈનઓર્બિટ મોલ’માં નમાઝ માટે ફાળવવામાં આવેલી જગ્યાને, હિન્દુત્વવાદી જૂથોના વિરોધ બાદ બંધ કરી દેવામાં આવી અને તોડી પાડવામાં આવી. આ વિવાદ ત્યારે શરૂ થયો જ્યારે એક વાયરલ વીડિયોમાં હિજાબ પહેરેલી બે સગીર બાળાઓ નમાઝ ખંડ બતાવતી જોવા મળી. તેમણે જણાવ્યું કે આ જગ્યા સુસજ્જ છે, જેમાં પુરુષો અને સ્ત્રીઓ માટે અલગ વિભાગો તેમજ ‘વુઝુ ખાના’ (નમાઝ પહેલાં હાથ-પગ ધોવાની જગ્યા)ની સુવિધા છે. તેમણે મુલાકાતીઓને નમાઝ અદા કરવાનું ચૂકવા નહીં તેવી સલાહ પણ આપી હતી. જમણેરી વિચારધારા ધરાવતા જૂથો અને વ્યક્તિઓએ આ વીડિયોની ટીકા કરી. તેમણે દાવો કર્યો કે આ ઘટના ‘ધર્મનિરપેક્ષતા’ના નામે મુંબઈને એક પ્રકારના “ઈસ્લામિક એન્ક્લેવ” (ઈસ્લામિક વિસ્તાર) અથવા “પાકિસ્તાન”માં ફેરવવાનો પ્રયાસ છે. ૩૦ ઓક્ટોબરે, ‘સકલ હિન્દુ સમાજ’ નામના હિન્દુત્વવાદી સંગઠને સોશિયલ મીડિયા પ્લેટફોર્મ ‘ઠ’ પર આ વીડિયો શેર કર્યો અને સવાલ ઉઠાવ્યો કે શું મુંબઈ “પાકિસ્તાન બનવાના માર્ગે” આગળ વધી રહ્યું છે ? આ જૂથે નોંધ્યું કે, છત્રપતિ શિવાજી મહારાજ સાથે જોડાયેલી ભૂમિ પર સ્થિત આ મોલમાં તમામ ધર્મના લોકો આવે છે, તો પછી શું હિન્દુઓ ત્યાં પોતાની પૂજા-અર્ચના કરી શકે ખરા ? તેમણે સ્થળ પર વિરોધ પ્રદર્શન કર્યું અને આ નમાઝ ખંડને હટાવવાની માંગ કરી. બીજા દિવસે, ૩૧ ઓક્ટોબરે, ‘સકલ હિન્દુ સમાજ’ દ્વારા વધુ એક વીડિયો પોસ્ટ કરવામાં આવ્યો, જેમાં તે જગ્યા તોડી પાડવામાં આવેલી હાલતમાં જોવા મળી રહી હતી અને ત્યાંની ટાઈલ્સ પણ તૂટેલી હતી. જોકે ભારતીય મોલ્સમાં નમાઝ માટે અલગ ખંડ હોવો સામાન્ય બાબત નથી, તેમ છતાં ઘણા શોપિંગ સેન્ટરોમાં વિવિધ ધર્મોના લોકો માટે પ્રાર્થના કરવાની સુવિધા હોય છે, જેથી કોઈ પણ સમુદાયને બાકાત રાખ્યા વિના મુલાકાતીઓ પોતાની પ્રાર્થના કરી શકે.