(એજન્સી) જેરૂસલેમ, તા.૨૬
બુધવારના રોજ એક સ્થાનિક મીડિયા સંસ્થાએ અહેવાલ આપ્યો હતો કે, ઇઝરાયેલની રાષ્ટ્રીય સુરક્ષા પરિષદે વડાપ્રધાન બેન્જામિન નેતાન્યાહુ, સંરક્ષણ મંત્રી યોવ ગેલન્ટ અને આર્મી ચીફ ઓફ સ્ટાફ હરઝી હલેવી માટે આંતરરાષ્ટ્રીય ધરપકડ વોરંટ જારી કરવાની સંભાવના પર ગુપ્ત ચર્ચા કરી હતી. ઇઝરાયેલી ચેનલ ૧૩એ અહેવાલ આપ્યો છે કે, આ ચર્ચા ઇઝરાયેલમાં વરિષ્ઠ અધિકારીઓ સામે આગામી દિવસોમાં આંતરરાષ્ટ્રીય ધરપકડ વોરંટ જારી થવાની સંભાવનાને ધ્યાનમાં રાખીને થઈ હતી. ઈઝરાયેલમાં વરિષ્ઠ અધિકારીઓને મળેલી માહિતી અને સંકેતો અનુસાર, હેગમાં ઈન્ટરનેશનલ ક્રિમિનલ કોર્ટ નેતાન્યાહુ, ગેલન્ટ અને હલેવી માટે ધરપકડ વોરંટ જારી કરે તેવી સંભાવના છે. તેમાં કહેવામાં આવ્યું છે કે, ચર્ચાના ભાગરૂપે આ સંભવિત પગલાંના જવાબમાં ઇઝરાયેલને લેવા માટે ઘણા તાત્કાલિક પગલાંને મંજૂરી આપવામાં આવી હતી જેમાં તેની સામે આંતરરાષ્ટ્રીય સ્તરે રાજકીય ઝુંબેશ શરૂ કરવી સામેલ છે. ચેનલે ખુલાસો કર્યો કે, સંભવિત પગલાંને અવરોધવાના પ્રયત્નોના ભાગરૂપે નેતાન્યાહુ નેધરલેન્ડ, ચેક રિપબ્લિક અને ઓસ્ટ્રિયાના તેમના સમકક્ષો સાથે બુધવારના દિવસે પછીથી વાતચીત કરશે. ચેનલે અનામી વરિષ્ઠ ઇઝરાયેલી અધિકારીઓને ટાંકીને કહ્યું કે, જો આ પગલું લેવામાં આવશે તો તે ફેબ્રુઆરી ૨૦૨૨થી યુક્રેન સામે ચાલી રહેલા યુદ્ધના પગલે રશિયા અને તેના રાષ્ટ્રપતિ વ્લાદિમીર પુતિન વિરુદ્ધ લેવામાં આવેલા પગલાંની યાદ અપાવશે. અધિકારીઓએ ઉમેર્યું હતું કે, ઇન્ટરનેશનલ ક્રિમિનલ કોર્ટ ધરપકડ વોરંટમાં નીચા ક્રમના સૈનિકોને બદલે નીતિ નિર્માતાઓ પર ધ્યાન કેન્દ્રિત કરે તેવી અપેક્ષા છે. ખાનગી પ્રસારણકર્તા અનુસાર આ સંદર્ભમાં ઇઝરાયેલની રાજકીય-સુરક્ષા કેબિનેટ ગુરૂવારના રોજ એક બેઠક યોજવાની છે જેમાં સંભવિત ધરપકડ વોરંટના મુદ્દાને સંબોધવાની અપેક્ષા છે. ગયા શુક્રવારના રોજ ઇઝરાયેલી ખાનગી ચેનલ ૧૨એ અહેવાલ આપ્યો હતો કે, આંતરરાષ્ટ્રીય ફોજદારી અદાલત ગાઝા પટ્ટીમાં પેલેસ્ટીનીઓ સામે યુદ્ધ અપરાધો કરવા બદલ નેતાન્યાહુ અને અન્ય વરિષ્ઠ અધિકારીઓ સામે નજીકના ભવિષ્યમાં આંતરરાષ્ટ્રીય ધરપકડ વોરંટ જારી કરવા વિચારી રહી છે. તે સમયે ચેનલે જણાવ્યું હતું કે, નેતાન્યાહુ તાકીદે વ્યૂહાત્મક બાબતોના મંત્રી ડર્મર, ન્યાય મંત્રી યારીવ લેવિન અને વિદેશી બાબતોના મંત્રી ઇઝરાયેલ કાત્ઝ સાથે આ બાબતે ચર્ચા કરવા અને પશ્ચિમી સહયોગીઓને મદદ માટે અપીલ કરવા માટે તાકીદે મળ્યા હતા.