પીડિતની મદદ માટે આગળ આવેલા રિંકુ યાદવ પર પણ ટોળાએ હુમલો કર્યો

(એજન્સી) નવી દિલ્હી, તા.૨૮
સોશિયલ મીડિયા પર વાયરલ થયેલા વીડિયો અનુસાર, ઉત્તરપ્રદેશના બરેલીમાં કેટલાક યુવાનોએ એક વૃદ્ધ મુસ્લિમ વ્યક્તિને તેમની દાઢી અને ટોપી જોઈને નિશાન બનાવ્યા અને તેમના પર હુમલો કર્યો. આરોપ છે કે હુમલાખોરોએ તેમને ‘જય શ્રી રામ’ બોલવા માટે મજબૂર કર્યા. ઓનલાઇન શેર કરાયેલા વીડિયો મુજબ, ચાર યુવાનોએ આ વૃદ્ધ વ્યક્તિને રોક્યા અને તેમની ધાર્મિક ઓળખને કારણે તેમને નિશાન બનાવ્યા. ટોળાએ તેમની સાથે ગાળાગાળી કરી, તેમને માર માર્યો અને ‘જય શ્રી રામ’નો નારો લગાવવા માટે દબાણ કર્યું. જ્યારે તેમણે તેમ કરવાનો ઇન્કાર કર્યો, ત્યારે હુમલાખોરોએ વધુ હિંસા આચરી. રિંકુ યાદવ નામના એક વ્યક્તિએ વચ્ચે પડીને બચાવવાનો પ્રયાસ કર્યો હતો. એક વીડિયોમાં રિંકુ તે યુવાનો તરફ ઈશારો કરતા અને એમ કહેતા સંભળાય છે કે, “આ લોકો આ કાકાને મારી રહ્યા છે અને તેમને ‘જય શ્રી રામ’ બોલવા માટે મજબૂર કરી રહ્યા છે.” રિંકુ યાદવે જણાવ્યું છે કે જ્યારે તેમણે વૃદ્ધ વ્યક્તિને મદદ કરવાનો પ્રયાસ કર્યો, ત્યારે તેમને પણ માર મારવામાં આવ્યો હતો. આ ઘટના પોલીસ ચોકીથી થોડા જ અંતરે બની હોવાનું કહેવાય છે. સોશિયલ મીડિયા પર આપવામાં આવેલા જવાબમાં બરેલી પોલીસે જણાવ્યું કે પીડિતની તબીબી તપાસ (મેડિકલ એક્ઝામિનેશન) કરવામાં આવી છે અને કોતવાલી પોલીસ સ્ટેશનના સબ-ઇન્સ્પેક્ટરને આ મામલે તપાસ કરીને જરૂરી કાર્યવાહી કરવા સૂચના આપવામાં આવી છે. પોલીસે જણાવ્યું, “બરેલીના કોતવાલી પોલીસ સ્ટેશન દ્વારા પીડિતની તબીબી તપાસ કરવામાં આવી છે, જેમાં સામાન્ય ઈજાઓ જણાઈ છે. કોતવાલી, બરેલીના સબ-ઇન્સ્પેક્ટરને આ કેસની તપાસ કરવા અને જરૂરી કાર્યવાહી કરવા નિર્દેશ આપવામાં આવ્યો છે.” પોલીસના નિવેદનમાં ધરપકડ કે આરોપીઓની ઓળખ અંગે કોઈ વધારાની વિગતો આપવામાં આવી નથી. આ ઘટના પર સોશિયલ મીડિયા પર તીવ્ર પ્રતિક્રિયાઓ જોવા મળી છે. યુઝર્સે આ હુમલાની નિંદા કરી છે અને જવાબદારો સામે કડક કાર્યવાહી કરવાની માંગ કરી છે. ‘ઠ’ (ટિ્‌વટર) પર એક યુઝરે લખ્યું, “ચૂંટણી નજીક આવી રહી છે, સાંપ્રદાયિક વાતાવરણ ઊભું કરવા માટે આવી વધુ ઘટનાઓ માટે તૈયાર રહો.” અન્ય એક યુઝરે લખ્યું, “આ ક્યાં સુધી ચાલશે ? હું પોલીસને વિનંતી કરું છું કે તેઓ તપાસ કરે અને જવાબદારો સામે કડક પગલાં લે.” આ આક્ષેપોએ ભૂતકાળના એવા કિસ્સાઓની યાદ તાજી કરી દીધી છે જેમાં મુસ્લિમો પર હુમલો કરવામાં આવ્યો હતો અને તેમને હિન્દુ ધાર્મિક સૂત્રો બોલવા માટે મજબૂર કરવામાં આવ્યા હતા. ૨૦૧૯માં, ઝારખંડમાં તબરેઝ અન્સારી પર એક ટોળાએ હુમલો કર્યો હતો અને તેને “જય શ્રી રામ” તથા “જય હનુમાન”ના નારા લગાવવા માટે મજબૂર કર્યો હતો. હુમલાના થોડા દિવસો બાદ તેનું મૃત્યુ થયું હતું; આ ઘટનાને કારણે સમગ્ર દેશમાં ભારે રોષ ફેલાઈ ગયો હતો.