(એજ્નસી) બુલંદશહેર, તા.૧૪
ઉત્તર પ્રદેશના બુલંદશહેરમાં આવેલી વિશેષ SC/ST અદાલતે એક વ્યક્તિને આજીવન કેદની સજા ફટકારી છે. આ વ્યક્તિ પર ૨૦૧૯માં એક લગ્ન સમારંભ દરમિયાન ૫૦ની વયની આસપાસની બે દલિત મહિલાઓ પર જાણીજોઈને કાર ચઢાવીને તેમની હત્યા કરવાનો આરોપ હતો. અદાલતે દોષિત પર ૫૧,૦૦૦ રૂપિયાનો દંડ પણ ફટકાર્યો છે. સરકારી પક્ષ (પ્રોસિક્યુશન) અનુસાર, આ ઘટના ૨૫ જૂનના રોજ બની હતી જ્યારે લગ્ન સમારંભ ચાલી રહ્યો હતો અને કન્યાના સંબંધીઓ રસ્તાની બાજુમાં ઊભા હતા. આરોપી નકુલ ઠાકુર તેના સહ-આરોપી ઓમેન્દ્ર ઉર્ફે ઓગા સાથે કારમાં ત્યાં પહોંચ્યો હતો. ઠાકુરે પહેલાં એક દલિત યુવતીનું અપહરણ કરવાનો પ્રયાસ કર્યો અને જ્યારે યુવતીએ તેનો વિરોધ કર્યો ત્યારે તેણે અપશબ્દો અને જાતિસૂચક ટિપ્પણીઓ કરી. જ્યારે યુવતીના સંબંધીઓએ વાંધો ઉઠાવ્યો ત્યારે આરોપીએ તેમને પણ ધમકી આપી હતી. ત્યારબાદ તે ત્યાંથી જતો રહ્યો હતો, પરંતુ થોડીવારમાં જ તે ખૂબ જ ઝડપે વાહન લઈને પાછો ફર્યો. તેમણે બહાર રાહ જોઈ રહેલા જાનૈયાઓ પર કાર ચઢાવી દીધી, જેના પરિણામે બે મહિલાઓ કચડાઈને મૃત્યુ પામી. આ ઘટનામાં બે પુરૂષો પણ ગંભીર રીતે ઘાયલ થયા હતા. આ ઘટનાને પગલે વિસ્તારમાં ભારે રોષ ફેલાયો હતો અને લોકોએ વિરોધ પ્રદર્શન કર્યું હતું, ત્યારબાદ પોલીસે ઠાકુર અને ઓમેન્દ્ર વિરૂદ્ધ FIR નોંધી હતી. વિશેષ સરકારી વકીલ વિપુલ રાઘવે અદાલતને જણાવ્યું હતું કે આ કેસ ૨૫ જૂન, ૨૦૧૯ના રોજ ચાંદપુર ગામના ધર્મેન્દ્ર સિંહની ફરિયાદના આધારે નોંધવામાં આવ્યો હતો. પોલીસે આરોપીઓની ધરપકડ કરી હતી અને તપાસ પૂર્ણ કર્યા બાદ તે જ વર્ષે ૨૮ ઓગસ્ટે ચાર્જશીટ દાખલ કરી હતી. આ કેસની સુનાવણી વિશેષ SC/ST એક્ટ કોર્ટમાં થઈ હતી. કાર્યવાહી દરમિયાન, સરકારી પક્ષે આ ભયાનક ગુનાને સાબિત કરવા માટે પુરાવા અને સાક્ષીઓ રજૂ કર્યા હતા. મુખ્ય આરોપી ઠાકુરનું ટ્રાયલ દરમિયાન ૧૭ ફેબ્રુઆરી, ૨૦૨૪ના રોજ અવસાન થયું હતું. ગુરૂવારે, વિશેષ ન્યાયાધીશ ઓમ પ્રકાશ વર્માએ સહ-આરોપી ઓમેન્દ્રને દોષિત ઠેરવ્યો અને તેને આજીવન કેદની સજા સંભળાવી.