પોલીસ તપાસમાં બહાર આવ્યું છે કે જાહેર સ્થળો અને તેની શાળા સહિત વિવિધ સ્થળોએ તેની સાથે દુષ્કર્મ થયું હતું
(એજન્સી) તા.૧૬
કેરળ પોલીસે પઠાણમથિટ્ટા પોક્સો (જાતીય ગુનાઓથી બાળકોનું રક્ષણ) કેસમાં ૪૨ વ્યક્તિઓની ધરપકડ કરી છે અને ૫૮ આરોપીઓની ઓળખ કરી છે, જેમાં ૧૮ વર્ષની દલિત યુવતીએ જણાવ્યું હતું કે ૬૦થી વધુ પુરૂષોએ તેના પર જાતીય હુમલો કર્યો હતો અને દુષ્કર્મ કર્યું હતું. આ સંબંધે પઠાણમથિટ્ટા જિલ્લાના ચાર અલગ અલગ પોલીસ સ્ટેશનમાં ૨૯ જેટલા કેસ નોંધાયા છે. અહેવાલો અનુસાર, પીડિતાએ ૬૨ વ્યક્તિઓ વિરૂદ્ધ નિવેદનો આપ્યા હતા, જોકે, યોગ્ય પુરાવાના અભાવે પોલીસે ફક્ત ૫૮ વ્યક્તિઓને આરોપી તરીકે ઓળખી કાઢ્યા છે. આરોપીઓમાંથી એક હાલમાં વિદેશમાં છે અને તેના વિરૂદ્ધ પોલીસ લુકઆઉટ નોટિસ જારી કરશે. દુર્વ્યવહાર ૨૦૧૯માં શરૂ થયો હતો જ્યારે તે ૧૩ વર્ષની હતી. તેના પાડોશી, સુબિન (૨૪)એ તેની સાથે છેડતી કરી અને તેના નગ્ન ફોટોગ્રાફ્સ કેપ્ચર કર્યા. તેણે ૧૬ વર્ષની ઉંમરે તેના પર જાતીય હુમલો કરવાનો અશ્લીલ વીડિયો રેકોર્ડ કરવાનો અને તેને અન્ય આરોપીઓ સાથે શેર કરવાનો આરોપ પણ લગાવ્યો હતો, જેમણે પછીના વર્ષોમાં તેના પર હુમલો કર્યો હતો. પોલીસ તપાસમાં જાણવા મળ્યું કે આ દુષ્કર્મ જાહેર સ્થળો અને તેની શાળા સહિત વિવિધ સ્થળોએ થયુ હતું. અહેવાલો અનુસાર, પઠાણમથિટ્ટા જનરલ હોસ્પિટલ સહિત ઓછામાં ઓછા પાંચ સ્થળોએ તેના પર સામૂહિક બળાત્કાર કરવામાં આવ્યો હતો. પીડિતા આ ઘટનાઓ બની ત્યારે સગીર હતી, તેથી ધરપકડ કરાયેલા લોકો પર પોક્સો કાયદાની વિવિધ કલમો અને પછી અનુસૂચિત જાતિ અને અનુસૂચિત જનજાતિ (અત્યાચાર નિવારણ) કાયદા હેઠળ આરોપ મૂકવામાં આવ્યા છે. ધરપકડ કરાયેલા લોકોમાં સગીરોનો પણ સમાવેશ થાય છે. જે સંસ્થામાં પીડિતા હાલમાં અભ્યાસ કરી રહી છે ત્યાં કાઉન્સેલિંગ દરમિયાન આ દુર્વ્યવહાર પ્રકાશમાં આવ્યો હતો. તેમણે બાળ કલ્યાણ સમિતિ (CWC))ને જાણ કરી કે તેમણે કેસ નોંધ્યો છે અને પોલીસને જાણ કરી છે. હાલમાં તપાસ નાયબ પોલીસ અધિક્ષક (DySP) નંદકુમાર અને ઇન્સ્પેક્ટર વિનોદ કૃષ્ણન દ્વારા હાથ ધરવામાં આવી રહી છે.
