ગાઝા પર યુદ્ધ અને સુદાનમાં સંઘર્ષનો અંત લાવવા માટેનો વિરોધ કરનાર ઓછામાં
ઓછા ૧૫ કાર્યકરોની અટકાયત કરવામાં આવી હોવાનું માનવામાં આવે છે

(એજન્સી) તા.રપ
સ્થાનિક મીડિયા અને કાર્યકરોના જણાવ્યા અનુસાર, ઇજિપ્તની સુરક્ષા દળોએ મંગળવારે કૈરોમાં યુએન વુમનના મુખ્યાલયની બહાર ગાઝા એકતા વિરોધને વિખેરી નાખીને તેમાં ભાગ લેનારા ઘણા કાર્યકરોની અટકાયત કરી હતી. ઇજિપ્તના કાર્યકર અહેમદ દૌમાના જણાવ્યા મુજબ, પોલીસ દળોએ મહીનૌર અલ-મસરી, લોબના દરવિશ, રાશા અઝાબ, રાગ્યા ઓમરાન, માઇ અલ-મહદી, ઇસરા યુસુફ અને ફરીદા અલ-હિફની સહિત મોટાભાગના દેખાવકારોની અટકાયત કરી હતી. પ્રદર્શન દરમિયાન, વિરોધીઓએ લિંગ સમાનતા અને મહિલા સશક્તિકરણ માટે યુએન એજન્સીને સંબોધિત એક પત્ર વાંચ્યો હતો, જેમાં ગાઝા અને સુદાનમાં સંઘર્ષોના પરિણામે મહિલાઓને અસર કરતા માનવ અધિકારોના ઉલ્લંઘન અને યુદ્ધ અપરાધોની નિંદા કરવામાં આવી હતી. તેમણે જે પત્ર વાંચ્યો તે મુજબ, ‘પ્રિય યુએન વુમન, આપણે ઇજિપ્તની મહિલાઓનું એક જૂથ છીએ, જે ૭ ઓક્ટોબરથી પેલેસ્ટીની લોકોના ગાઝા પર ઇઝરાયેલના નરસંહારના યુદ્ધના પરિણામે આપણી બહેનો પર આચરવામાં આવેલા અત્યાચારોથી ગભરાયેલી છે. આપણે ચાલી રહેલા યુદ્ધ અપરાધો ખાસ કરીને જાતીય અપરાધો અને ખાસ કરીને પીડિતો અને ગુનેગારો વચ્ચે સમાનતાથી બચાવવામાં યુએનની નિષ્ફળતાથી પણ ડરી ગયા છીએ.’ આ પત્રમાં યુએન વુમન પર, ‘ગાઝા અને સુદાનમાં મહિલાઓ સાથે ભેદભાવ’ કરવાનો આરોપ લગાવવામાં આવ્યો છે, જે તેમના માટે સાથે ઊભા રહેવામાં નિષ્ફળ રહી છે. તેમણે યુએન એજન્સીને, અસરગ્રસ્ત વિસ્તારોમાં મહિલાઓ વિરૂદ્ધ જાતીય અપરાધો અને યુદ્ધ અપરાધોની તપાસ હાથ ધરવા પણ હાકલ કરી હતી. મિડલ ઇસ્ટ આઇએ ટિપ્પણી માટે યુએન વુમનનો સંપર્ક કર્યો છે. ઇજિપ્તિયન ઇનિશિયેટિવ ફોર પર્સનલ રાઇટ્‌સ (ઇઆઇપીઆર)ના ડિરેક્ટર હોસમ બહગતે જણાવ્યું હતું કે, તેમની સંસ્થાનો ઇઆઇપીઆરના મહિલા અધિકારો અને જાતિ કાર્યક્રમના ડિરેક્ટર લોબના દરવિશ સાથેનો સંપર્ક તૂટી ગયો છે. બહગતે સ્ઈઈને કહ્યું, ‘તેમની સાથે છેલ્લે વાત થઇ ત્યારે તેમણે કહ્યું હતુ કે, તે અન્ય અટકાયત કરાયેલા નારીવાદી કાર્યકરો સાથે સુરક્ષા એજન્સીઓની એક માઇક્રોબસમાં હતી, તેમને ખબર ન હતી કે તે ક્યાં જઈ રહ્યા છે. આ અંગે અમે પોલીસ સ્ટેશનમાં સંપર્ક કર્યો છે અને અમે તેમનું સ્થાન શોધવામાં અસમર્થ છીએ.’ બહગતે જણાવ્યું હતું કે, અટકાયત કરાયેલા લોકોની સંખ્યા અનિશ્ચિત છે પરંતુ ઓછામાં ઓછી ૧૫ મહિલા કાર્યકરો કસ્ટડીમાં હોવાનું માનવામાં આવે છે કારણ કે તેમના ફોનના સિગ્નલ હવે પહોંચીની બહાર છે.
પેલેસ્ટીન તરફી વિરોધ પર કડક કાર્યવાહી :- મંગળવારની પોલીસની આ કાર્યવાહી પહેલીવાર નથી જ્યારે ઇજિપ્તમાં ગાઝા અંગે વિરોધ પ્રદર્શનમાં ભાગ લેવા બદલ દેખાવકારોની અટકાયત કરવામાં આવી હોય. એક દાયકા પહેલા જ્યારે રાષ્ટ્રપતિ અબ્દેલ ફતાહ અલ-સીસી સત્તા પર આવ્યા ત્યારથી ઇજિપ્તે અસરકારક રીતે વિરોધ પ્રદર્શન પર પ્રતિબંધ મૂક્યો છે અને સુરક્ષા દળો નિયમિતપણે કોઈપણ સરકાર વિરોધી પ્રવૃત્તિને દબાવી દે છે. સુરક્ષા દળોએ ૨૦ ઓક્ટોબરથી ડઝનેક પ્રો-પેલેસ્ટીન વિરોધીઓની અટકાયત કરી છે, જ્યારે હજારો લોકોએ કૈરોના પ્રતિકાત્મક તહરિર સ્ક્વેરમાં એક રેલીમાં ભાગ લીધો હતો, જે ૨૦૧૧માં રાષ્ટ્રપતિ હોસ્ની મુબારકના રાજીનામામાં પરિણમેલી ક્રાંતિનું કેન્દ્ર હતું. તે મેળાવડા પરના ક્રેકડાઉનને પગલે વિરોધ કદમાં નાના હતા અને સુરક્ષા અધિકારીઓ દ્વારા ઝડપથી વિખેરી નાખવામાં આવ્યા હતા. ૩૦ નવેમ્બરના રોજ, કૈરોમાં ઇજિપ્તના વિદેશ મંત્રાલયની બહાર પેલેસ્ટીન તરફી વિરોધને પગલે ચાર આંતરરાષ્ટ્રીય કાર્યકરોની અટકાયત કરવામાં આવી હતી અને તેમને ૨૭ કલાકથી વધુ સમય માટે ગોંધી રાખવામાં આવ્યા હતા. ઇજિપ્તના પત્રકારોના સિન્ડિકેટ દ્વારા આયોજિત ગાઝામાં માનવતાવાદી કાફલા, ગ્લોબલ કોન્સાઇન્સ કાફલા માટે સુરક્ષા મંજૂરીની માંગ કરવા માટે તેઓએ રેલી કાઢી હતી, જેથી અત્યંત જરૂરી સહાય પહોંચાડવામાં આવી શકાય. સુરક્ષા દળોએ ૮ માર્ચના રોજ કૈરોમાં પેલેસ્ટીન તરફી મહિલા વિરોધને પણ વિખેરી નાખ્યો હતો, જે આંતરરાષ્ટ્રીય મહિલા દિવસ સાથે એકરૂપ હતો. ૪ એપ્રિલના રોજ, અધિકારીઓએ ગાઝા પર ઘેરાબંધી કરવામાં ઇજિપ્તની સરકારની ભૂમિકાની નિંદા કરીને કૈરોમાં પત્રકારોની સિન્ડિકેટની બહાર જાગરણમાં ઓછામાં ઓછા ૧૦ વિરોધીઓની અટકાયત કરી હતી.