(સંવાદદાતા દ્વારા)
ગાંધીનગર,તા.૪
રાજયમાં કોરોનાના દિવાળીથી ઉછાળારૂપ કેસો એક તરફ નોંધાઈ રહ્યા છે. ત્યારે બીજી તરફ કોરોના વેકસીનની જોવાતી રાહ હવે નજીકના દિવસોમાં પૂર્ણ થાય તેવા અહેવાલો મળી રહ્યા હોઈ સરકારી તંત્ર તે માટેની તૈયારીઓમાં લાગી ગયેલ છે. રાજયમાં કોરોના વેકસીનનો જથ્થો આવી પહોંચે તે બાદ વેકસીનેશન માટે તંત્ર સંપૂર્ણ સજજ હોવાનો આજે એક બેઠક બાદ સરકાર તરફથી દાવો કરાયો છે. આ માટે રાજયભરમાં તાલુકા કક્ષા સુધી ટાસ્ક ફોર્સની રચના પણ કરી દેવામાં આવી છે. સરકાર દ્વારા રાજ્યના તમામ ૩૩ જિલ્લા અને ૨૪૮ તાલુકા અને કોર્પોરેશન કક્ષાએ ટાસ્ફ ફોર્સની રચના કરવામાં આવી છે. એટલું જ નહીં, આ ટાસ્ક ફોર્સે જરૂરી આયોજન પણ કરી લીધું છે. ગુજરાતમાં વેક્સિનના સ્ટોરેજ માટે ઝોન કક્ષાએ ૬ વેક્સિન સ્ટોર, જિલ્લા અને કોર્પોરેશન કક્ષાએ ૪૧ સ્ટોર અને છેક અંતરિયાળ વિસ્તાર સુધી પહોંચવા ૨,૧૮૯ કોલ્ડ ચેઇન પોઇન્ટ આજની પરિસ્થિતિએ ઉપલબ્ધ રાખવમાં આવ્યા છે તમામ સ્ટોર ખાતેના સાધનોનું ટેકનિકલ ઓડિટ પણ પૂર્ણ કરવામાં આવ્યું છે. રાજ્યના મુખ્ય સચિવ ડૉ. અનિલ મુકીમના અધ્યક્ષપદે આજે રાજ્યકક્ષાની સ્ટીયરીંગ કમિટિની એક મહત્વની બેઠક યોજાઇ હતી. આ બેઠકમાં ગુજરાતમાં વેક્સિનેશન માટેના આયોજનની વિસ્તૃત સમીક્ષા કરવામાં આવી હતી. ભારત સરકારની ગાઇડલાઇન મુજબ ગુજરાતે વેક્સિનેશન માટેનું આયોજન શરૂ કરી દીધુ છે. પ્રથમ તબક્કામાં હેલ્થકેર વર્કર્સની માહિતી તૈયાર કરવામાં આવી રહી છે. આજ સુધીમાં રાજ્ય સરકારના ૨.૭૧ લાખ આરોગ્યકર્મીઓ અને ૧.૨૫ લાખ ખાનગી આરોગ્ય કર્મીઓ મળીને કુલ ૩.૯૬ લાખ હેલ્થકેર વર્કસની માહિતી એકત્ર કરવામાં આવી છે. બીજા તબક્કામાં ફ્રન્ટલાઇન કોરોના વોરિયર્સની માહિતી એકત્ર કરવાની સૂચના વહીવટી તંત્રને આપવામાં આવી છે. સ્ટેટ સ્ટીયરીંગ કમિટીની બેઠકમાં વરિષ્ઠ સનદી અધિકારીઓ પંકજ કુમાર, મનોજ અગ્રવાલ, એ.કે.રાકેશ તથા અન્ય વરિષ્ઠ અધિકારીઓ ઉપસ્થિત રહ્યા હતા.
- Wed, October 7, 2026
- Top Stories
- Trending
- Wed, October 7, 2026