શાંતિ પ્રક્રિયાના પ્રયાસો વચ્ચે ઉત્તરી ગાઝામાં ઈઝરાયેલી સૈન્યની ટાર્ગેટેડ સ્ટ્રાઈક; નેતાન્યાહુએ ટ્રમ્પના પ્રસ્તાવ સામે મૂકી સંપૂર્ણ નિઃશસ્ત્રીકરણની શરત
(એજન્સી) તા.૧૩
ગાઝામાં શાંતિ કરારને લઈને વધી રહેલા રાજદ્વારી તણાવ વચ્ચે ઈઝરાયેલી સૈન્યએ બુધવારે, ૧૨ ઓગસ્ટના રોજ ઉત્તરી ગાઝાના બેઇત લાહિયા વિસ્તારમાં એક ટાર્ગેટેડ ડ્રોન હુમલો કર્યો હતો. ઈઝરાયેલના જણાવ્યા અનુસાર, આ હુમલો હમાસના એક કમાન્ડરને નિશાન બનાવીને કરવામાં આવ્યો હતો. ૩ ઓગસ્ટ પછી ઈઝરાયેલ દ્વારા જાહેર કરવામાં આવેલી આ પ્રથમ ટાર્ગેટેડ મિલિટ્રી સ્ટ્રાઈક છે. આ હુમલો એવા સમયે થયો છે જ્યારે શાંતિ પ્રયાસોમાં જોડાયેલા અધિકારીઓ દ્વારા હિંસા રોકવા માટે વારંવાર અપીલ કરવામાં આવી રહી છે. હાલમાં જ અમેરિકી પ્રમુખ ડોનાલ્ડ ટ્રમ્પ દ્વારા ગાઝામાં શાંતિ સ્થાપવા માટે એક પ્રસ્તાવ રજૂ કરવામાં આવ્યો હતો, જેમાં ટાર્ગેટેડ લશ્કરી કામગીરીઓ સ્થગિત કરવાની જોગવાઈ પણ સામેલ છે. હમાસે પોતાના હથિયારો નિષ્ક્રિય (decommission) કરવા સંબંધિત શરતોનો સ્વીકાર કર્યો છે. પરંતુ, ઈઝરાયેલના વડાપ્રધાન બેન્જામિન નેતાન્યાહુએ આ પ્રસ્તાવનો અસ્વીકાર કરીને સ્પષ્ટ કર્યું છે કે જ્યાં સુધી હમાસ સંપૂર્ણપણે નિઃશસ્ત્રીકરણ (disarm) ન કરે ત્યાં સુધી ઈઝરાયેલ કોઈપણ કરાર સ્વીકારશે નહીં. ’બોર્ડ ઓફ પીસ’ સાથે સંકળાયેલા અધિકારીઓએ શાંતિ વાટાઘાટો માટે સાનુકૂળ માહોલ બને તે હેતુથી ઈઝરાયેલને આવા હુમલા અટકાવવા વિનંતી કરી છે. બીજી તરફ, ઈઝરાયેલી સૈન્યએ નિશાન બનાવાયેલા વ્યક્તિ વિશે વધારાની વિગતો આપી નથી કે તે માર્યો ગયો છે કે નહીં તેની પુષ્ટિ કરી નથી. તબીબી અહેવાલો અનુસાર, શિફા અને નાસર હોસ્પિટલમાં બુધવારે આ હુમલા બાદ ચાર ઈજાગ્રસ્તોને દાખલ કરવામાં આવ્યા હતા. ગાઝાના આરોગ્ય મંત્રાલયના આંકડા મુજબ ૧ ઓગસ્ટથી અત્યાર સુધીમાં આ ક્ષેત્રમાં ૪૫ લોકોના મોત થયા છે. જમીની સ્તર પર ચાલુ લશ્કરી કાર્યવાહી અને રાજદ્વારી મડાગાંઠ વચ્ચે સ્થિતિ અત્યંત નાજુક બની ગઈ છે.