પોતાની સફર પર નજર નાખતા વર્માએ કહ્યું કે, તેમની શૈક્ષણિક પૃષ્ઠભૂમિ (એકેડેમિક બેકગ્રાઉન્ડ) વિશ્વની સૌથી મોટી ટેક કંપનીઓમાંની એકમાં ભૂમિકા મેળવવા માટેનો કોઈ સ્પષ્ટ કે સરળ રસ્તો નહોતો

(એજન્સી) તા.૪
એક યુવતીએ ટિયર-૩ કોલેજમાંથી કેમિકલ એન્જિનિયરિંગનો અભ્યાસ કરવાથી લઈને ગૂગલ (Google)માં પ્રોજેક્ટ મેનેજમેન્ટ એપ્રેન્ટિસશિપ મેળવવા સુધીની પોતાની અસાધારણ સફર સોશિયલ મીડિયા પર શેર કરી છે. સિમરન વર્મા નામની આ યુવતીએ લિંક્ડઈન (ન્ૈહાીઙ્ઘૈંહ) પર એક પોસ્ટ શેર કરીને પોતાની બિનપરંપરાગત કારકિર્દીની સફર વિશે વાત કરી છે. તેમણે જણાવ્યું કે, ટેક જાયન્ટ ગૂગલ સાથેના તેમના શરૂઆતના પ્રથમ ૯૦ દિવસોએ તેમની કારકિર્દી પ્રત્યેનો આખો દ્રષ્ટિકોણ સંપૂર્ણપણે બદલી નાખ્યો છે. સિમરન વર્માએ પોતાની લિંક્ડઈન પોસ્ટમાં લખ્યું છે કે, “મેં ૪ વર્ષ સુધી ડિસ્ટિલેશન કૉલમ્સનો અભ્યાસ કર્યો, માત્ર એટલા માટે કે ક્યારેય તેનો ઉપયોગ ન કરવો પડે! ૩ મહિના પહેલાં, મેં ગૂગલમાં મારી પ્રોજેક્ટ મેનેજમેન્ટ એપ્રેન્ટિસશિપમાં પગ મૂક્યો હતો.” આ સફર વિશે વધુ વાત કરતા તેમણે સ્વીકાર્યું કે આ અનુભવ તેમના માટે ઘણું બધું શીખવનારો અને એક તીવ્ર વળાંક સમાન (steep learning curve) રહ્યો છે. પોતાના ભૂતકાળને યાદ કરતા વર્માએ જણાવ્યું કે, તેમની શૈક્ષણિક પૃષ્ઠભૂમિ જોતાં વિશ્વની આટલી મોટી ટેક કંપનીમાં પહોંચવું એ બિલકુલ સરળ કે સ્વાભાવિક નહોતું. તેમણે આગળ લખ્યું, “જ્યારે તમે કેમિકલ એન્જિનિયરિંગની ડિગ્રી સાથે ટિયર-૩ કોલેજમાંથી આવો છો, ત્યારે પરંપરાગત નિયમો મુજબ તમારો રસ્તો પહેલેથી જ નક્કી હોય છે. તે નિયમોમાં ક્યાંય એવું નથી લખ્યું હોતું કે તમે ગૂગલમાં મોટા પાયાના પ્રોજેક્ટ મેનેજમેન્ટના સ્ટીયરીંગ વ્હીલ (મુખ્ય ભૂમિકા) પર હશો.” તેમણે ગૂગલ સાથે જોડાવાને પોતાની વાર્તા જાતે ફરીથી લખવાની એક સુવર્ણ તક ગણાવી હતી અને ઉમેર્યું હતું કે, “આ ભૂમિકામાં આવવાનો અર્થ મારી પોતાની સ્ક્રિપ્ટ ફરીથી લખવાનો હતો. પરંતુ સત્ય એ છે કે, કોઈ પણ વ્યક્તિ પોતાના સપનાની કારકિર્દીનો પુલ સંપૂર્ણપણે એકલો નથી બનાવતો.” આ પરિવર્તન દરમિયાન પોતાને સાથ આપનારા મિત્રો અને માર્ગદર્શકો (મેન્ટર્સ)નો પણ સિમરને હૃદયપૂર્વક આભાર માન્યો હતો. તેમણે કહ્યું કે તેમના માર્ગદર્શન અને પ્રોત્સાહનને કારણે જ તેઓ આ કારકિર્દીના મોટા બદલાવને સફળતાપૂર્વક પાર પાડી શક્યા અને પોતાની નવી ભૂમિકામાં યોગ્ય રીતે ગોઠવાઈ શક્યા. પોસ્ટના અંતમાં તેમણે ગૂગલના અનુભવને ખૂબ જ ઝડપી ગણાવતા કહ્યું, “છેલ્લા ૩ મહિના પ્રોસેસ ઓપ્ટિમાઈઝેશનમાંથી ક્રોસ-ફંક્શનલ અજાઈલ એક્ઝિક્યુશન તરફ શિફ્ટ થવાના વંટોળ સમાન રહ્યા છે. ૯૦ દિવસ પૂરા થયા છે અને અત્યારે તો માત્ર વેગ પકડાયો છે. આગામી પ્રકરણ મારી સામે જે પણ લાવશે, તેના માટે હું સંપૂર્ણ તૈયાર છું.” સોશિયલ મીડિયા પર સિમરનની આ પોસ્ટ ખૂબ જ વાયરલ થઈ રહી છે અને લોકો તેમની આ સફર તેમજ દ્રઢ નિશ્ચયના જોરદાર વખાણ કરી રહ્યા છે. એક યુઝરે કમેન્ટમાં લખ્યું, “આમાં રહેલી ઈમાનદારી ખૂબ ગમી. તમારી ડિગ્રીએ તમને શરૂઆત આપી, પરંતુ તમારી શીખવાની અને બદલાવ લાવવાની ઈચ્છાએ તમારી કારકિર્દીને નવો આકાર આપ્યો. જેઓ પોતાની જાતને ક્યાંક અટકેલી અનુભવે છે તેમના માટે આ એક પ્રેરણાદાયી રીમાઇન્ડર છે.” જ્યારે અન્ય એક યુઝરે તેમને અભિનંદન આપતા લખ્યું કે, “આ ખરેખર ખૂબ જ યોગ્ય પ્રશંસા છે ! ગૂગલમાં તમારા પ્રથમ ૯૦ દિવસ ધમાકેદાર રીતે પૂરા કરવા બદલ ખૂબ ખૂબ અભિનંદન સિમરન !”