(એજન્સી) તા.૨૯
ઉત્તરપ્રદેશના ઇટાવા જિલ્લામાં જાતિ આધારિત હિંસાની એક ઘટના પ્રકાશમાં આવી છે જ્યાં ધાર્મિક કાર્યક્રમમાં ભાગ લેવા બદલ ઉચ્ચ જાતિના હિન્દુ પુરૂષો દ્વારા બહુજન સમુદાયના સભ્યોને ક્રૂરતાથી માર મારવામાં આવ્યો, બળજબરીથી વાળ મુંડવામાં આવ્યા અને તેમના પર પેશાબ કરવામાં આવ્યો. આ ઘટના ૨૨ જૂનના રોજ બની હતી. આ ઘટનાનો એક વીડિયો સોશિયલ મીડિયા પર વાયરલ થયો હતો જેમાં કથાકારનું બળજબરીથી માથું મુંડવામાં આવ્યું હતું અને અપમાનિત કરવામાં આવ્યા હતા. વિડીયોમાં પીડિતોનું અપમાન કરતાં હુમલાખોરો કહે છે કે, ‘તમને બ્રાહ્મણોના ગામમાં પ્રવેશવા બદલ સજા મળી રહી છે,’. હુમલાખોરોએ મહિલાઓને પણ બક્ષ્યા ન હતા. મેળાવડામાં હાજર શ્રદ્ધાળુ મહિલાઓ પર પણ હુમલો કરવામાં આવ્યો, અપમાનિત કરવામાં આવ્યા અને જમીન પર નાક ઘસવાની ફરજ પાડવામાં આવી હતી. હુમલો કરનારાઓએ પેશાબ છાંટીને અને ગ્રામજનોને પગે પડવાની ફરજ પાડયા પછી તેમની પાસેથી રૂા.૨૫,૦૦૦ અને સોનાની ચેઈન પણ લૂંટી લીધી. ક્રૂર હુમલા બાદ તમામ પીડિતોને ગામમાંથી હાંકી કાઢવામાં આવ્યા હતા. પીડિતોમાંથી એક, મુકુટમણિ સિંહે પપ્પુ બાબાની આગેવાની હેઠળના હુમલામાં સામેલ ૫૦થી વધુ વ્યક્તિઓના નામ આપ્યા છે, જેમણે આ કાર્યક્રમનું આયોજન કર્યું હતું. પોલીસે બકેવાર પોલીસ સ્ટેશનમાં કેસ નોંધ્યો છે. ઘટનાની જાણ થતાં ભીમ આર્મી ઘટનાસ્થળે પહોંચી હતી. અત્યાર સુધીમાં મુખ્ય આરોપી સહિત ચાર લોકોની ધરપકડ કરવામાં આવી છે. ભીમ આર્મીના વડા ચંદ્ર શેખર આઝાદે પોતાની X પોસ્ટમાં યુપી સરકાર પાસેથી ઝડપી કાર્યવાહીની માંગ કરી હતી. તેમણે સરકારને પીડિતોની સલામતી સુનિશ્ચિત કરવા અને તેમને રૂા.૧૦ લાખનું વળતર આપવા પણ વિનંતી કરી હતી. આઝાદે ૨ દિવસમાં પીડિતોને ન્યાય નહીં મળે તો મોટા પાયે વિરોધ કરવાની ચેતવણી પણ આપી હતી. આ ઘટનાએ સોશિયલ મીડિયા પર શોકનું મોજું ફેલાવ્યું છે અને લોકો દલિત સમુદાય પર વધતા હુમલાઓ પર આઘાત અને ગુસ્સો વ્યક્ત કરી રહ્યા છે.
- Fri, October 2, 2026
- Top Stories
- Trending
- Fri, October 2, 2026