ભારતના વડાપ્રધાન નરેન્દ્ર મોદી સાથેની મુલાકાતમાં ઈરાની રાષ્ટ્રપતિએ સ્પષ્ટ કર્યું કે તેમનો દેશ ક્યારેય યુદ્ધનું સ્વાગત કરતો નથી; બીજી તરફ ભારતે વેપાર વિસ્તરણ અને શાંતિ પ્રક્રિયાને ટેકો જાહેર કર્યો

(એજન્સી) તહેરાન/નવી દિલ્હી, તા.૩૧
એંગ્લો-એશિયન વિસ્તારમાં વધતા જતા તણાવ વચ્ચે ઈરાનના રાષ્ટ્રપતિ મસૂદ પેઝેશ્કિયને દાવો કર્યો છે કે અમેરિકાએ પોતાની પ્રતિબદ્ધતાઓ કે વાયદાઓ પૂરા કર્યા નથી. શંઘાઈ કોઓપરેશન ઓર્ગેનાઈઝેશન (SCO) સમિટની બાજુમાં ભારતના વડાપ્રધાન નરેન્દ્ર મોદી સાથે યોજાયેલી દ્વિપક્ષીય બેઠક દરમિયાન પેઝેશ્કિયને ભારપૂર્વક જણાવ્યું હતું કે ઈરાન ક્યારેય યુદ્ધનું ઈચ્છુક નથી અને ક્યારેય પણ યુદ્ધને આવકારતું નથી, પરંતુ અમેરિકાના વલણને કારણે સ્થિતિ વણસી રહી છે. ઈરાનનો આ દાવો એવા સમયે આવ્યો છે જ્યારે લારાક દ્વીપ પર અમેરિકી દળો દ્વારા કરવામાં આવેલા રોકેટ લોન્ચર હુમલા બાદ ઈરાને વળતો પ્રહાર કરવાનો દાવો કર્યો છે. ઈરાન અનુસાર, તેણે જોર્ડનમાં આવેલા અમેરિકી સૈન્ય મથકો અને યુએઈ (UAE) સ્થિત અલ મિન્હાદ એરબેઝ પર અમેરિકી સૈન્ય લક્ષ્યોને નિશાન બનાવ્યા છે. ઈરાની સરકારી મીડિયાના અહેવાલો મુજબ, લારાક દ્વીપ પર અમેરિકાના રાત્રિ દરમિયાન થયેલા હુમલામાં બે લોકોના મોત થયા છે અને અન્ય કેટલાક ઘાયલ થયા છે. બીજી તરફ, વડાપ્રધાન નરેન્દ્ર મોદીએ ઈરાન સાથેના સંબંધોને વધુ મજબૂત કરવાની ઈચ્છા વ્યક્ત કરી છે. રાષ્ટ્રપતિ પેઝેશ્કિયન સાથેની બેઠક બાદ ‘X’ (ટિ્‌વટર) પર એક પોસ્ટમાં વડાપ્રધાન મોદીએ જણાવ્યું હતું કે, ભારતે વિવિધ ક્ષેત્રોમાં ઈરાન સાથેની પોતાની જૂની મિત્રતાને મજબૂત કરવાની પ્રતિબદ્ધતા પુનરાવર્તિત કરી છે. તેમણે ઉમેર્યું કે ભારત આવનારા સમયમાં બંને દેશો વચ્ચેના વેપારને વધુ વિસ્તૃત અને વૈવિધ્યસભર બનાવવા માગે છે. આ સાથે પ્રાદેશિક સ્થિતિ અંગે થયેલી ચર્ચામાં ભારતે પ્રદેશમાં સ્થાયી શાંતિ સુનિશ્ચિત કરવાના તમામ પ્રયાસોને સમર્થન આપવાનું વચન આપ્યું હતું. ઉલ્લેખનીય છે કે ભારતનું આ વલણ અમેરિકી રાષ્ટ્રપતિ ટ્રમ્પની એ ચેતવણી છતાં આવ્યું છે, જેમાં તેમણે ઈરાનને આર્થિક સહારો આપનારા દેશો સામે ગંભીર પરિણામોની ચેતવણી આપી હતી. દરમિયાન, વિસ્તારમાં સ્થિતિ વધુ નાજુક બની રહી છે. ઈરાની વિદેશ મંત્રીએ ઈઝરાયેલના વડાપ્રધાન નેતન્યાહુ પર અમેરિકાને યુદ્ધમાં ઘસડી જવાનો આરોપ લગાવ્યો છે. આ સિવાય હોર્મુઝની ખાડીમાં બે માઇન્સ સાથે અથડાતા એક ટેન્કરમાં આગ લાગી હોવાના અહેવાલ છે. જ્યારે યુએઈએ પોતાના એરબેઝ પર હુમલાના અહેવાલોને ફગાવી દીધા છે, પરંતુ પોતાના જળસીમા પર ઈરાની ડ્રોનને તોડી પાડવાની ઘટનાને “ખતરનાક ઉશ્કેરણી” ગણાવી છે. ગાઝા, વેસ્ટ બેંક અને લેબનાન સરહદે પણ હિંસક સૈન્ય ગતિવિધિઓ સતત ચાલુ હોવાના અહેવાલો મળી રહ્યા છે.