ભાજપે તેના નેતાઓને ડૉ. ભીમરાવ આંબેડકર, બંધારણ અને અનામત જેવા સંવેદનશીલ મુદ્દાઓ પર વિવાદાસ્પદ નિવેદનો આપવાનું ટાળવાની સૂચના આપી છે

(એજન્સી) તા.૨૯
ભાજપે તેના નેતાઓને ડૉ. ભીમરાવ આંબેડકર, બંધારણ અને અનામત જેવા સંવેદનશીલ મુદ્દાઓ પર વિવાદાસ્પદ નિવેદનો આપવાનું ટાળવાની સૂચના આપી છે. છેલ્લી ચૂંટણીઓમાં આવા નિવેદનોને કારણે પાર્ટીને ઘણુ નુકસાન સહન કરવું પડ્યું હતું, તેથી પાર્ટી હવે નેતાઓને પાર્ટી લાઇન પ્રમાણે બોલવાનો આગ્રહ કરી રહી છે. ડૉ. ભીમરાવ આંબેડકર, બંધારણ, અનામત અને દલિતોના મુદ્દાઓ પર સતત ભારતીય જનતા પાર્ટી (ભાજપ)ને ઘેરવામાં આવે છે. પાર્ટીના નેતાઓના વિવાદાસ્પદ નિવેદનોને કારણે તેમનો સામનો કરવો સરળ નથી. હવે હાઇકમાન્ડે પાર્ટીના નેતાઓને કડક સંદેશ આપ્યો છે. ડૉ. બી.આર. આંબેડકર સન્માન અભિયાનના રાષ્ટ્રીય કાર્યશાળામાં ભાજપ અધ્યક્ષ જે.પી. નડ્ડાની હાજરીમાં સંગઠન મહાસચિવ બીએલ સંતોષે કહ્યું કે, પાર્ટીના નેતાઓએ આ મુદ્દાઓ પર વિવાદાસ્પદ નિવેદનો ન આપવા જોઈએ. બિનજરૂરી નિવેદનો ટાળો અને પાર્ટી લાઇન મુજબ તમારા વિચારો વ્યક્ત કરો. હકીકતમાં ગત લોકસભા ચૂંટણીમાં ભાજપના ઘણા નેતાઓએ બંધારણ બદલવાના નિવેદનો આપ્યા હતા. તેને કારણે ભાજપને ઘણુ નુકસાન સહન કરવું પડ્યું હતું. ભાજપને યુપી અને મહારાષ્ટ્ર સહિત ઘણા રાજ્યોમાં ચૂંટણીમાં હારનો સામનો કરવો પડ્યો હતો. અનિલ હેગડે, લલ્લુ સિંહ અને જ્યોતિ મિર્ધાના નિવેદનોએ વિપક્ષને એક તક આપી, જેના પછી ભાજપ બચાવાત્મક સ્થિતિમાં જોવા મળી. દરેક રેલીમાં સામાન્ય લોકોને બંધારણ સાથે કોઈપણ રીતે છેડછાડ ન કરવાનો સંદેશ આપવામાં આવ્યો હતો પરંતુ પાર્ટી ડેમેજ કંટ્રોલ કરી શકી નહીં. ભાજપના નેતા હેગડેએ કહ્યું હતું કે, જે લોકો પોતાને ધર્મનિરપેક્ષ કહે છે તેઓ જાણતા નથી કે તેમનું લોહી શું છે. હા, બંધારણ આપણને પોતાને ધર્મનિરપેક્ષ કહેવાનો અધિકાર આપે છે પરંતુ બંધારણમાં ઘણી વખત સુધારા કરવામાં આવ્યા છે, અમે તેમાં પણ સુધારો કરીશું, આ જ કારણ છે કે, અમે સત્તામાં આવ્યા છીએ. લલ્લુ સિંહે કહ્યું હતું કે, કેન્દ્રમાં સરકાર ફક્ત ૨૭૫ સાંસદોથી જ બની શકે છે પરંતુ બંધારણમાં ફેરફાર કરવા માટે વધુ સાંસદોની જરૂર પડશે, તો જ બંધારણમાં ફેરફાર કરી શકાશે. તે જ સમયે કોંગ્રેસમાંથી ભાજપમાં જોડાયેલા જ્યોતિ મિર્ધાએ નિવેદન આપ્યું હતું કે, દેશના હિતમાં ઘણા કઠિન નિર્ણયો લેવા પડશે. તેના માટે આપણે ઘણા બંધારણીય ફેરફારો કરવા પડશે. આ માટે તેને લોકસભા અને રાજ્યસભા બંને ગૃહોમાં પસાર કરાવવું જોઈએ. લોકસભામાં ભાજપ પાસે પ્રચંડ બહુમતી છે. આ વખતે NDAને ત્રીજી વખત લોકસભામાં પ્રચંડ બહુમતી લાવવી પડશે. આ વર્ષે ભાજપ ૧૪ એપ્રિલના રોજ ડૉ. આંબેડકરની જન્મજયંતિ ભવ્ય રીતે ઉજવી રહ્યું છે. આ માટે મંગળવારે એક રાષ્ટ્રીય કાર્યશાળાનું આયોજન કરવામાં આવ્યું હતું. આમાં દેશભરમાં સન્માન અભિયાન કેવી રીતે ચલાવવું તે અંગે સૂચનાઓ આપવામાં આવી હતી. હવે રાજ્ય સ્તરે પણ વર્કશોપનું આયોજન કરવામાં આવશે અને ત્યાંના નેતાઓ અને કાર્યકરોને પણ આવી જ સૂચનાઓ આપવામાં આવશે.