(એજન્સી) તા.૨૦
બહરાઇચના મહારાજગંજમાં હિંસાના મામલામાં યોગી સરકાર ફરી એકવાર એક તરફી કાર્યવાહી કરવાની તૈયારીમાં છે. પોલીસ-પ્રશાસન હવે બુલડોઝરની કાર્યવાહીની તૈયારી કરી રહ્યું છે. પ્રશાસનની ટીમે મુખ્ય આરોપી સહિત ૨૩ લોકોના ઘરો પર નોટિસ ચોંટાડી છે. આ મકાનો એ લોકોના છે જેમના પર હિંસા કરવાનો આરોપ મૂકવામાં આવ્યો છે.
હવે પીડબ્લયુડી અધિકારીઓએ શુક્રવારે સાંજે હત્યાના આરોપી અબ્દુલ હમીદ સહિત ૨૩ લોકોના ઘરો પર નોટિસ ચોંટાડી દીધી છે. રોડની જમીનમાં થયેલા ગેરકાયદેસર બાંધકામ દૂર કરવા ત્રણ દિવસનો સમય આપવામાં આવ્યો છે. આ પછી અધિકારીઓએ તમામ ગેરકાયદેસર રીતે બાંધવામાં આવેલી ઇમારતો પર બુલડોઝિંગ કાર્યવાહી શરૂ કરવાની ચેતવણી આપી છે. હરડી પોલીસ સ્ટેશન વિસ્તાર મહારાજગંજ નગરમાં ૧૩ ઓકટોબરના રોજ થયેલા તોફાનો, આગચંપી અને તોડફોડના કિસ્સામાં બદમાશો સામે કાયદેસરની કાર્યવાહીની સાથે, ગેરકાયદેસર બાંધકામ પર બુલડોઝર ચલાવવાના પ્રયાસો તેજ થયા છે.
બે દિવસ પહેલા જાહેર બાંધકામ વિભાગે કુંડાસર, મહસી થઈને નાનપરાને જોડતા જિલ્લાના મુખ્ય માર્ગની માપણી કરી હતી. તપાસ દરમિયાન હત્યાના આરોપી અબ્દુલ હમીદ સહિત ૨૩ લોકોના કાયમી મકાનો જાહેર બાંધકામ વિભાગની જમીન પર બાંધવામાં આવ્યા હોવાનું દાવો કરવામાં આવ્યો હતો. આ લોકોને નોટિસ આપવામાં આવી છે. તે દરેકના ઘર પર પણ ચોંટાડવામાં આવ્યું છે. પીડબલ્યુડીના જે.ઈ. પંકજસિંહે કહ્યું કે, તપાસ વર્ષ ૨૦૨૩માં જ થઈ હતી. ગેરકાયદે બાંધકામ દૂર કરવાની ચેતવણી આપવામાં આવી છે, પરંતુ આ લોકો દ્વારા કોઈ પગલાં લેવામાં આવ્યા નથી. હવે ફરીથી માપણી કર્યા બાદ નોટિસ ચોંટાડી દેવામાં આવી છે. અતિક્રમણ કરનારાઓને તેમના અતિક્રમણ દૂર કરવા માટે ત્રણ દિવસનો સમય આપવામાં આવ્યો છે. નિર્ધારિત સમય બાદ તુરંત જ બુલડોઝરથી અતિક્રમણ દૂર કરવાની કાર્યવાહી શરૂ કરવામાં આવશે.
- Mon, April 6, 2026
- Top Stories
- Trending
- Mon, April 6, 2026
