સંયુક્ત રાષ્ટ્રની આ એજન્સીનું કહેવું છે કે ભંડોળની અછતને કારણે ખાદ્ય સુરક્ષાના ક્ષેત્રમાં થયેલી ‘મર્યાદિત અને નાજુક’ પ્રગતિ પાછી ફરી જવાનું જોખમ ઊભું થયું છે
(એજન્સી) તા.૧૯
વર્લ્ડ ફૂડ પ્રોગ્રામ (ઉહ્લઁ)એ ભંડોળની અછતને કારણે ગાઝામાં તેના રાહત કાર્યક્રમોમાં મોટો કાપ મૂકવાની જાહેરાત કરી છે. આના પરિણામે લગભગ ૫ લાખ લોકો આવશ્યક સહાયથી વંચિત રહી જશે, જ્યારે યુદ્ધથી તબાહ થયેલા આ પેલેસ્ટીન પ્રદેશની મોટાભાગની વસ્તી પૂરતું ભોજન મેળવવા માટે સંઘર્ષ કરી રહી છે. સોમવારે એક નિવેદનમાં, સંયુક્ત રાષ્ટ્રની આ એજન્સીએ જણાવ્યું હતું કે પેલેસ્ટીનમાં તેના કામકાજ માટે તેને અગાઉના વર્ષોની સરખામણીમાં અડધાથી પણ ઓછું ભંડોળ મળ્યું છે. એજન્સીએ કહ્યું કે, કબજા હેઠળના પેલેસ્ટીન પ્રદેશમાં આગામી છ મહિના સુધી મહત્વપૂર્ણ કામગીરી ચાલુ રાખવા માટે તેને તાત્કાલિક વધુ ૪૫૦ મિલિયન ડોલરની જરૂર છે. પરિણામે, ઉહ્લઁએ જણાવ્યું છે કે ગાઝામાં માસિક સહાય મેળવનારા લોકોની સંખ્યા ૧૬ લાખથી ઘટાડીને ૧૧ લાખ કરવામાં આવશે. હવે દરેક પરિવારને બેને બદલે માત્ર એક જ ફૂડ પાર્સલ (રાશન પેકેટ) આપવામાં આવશે અને લોટની થેલીઓનું કદ પણ નાનું કરવામાં આવશે. સંયુક્ત રાષ્ટ્રની એજન્સીએ એમ પણ જણાવ્યું કે, દરરોજ પૂરા પાડવામાં આવતા તૈયાર ભોજન (હોટ મીલ્સ)ની સંખ્યા પણ ૨,૫૦,૦૦૦થી ઘટાડીને ૧,૫૦,૦૦૦ કરવામાં આવશે. જે વિસ્તારો સુધી પહોંચવું મુશ્કેલ છે – જેમાં ઇઝરાયેલી સૈન્ય નિયંત્રણને દર્શાવતી કહેવાતી “યલો લાઇન” (પીળી રેખા) નજીકના વિસ્તારોનો પણ સમાવેશ થાય છે – ત્યાંના પરિવારોને હવે દરરોજને બદલે એકાંતરે (એક દિવસ છોડીને એક દિવસ) તૈયાર ભોજન મળશે. ૭ ઓક્ટોબર, ૨૦૨૩ના રોજ હમાસ દ્વારા ઇઝરાયેલ પર કરવામાં આવેલા હુમલા બાદ, ઇઝરાયેલ દ્વારા ગાઝામાં ચલાવવામાં આવી રહેલા નરસંહાર સમાન યુદ્ધને ત્રણ વર્ષથી વધુ સમય થઈ ગયો છે. આ યુદ્ધને કારણે શિક્ષણ, આરોગ્યસંભાળ અને અર્થતંત્ર સંપૂર્ણપણે પડી ભાંગ્યા છે, જ્યારે ખોરાક, પાણી, આશ્રય અને અન્ય પાયાની જરૂરિયાતો મેળવવી એ લોકો માટે રોજિંદો સંઘર્ષ બની ગયો છે. ગાઝાના આરોગ્ય મંત્રાલયના જણાવ્યા અનુસાર, અત્યાર સુધીમાં ૭૪,૨૪૫થી વધુ પેલેસ્ટીનીઓ માર્યા ગયા છે.