સુપ્રીમ કોર્ટના નિર્દેશોના અમલીકરણમાં તંત્ર નિષ્ફળ રહ્યાના આરોપ સાથે અડધા દિવસના બંધની અપીલ; ચુસ્ત પોલીસ બંદોબસ્ત ગોઠવાયો
(એજન્સી) તા.ર૭
મધ્યપ્રદેશના ધાર જિલ્લામાં સ્થિત ઐતિહાસિક ભોજશાલા-કમલ મૌલા મસ્જિદ પરિસર વિવાદમાં સુપ્રીમ કોર્ટના આદેશોનું યોગ્ય પાલન ન થવાનો આરોપ લગાવીને હિન્દુત્વવાદી સંગઠનો દ્વારા મંગળવારે અડધા દિવસના ‘ધાર બંધ’નું આહ્વાન કરવામાં આવ્યું હતું. બંધના આહ્વાનને પગલે સુરક્ષા વ્યવસ્થા સુદૃઢ કરવા માટે સમગ્ર જિલ્લામાં ચુસ્ત પોલીસ બંદોબસ્ત તેનાત કરી દેવામાં આવ્યો હતો. આ વિરોધ પ્રદર્શન દરમિયાન હિન્દુ સંગઠનોના કાર્યકરો દ્વારા બાઇક રેલી કાઢવામાં આવી હતી અને સ્થાનિક વેપારીઓ તથા દુકાનદારોને સ્વેચ્છાએ ધંધા-રોજગાર બંધ રાખવા વિનંતી કરવામાં આવી હતી. જોકે, કેટલાક સ્થળોએ આંદોલનકારીઓ દ્વારા બળજબરીપૂર્વક દુકાનો બંધ કરાવવાનો પ્રયાસ કરાયો હોવાના અહેવાલો પણ સામે આવ્યા હતા. ભોજ ઉત્સવ સમિતિના પ્રમુખ સુરેશ જાલોદિયાએ પ્રશાસન પર આરોપ લગાવતા જણાવ્યું હતું કે, મુસ્લિમ સમુદાય માટે નમાજ અદા કરવા અંગે સુપ્રીમ કોર્ટે આપેલા નિર્દેશોનું તંત્ર દ્વારા યોગ્ય રીતે પાલન કરવામાં આવ્યું નથી. અદાલતે નમાજ માટે ‘સર્વે નંબર ૫૯૬’ નક્કી કર્યો હતો, જ્યારે વહીવટીતંત્રે વિવાદિત પરિસર પાસે આવેલી ‘સર્વે નંબર ૬૧૨’ વાળી જગ્યા પર નમાજની વ્યવસ્થા કરી આપી છે. આ વૈકલ્પિક જગ્યાના કારણે ભોજશાલા તરફ જવાનો માર્ગ અવરોધાય છે, જેના વિરોધમાં સકલ હિન્દુ સમાજ દ્વારા બપોરે ૧૨ વાગ્યા સુધી બંધનું એલાન આપવામાં આવ્યું હતું. બીજી તરફ, સ્થાનિક પોલીસ તંત્રના જણાવ્યા અનુસાર પરિસ્થિતિ સંપૂર્ણપણે શાંતિપૂર્ણ અને નિયંત્રણ હેઠળ છે. શહેર પોલીસ સુપ્રિન્ટેન્ડન્ટ શશાંક સિંહ ગુર્જરે સ્પષ્ટ કર્યું હતું કે, બંધમાં લોકો સ્વેચ્છાએ જોડાય તે સુનિશ્ચિત કરવામાં આવી રહ્યું છે અને કોઈને પણ બળજબરીથી વેપાર બંધ કરાવવા દેવામાં આવશે નહીં. સત્તાવાળાઓએ નાગરિકોને અફવાઓથી દૂર રહેવા અને જો કોઈ ધાકધમકી કે દબાણ કરવાનો પ્રયાસ કરે તો તુરંત પોલીસનો સંપર્ક કરવા અપીલ કરી છે. ઉલ્લેખનીય છે કે, ભોજશાલા-કમલ મૌલા મસ્જિદ પરિસરને હિન્દુ પક્ષ દ્વારા દેવી સરસ્વતીનું મંદિર માનવામાં આવે છે, જ્યારે મુસ્લિમ પક્ષ તેને કમલ મૌલા મસ્જિદ ગણાવે છે. કાનૂની કાર્યવાહી બાદ સુપ્રીમ કોર્ટે મુસ્લિમ સમુદાયને પરિસર નજીક જ નક્કી કરાયેલા ચોક્કસ સ્થળે શુક્રવારની નમાજ અદા કરવાની મંજૂરી આપી હતી, જ્યાં છેલ્લા કેટલાક અઠવાડિયાથી નમાજ પઢવામાં આવી રહી છે. આ મુદ્દો સાંપ્રદાયિક રીતે ખૂબ સંવેદનશીલ હોવાથી અનિચ્છનીય બનાવ અટકાવવા વહીવટીતંત્ર સતત એલર્ટ મોડ પર છે.