શિક્ષિકાએ મીડિયાને જણાવ્યું કે, સસ્પેન્શન ખોટું છે, તેઓ આ આદેશને રાજસ્થાન હાઇકોર્ટમાં પડકારશે
(એજન્સી) ઉદયપુર, તા.૧૯
ડુંગરપુરની બીજા ધોરણની શિક્ષિકા મેનકા ડામોર જે ૧૮ જુલાઈના રોજ બાંસવાડા જિલ્લાના માનગઢ ધામ ખાતે ભીલ પ્રદેશ સાંસ્કૃતિક મહારેલીમાં ‘ભીલ પ્રદેશ’ના સમર્થનમાં નિવેદન આપવાને કારણે રાજ્યની ભાજપ સરકારના નિશાના પર આવી હતી, તેમને ૨૪ જુલાઈના રોજ સસ્પેન્ડ કરવામાં આવી હતી. મેનકા ડુંગરપુરના સીમલવાડા પંચાયત સમિતિના સદિયા સ્થિત સરકારી ઉચ્ચતર માધ્યમિક શાળામાં કાર્યરત હતી, જેમને સસ્પેન્ડ કરવામાં આવ્યા છે અને મુખ્ય બ્લોક શિક્ષણ અધિકારી – દોવાડાના મુખ્યાલય કાર્યાલયમાં પોસ્ટ કરવામાં આવ્યા છે. સરકારી આદેશમાં રાજસ્થાન આચાર નિયમો હેઠળ ડામોર સામે વિભાગીય તપાસ અને સસ્પેન્શનની ભલામણ અને શિક્ષણ વિભાગની છબીને ખરડવાનો ઉલ્લેખ છે. મીડિયાએ શિક્ષિકા મેનકા ડામોર સાથે વિગતવાર વાતચીત કરી અને તેમના પોતાના શબ્દોમાં આખી ઘટના સમજવાનો પ્રયાસ કર્યો. શિક્ષિકાએ સ્પષ્ટતા કરી કે ‘મેં કોઈ પણ મહિલાને સિંદૂર કે મંગળસૂત્ર પહેરતા અટકાવી નથી, મારો હેતુ સભાને સમજાવવાનો હતો કે, આદિવાસી હિન્દુ નથી, પહેલા આદિવાસી મહિલાઓ સિંદૂર અને મંગળસૂત્ર પહેરતી નહોતી, મને પણ આ ખબર નહોતી અને તેથી મને ખબર ન હતી ત્યાં સુધી હું પણ સિંદૂર અને મંગળસૂત્ર પહેરતી હતી પરંતુ ૨૦૧૬થી જ્યારે હું એક આદિવાસી પરિવારમાં જોડાઈ છું, ત્યારે મને ખબર પડી કે આ આદિવાસી સંસ્કૃતિ નથી, ત્યારબાદ મેં સિંદૂર અને મંગળસૂત્ર પહેરવાનું બંધ કરી દીધું છે.’ મેનકાએ કહ્યું કે, અમે ક્યારેય શાળાઓમાં દેવી-દેવતાઓની પૂજાનો વિરોધ કર્યો નથી પરંતુ તાજેતરમાં એક શાળામાં, જ્યારે બાળકોને ભીલ પ્રદેશનું સમૂહ ગીત ગાવાનું કહેવામાં આવ્યું, ત્યારે ત્રણ શિક્ષકોને સસ્પેન્ડ કરવામાં આવ્યા.