(એજન્સી) તા.૯
કોતવાલી પોલીસ સ્ટેશન વિસ્તારના એક ગામમાં ધોરણ ૯માં અભ્યાસ કરતી ૧૫ વર્ષીય દલિત કિશોરી પર બે શખ્સો દ્વારા કથિત રીતે સામૂહિક બળાત્કાર ગુજારવામાં આવ્યો હતો. આ ઘટના બુધવારે સવારે લગભગ ૧૦ વાગ્યે બની હોવાનું જાણવા મળ્યું છે. કિશોરીના પિતા દ્વારા દાખલ કરવામાં આવેલી ફરિયાદના આધારે, પોલીસે બે આરોપીઓ સામે એફઆઈઆર નોંધી છે અને પૂછપરછ માટે તેમને અટકાયતમાં લીધા છે. ગામની રહેવાસી આ કિશોરી નજીકના ગામની એક શાળામાં ધોરણ ૯માં અભ્યાસ કરે છે. બુધવારે સવારે, તે પશુઓના વાડામાં પશુઓને પાણી પાઈને ઘરે પરત ફરી રહી હતી.પોલીસે જણાવ્યું હતું કે રસ્તામાં તેને ગૌરવ ખડગવંશી અને જસપાલ ખડગવંશી મળ્યા હતા. આ બંને તેને ગૌરવના ઘરે લઈ ગયા હતા, જ્યાં તેના પરિવારના સભ્યો ખેતરમાં ગયા હતા. ફરિયાદ મુજબ, ગૌરવે કિશોરીના હાથ પકડી રાખ્યા હતા અને જસપાલે તેના પર કથિત રીતે બળાત્કાર ગુજાર્યો હતો. ફરિયાદમાં એવો પણ આરોપ છે કે ગૌરવે રૂમ અંદરથી બંધ કરી દીધો હતો. કિશોરીએ બૂમાબૂમ કરી હતી, જેના પગલે ગામના કેટલાક લોકો ત્યાં એકઠા થયા અને તેને બચાવી લીધી. પોલીસે બંને આરોપીઓને અટકાયતમાં લીધા છે અને તેમની પૂછપરછ શરૂ કરી છે. તપાસના ભાગરૂપે કિશોરીને તબીબી તપાસ માટે મોકલવામાં આવી છે. સીઓ પંકજ કુમાર ત્યાગીએ જણાવ્યું હતું કે આરોપીઓ સામે એફઆઈઆર નોંધવામાં આવી છે અને મામલાની તપાસ કરવામાં આવી રહી છે. કિશોરીના પરિવાર અને સમુદાયના સભ્યોએ આ કથિત જાતીય હુમલા અંગે રોષ વ્યક્ત કર્યો હતો. પોલીસે જણાવ્યું હતું કે તપાસ અને તબીબી તપાસના આધારે આગળની કાર્યવાહી કરવામાં આવશે.