લોકસભામાં વિપક્ષના નેતાનું કહેવું છે કે, શિક્ષણ વ્યવસ્થામાં સુધારો કરવાની શરૂઆત એવા લોકોની વાત સાંભળવાથી થાય છે જેઓ દરરોજ નિષ્ફળતાઓનો સામનો કરે છે
(એજન્સી) તા.૧૧
કોંગ્રેસ નેતા રાહુલ ગાંધીએ શુક્રવારે કહ્યું કે, ભારતની શિક્ષણ વ્યવસ્થા તે પેઢીને નિરાશ કરી રહી છે જે તેઓને આગળ લાવવા માટે હતી. તેમણે વિદ્યાર્થીઓ, વાલીઓ અને શિક્ષકોને પૂછ્યું કે તેઓએ આ વ્યવસ્થામાં શા માટે આશા ગુમાવી દીધી છે. લોકસભામાં વિપક્ષના નેતાએ કહ્યું કે, શિક્ષણ વ્યવસ્થામાં સુધારો કરવાની શરૂઆત એવા લોકોની વાત સાંભળવાથી થાય છે જેઓ દરરોજ તેની નિષ્ફળતાઓનો સામનો કરે છે. રાહુલે કહ્યું કે, ભારતની શિક્ષણ વ્યવસ્થા તે પેઢીને જ નિરાશ કરી રહી છે જેને તેણે આગળ લાવવાની હતી. પેપર લીક, તોતિંગ ફી, જર્જરિત માળખાગત સુવિધાઓ… લાખો યુવા ભારતીયો પ્રામાણિકપણે કામ કરે છે, છતાં વ્યવસ્થા તેમને નિરાશ કરે છે. તેમાં સુધારો કરવાની શરૂઆત એવા લોકોની વાત સાંભળવાથી થાય છે જેઓ દરરોજ તેની નિષ્ફળતાઓનો સામનો કરે છે. વિદ્યાર્થીઓ, વાલીઓ, શિક્ષકો, મને જણાવોઃ તમે શિક્ષણ વ્યવસ્થામાં શા માટે આશા ગુમાવી દીધી છે ? રાહુલે વિદ્યાર્થીઓ, વાલીઓ અને શિક્ષકોને તેમણે શેર કરેલી ઓનલાઇન લિંક પર તેમના અનુભવો, પુરાવા અને વિચારો જણાવવા કહ્યું છે. રાહુલે કહ્યું કે, આપણે સાથે મળીને ફરીથી આશા જગાડીશું. કોંગ્રેસના નેતાની આ ટિપ્પણી તેમના ‘છાત્રોં કી ગૂંજ’ કાર્યક્રમની પાંચમી આવૃત્તિ પહેલાં આવી છે, જે ૧૯ સપ્ટેમ્બરે મધ્ય પ્રદેશના ઈન્દોરમાં યોજાશે. તેમણે ભારપૂર્વક કહ્યું છે કે, વ્યવસ્થા બદલવા માટે દેશના દરેક વિદ્યાર્થીનો અવાજ સાંભળવો જરૂરી છે. રાહુલે કોટા, દેહરાદૂન, પ્રયાગરાજ અને પુણેમાં ‘છાત્રોં કી ગૂંજ’ના ચાર કાર્યક્રમો યોજ્યા છે. ૨૨ ઓગસ્ટે પુણેમાં યોજાયેલો છેલ્લો કાર્યક્રમ વિદ્યાર્થિનીઓ માટે હતો.