પેલેસ્ટીન કોલોનાઇઝેશન એન્ડ વોલ રેઝિસ્ટન્સ કમિશને ૨૦૨૩થી અત્યાર સુધીમાં ૯૦૦ આગની ઘટનાઓ નોંધાવી; નાબ્લુસ, રામલ્લાહ અને અલ-બિરેહ ગવર્નરેટમાં ૬૧%થી વધુ કેસો નોંધાયા
(એજન્સી) રામલ્લાહ/ઇસ્તંબુલ, તા.ર૯
ઓક્યુપાઇડ વેસ્ટ બેંકમાં ૨૦૨૩ની શરૂઆતથી પેલેસ્ટીની ઘરો, ઇમારતો અને વાહનોને નિશાન બનાવીને લગાડવામાં આવેલી આગની ઘટનાઓમાંથી લગભગ ૮૯% આગ માટે ઇઝરાયેલી કબ્જેદારો (ઓક્યુપાયર્સ) જવાબદાર હોવાનું પેલેસ્ટીન કોલોનાઇઝેશન એન્ડ વોલ રેઝિસ્ટન્સ કમિશને શુક્રવારે જણાવ્યું છે. કમિશને પોતાના એક અહેવાલમાં સ્પષ્ટ કર્યું છે કે જાન્યુઆરી ૨૦૨૩થી ૧૦ જુલાઈ ૨૦૨૬ વચ્ચે પેલેસ્ટીની મિલકતોને નિશાન બનાવતી આવી કુલ ૯૦૦ આગની ઘટનાઓ દસ્તાવેજીકૃત કરવામાં આવી છે. અહેવાલ અનુસાર, ૯૦૦માંથી ૭૯૯ આગની ઘટનાઓ (એટલે કે ૮૮.૮%) માટે ઇઝરાયેલી કબ્જેદારો સીધી રીતે જવાબદાર હતા, જ્યારે બાકીની ૧૦૧ ઘટનાઓ માટે ઇઝરાયેલી સેનાને જવાબદાર ઠેરવવામાં આવી છે. વર્ષવાર આંકડાઓ પર નજર કરીએ તો, નોંધાયેલી આગની ઘટનાઓની સંખ્યા ૨૦૨૩માં ૨૧૭ હતી જે વધીને ૨૦૨૪માં ૨૬૪ થઈ ગઈ હતી. ત્યારબાદ ૨૦૨૫માં આવી ૩૦૭ ઘટનાઓ બની હતી, જ્યારે ૨૦૨૬ની શરૂઆતથી લઈને ૧૦ જુલાઈ સુધીમાં કમિશને ૧૧૨ આગની ઘટનાઓ નોંધાવી છે. ભૌગોલિક દૃષ્ટિએ આ હુમલાઓથી નાબ્લુસ તેમજ રામલ્લાહ અને અલ-બિરેહ ગવર્નરેટ્સ સૌથી વધુ પ્રભાવિત થયા છે, જ્યાં અનુક્રમે ૨૮૧ અને ૨૭૧ આગની ઘટનાઓ બની હતી. આ બંને વિસ્તારોમાં મળીને કુલ ૫૫૨ બનાવો બન્યા હતા, જે કમિશન દ્વારા નોંધાયેલા કુલ કેસોના લગભગ ૬૧.૩% જેટલા થાય છે. અહેવાલમાં વધુમાં જણાવાયું છે કે આ સમયગાળા દરમિયાન ૧૨૧ પેલેસ્ટીની સમુદાયો પૂર્ણ અથવા આંશિક રીતે વિસ્થાપિત થયા હતા, જેમાં ૪૬ સમુદાયો સંપૂર્ણપણે ખાલી થઈ ગયા હતા. આના કારણે ૩,૦૦૦થી વધુ બાળકો સહિત ૬,૨૦૦થી વધુ પેલેસ્ટાઇનીઓને પોતાના ઘરો છોડીને જવાની ફરજ પડી હતી. કમિશને આ હુમલાઓ માટે ઇઝરાયેલ સરકારના “સાનુકૂળ વાતાવરણ”ને જવાબદાર ગણાવ્યું છે જે કબ્જેદારોને રક્ષણ આપે છે અને શિક્ષામાંથી મુક્તિ અપાવવામાં મદદ કરે છે. ગેરકાયદેસર સેટલમેન્ટ આઉટપોસ્ટ્સ વધુને વધુ આરસોન (આગચંપી), રસ્તાઓ બંધ કરવા તેમજ પેલેસ્ટીનીઓના જમીન અને પાણીના સ્ત્રોતો સુધી પહોંચવા પરના નિયંત્રણો જેવા હુમલાઓના મુખ્ય કેન્દ્રો બની રહ્યા છે.