(એજન્સી) તા.૫
આ અઠવાડિયે જેનિનના વેસ્ટ બેંક શહેરમાં મૃત્યુ પામેલ ૧૬ વર્ષીય પેલેસ્ટીની છોકરીને ઇઝરાયેલી સ્નાઈપર દ્વારા ગોળી મારી દેવામાં આવી હતી કારણ કે તેણીએ તેના ઘરની બારી બહાર જોયું હતું, તેના પિતાએ જણાવ્યું. ઇઝરાયેલી સૈન્યએ જણાવ્યું કે તે મંગળવારે વેસ્ટ બેંકમાં વિવિધ વિસ્તારોમાં સેંકડો સૈનિકો અને સશસ્ત્ર વાહનો સાથે હાથ ધરવામાં આવેલા મોટા ઓપરેશન દરમિયાન લુજૈન ઓસામા મુસ્લેહના મૃત્યુના અહેવાલોની તપાસ કરી રહી છે. ઓસામા મુસ્લેહે જણાવ્યું કે જ્યારે સૈનિકોએ તેની બાજુના ઘરને ઘેરી લીધું હતું ત્યારે તેણે બહાર જોવા માટે પડદો ખોલ્યો ત્યારે તેની પુત્રીને કપાળમાં ગોળી વાગી હતી. તેમણે જણાવ્યું કે ‘તે ધાબા પર ગઈ ન હતી, તેણે પથ્થર ફેંક્યા ન હતા અને તેની પાસે કોઈ હથિયાર ન હોતું. તે ૧૬ વર્ષની હતી. તેણે માત્ર બારી બહાર જોયું અને પોલીસે તેને જોઈ અને તેને ગોળી મારી. એક ગોળી તેના કપાળ પર વાગી.’ વેસ્ટ બેંકના વિવિધ વિસ્તારોમાં એક અઠવાડિયા પહેલા શરૂ થયેલા અભિયાન દરમિયાન ૩૦થી વધુ પેલેસ્ટીની મૃત્યુ પામ્યા છે અને ડઝનેક લોકોની ધરપકડ કરવામાં આવી છે. ઇઝરાયેલી સૈન્યએ જણાવ્યું કે તેણે ઇઝરાયેલી નાગરિકો પર હુમલો કરવાની તૈયારી કરી રહેલા લડાઇ સમૂહનેનિ ષ્ફળ બનાવવા માટે વેસ્ટ બેંકમાં કેટલાક મહિનામાં તેનું સૌથી મોટું ઓપરેશન શરૂ કર્યું છે.
છેલ્લા અઠવાડિયામાં સૈનિકોએ પેલેસ્ટીની લડવૈયાઓ સાથે ગોળીબાર કર્યો છે, ઘરો અને અન્ય ઇમારતોને નુકસાન પહોંચાડ્યું છે અને રસ્તાઓના મોટા ભાગોનો નાશ કર્યો છે. એવું કહેવામાં આવી રહ્યું છે કે ઇમ્પ્રુવાઇઝ્‌ડ એક્સપ્લોઝિવ ડિવાઇસની શોધમાં આ કાર્યવાહી કરવામાં આવી છે. જેનિનના ગવર્નર કમાલ અબુ અલ-રાબે જણાવ્યું કે લગભગ એક વર્ષ પહેલા ગાઝા યુદ્ધ શરૂ થયું ત્યારથી ઇઝરાયેલી સૈનિકોએ જેનિનમાં ૧૨ મોટા હુમલાઓ કર્યા છે. આ સૌથી ગંભીર, સૌથી પીડાદાયક અને દમનકારી છે. તેમણે જણાવ્યું કે ઓપરેશન હવે તેના આઠમા દિવસે શહેર અને નજીકના શરણાર્થી શિબિરના લોકોને ભારે મુશ્કેલીનો સામનો કરવો પડી રહ્યો છે. તે ગીચ વસ્તી ધરાવતો વિસ્તાર છે, જેમાં હજારો લોકો રહે છે જેમના પરિવારો તેમના ઘર છોડીને ભાગી ગયા હતા અથવા ૧૯૪૮ના મધ્યપૂર્વ યુદ્ધ દરમિયાન હાંકી કાઢવામાં આવ્યા હતા. વેસ્ટ બેંકના અન્ય વિસ્તારોમાંથી ખાનગી રીતે સંગઠિત સહાય ટ્રકોએ ખોરાક, પાણી અને શિશુ ફોર્મ્યુલા જેવા ઉત્પાદનોની અછતને દૂર કરવામાં મદદ કરી હતી, પરંતુ ‘મનસ્વી’ નિયંત્રણો ઘણા વિસ્તારોમાં ડિલિવરી અટકાવી રહ્યા હતા. તેમણે જણાવ્યું કે ‘લોકોની સ્થિતિ, ખાસ કરીને ઘેરાયેલા વિસ્તારોમાં ખૂબ જ મુશ્કેલ છે.