ક્રિસ્ટિયાનો રોનાલ્ડોનું વર્લ્ડ કપનું સપનું તૂટ્યું : પોર્ટુગલની હાર બાદ સ્પેનના ટીનએજર લેમિન યામલની ખેલદિલી વાયરલ

નવી દિલ્હી, તા.૭
ફિફા (FIFA) વર્લ્ડ કપ ૨૦૨૬માં સોમવારે રમાયેલી રોમાંચક રાઉન્ડ ઓફ ૧૬ મેચમાં સ્પેન સામે પોર્ટુગલનો ૧-૦થી પરાજય થતાં મહાન ફૂટબોલર ક્રિસ્ટિયાનો રોનાલ્ડોનું વર્લ્ડ કપ જીતવાનું સપનું આખરે હૃદયભંગ સાથે સમાપ્ત થયું છે. આ કારમી હાર બાદ પોર્ટુગલનો કેપ્ટન રોનાલ્ડો મેદાન પર જ ધ્રુસકે-ધ્રુસકે રડી પડ્યો હતો. જોકે, આ મુશ્કેલ ક્ષણોમાં સ્પેનના યુવા સ્ટાર લેમિન યામલે પોતાની જીતની ઉજવણી બાજુ પર મૂકીને પીઢ ફોરવર્ડ રોનાલ્ડોને ગળે લગાવી સાંત્વના આપી હતી. બે પેઢીઓ વચ્ચેના આ ભાવનાત્મક મિલનની તસવીરો અને વીડિયો સોશિયલ મીડિયા પર ભારે વાયરલ થઈ રહ્યા છે. ડલ્લાસ ખાતે રમાયેલી આ હાઈ-વોલ્ટેજ મેચમાં બંને ટીમો વચ્ચે જોરદાર ટક્કર જોવા મળી હતી. પરંતુ ઇન્જરી ટાઇમ (સ્ટોપેજ ટાઇમ)માં સ્પેનના મિકેલ મેરિનોએ શાનદાર વિનિંગ ગોલ ફટકારીને સ્પેનને ક્વાર્ટર ફાઇનલમાં પહોંચાડી દીધું હતું અને પોર્ટુગલની સફરનો અંત આણ્યો હતો. મેચ પૂરી થતાં જ જ્યાં એકતરફ સ્પેનની આખી ટીમ જીતની ખુશીમાં ડૂબેલી હતી, ત્યાં બીજી તરફ બાર્સેલોનાના ૧૮ વર્ષીય યુવા સેન્સેશન લેમિન યામલે ૪૧ વર્ષીય અલ નાસર (Al Nassr) સ્ટાર રોનાલ્ડો પાસે જઈને તેને આશ્વાસન આપ્યું હતું, જે તેની રમતગમતની ભાવના અને આદર દર્શાવે છે. આ મેચ બે પેઢીઓ વચ્ચેની લડાઈ તરીકે જોવામાં આવી રહી હતી. ફૂટબોલ ઇતિહાસમાં સૌથી વધુ ઇન્ટરનેશનલ ગોલ કરનાર રોનાલ્ડોએ આખી ૯૦ મિનિટ મેચ રમી હતી, પરંતુ સ્પેનના મજબૂત ડિફેન્સ સામે તે કોઈ જાદુ કરી શક્યો નહોતો. તેનો એક સર્વશ્રેષ્ઠ પ્રયાસ સ્પેનના ગોલકીપર ઉનાઈ સિમોને આસાનીથી નિષ્ફળ બનાવ્યો હતો. આ હાર સાથે જ રોનાલ્ડોના કરિયરમાં વર્લ્ડ કપ ટ્રોફી ઉમેરવાની છેલ્લી આશા પણ નષ્ટ થઈ ગઈ છે, જોકે તેની કેબિનેટમાં ૨૦૧૬ની યુરોપિયન ચેમ્પિયનશિપ અને ૨૦૧૯ તથા ૨૦૨૫ના નેશન્સ લીગ જેવા મોટા ટાઇટલ સામેલ છે. મેચ બાદ પત્રકારો સાથે વાતચીત કરતી વખતે રોનાલ્ડોએ સ્વીકાર્યું હતું કે આ હાર સ્વીકારવી ખૂબ મુશ્કેલ છે, પરંતુ તે ઇન્ટરનેશનલ ફૂટબોલમાંથી નિવૃત્તિ અંગે ઉતાવળમાં કોઈ નિર્ણય નહીં લે. તેણે પુષ્ટિ કરી કે આ તેનો છેલ્લો વર્લ્ડ કપ હતો. રોનાલ્ડોએ જણાવ્યું હતું કે : “વર્લ્ડ કપમાંથી આ રીતે બહાર થવું ખૂબ દુઃખદ છે. મેં મારું સર્વસ્વ આપ્યું અને હું સ્પષ્ટ અંતરાત્મા સાથે વિદાય લઈ રહ્યો છું. આ મારો છેલ્લો વર્લ્ડ કપ હતો, તે નક્કી છે. હવે હું પરિવાર સાથે સમય વિતાવીશ અને વિચાર કરીશ. ગુસ્સા કે ઉત્સાહમાં આવીને હું કોઈ પણ નિર્ણય લેવા માંગતો નથી.” પોતાની લેગસી (વારસો) વિશે વાત કરતા ૪૧ વર્ષીય સુપરસ્ટારે ગર્વથી કહ્યું, “મેં પોર્ટુગલ માટે ત્રણ મોટા ટાઇટલ જીત્યા છે. ક્રિસ્ટિયાનો રોનાલ્ડો પહેલા પોર્ટુગલે એક પણ મોટી ટ્રોફી જીતી નહોતી. અમારા દેશનું સૌથી મોટું ટાઇટલ ૨૦૧૬માં યુરો કપ હતું, જે મારા માટે વર્લ્ડ કપ જેટલું જ મહત્ત્વનું છે.” આ સાથે જ તેણે વિદાય લઈ રહેલા કોચ રોબર્ટો માર્ટિનેઝનો આભાર માન્યો હતો અને ટીમના પ્રદર્શનને બિરદાવતા કહ્યું હતું કે ફૂટબોલમાં આવું ચાલ્યા કરે છે, હવે આપણે આગળ વધવું પડશે.