ગુરૂગ્રામ કોર્ટે ૨૦૨૧માં એક દલિત મહિલાનું અપહરણ અને હત્યા કરવા બદલ એક પુરૂષને આજીવન કેદની સજા ફટકારી હતી, તેણે અન્ય હત્યાઓની કબૂલાત કરી હતી, મુખ્ય પુરાવાઓમાં તેની રેકોર્ડ કરેલી કબૂલાતનો સમાવેશ થાય છે
(એજન્સી) તા.૨૨
ગુરૂગ્રામની એક કોર્ટે ડિસેમ્બર ૨૦૨૧માં પાંચ હત્યાના આરોપી એક પુરૂષને ૨૦ વર્ષીય દલિત મહિલાના અપહરણ અને હત્યા કરવા બદલ આજીવન કેદની સજા ફટકારી છે. કોર્ટે તેને આ કેસમાં દોષિત ઠેરવ્યો હતો અને ટ્રાયલ પૂર્ણ થયા બાદ સજા ફટકારી હતી. નાયબ જિલ્લા વકીલ રેખા જેએસ જાંગરાના જણાવ્યા અનુસાર, ૭ જાન્યુઆરી, ૨૦૨૨ના રોજ મહિલાની હત્યાના આરોપમાં દોષિત સિંહ રાજની ધરપકડ થયા પછી, તેણે ૨૦૧૯, ૨૦૨૦ અને ૨૦૨૧માં તેના છેડતીના પ્રયાસનો વિરોધ કરવા બદલ ત્રણ વધુ સગીર છોકરીઓની હત્યા કરવાની કબૂલાત કરી હતી. તેમણે જણાવ્યું હતું કે, “હત્યા પછી સિંહે ત્રણેય સગીરોના મૃતદેહ સેક્ટર ૭ નજીક આગ્રા નહેરમાં ફેંકી દીધા હતા. આ કેસોમાં તેની સામે ટ્રાયલ ચાલી રહી છે. તેણે ૧૯૮૭માં તેના કાકા અને પિતરાઈ ભાઈની હત્યા કર્યાની પણ કબૂલાત કરી હતી, પરંતુ તે કેસોમાં પુરાવાના અભાવે તેને નિર્દોષ જાહેર કરવામાં આવ્યો હતો.” પોલીસે જણાવ્યું હતું કે રાજ ૨૦૨૧માં સેક્ટર ૧૬માં એક ખાનગી હોસ્પિટલમાં સુરક્ષા ગાર્ડ તરીકે કામ કરતો હતો જ્યારે તેણે એક દલિત મહિલાનું શોષણ કર્યું હતું. અધિકારીઓએ ઉમેર્યું હતું કે રાજે તેની વિરૂદ્ધ પોલીસ ફરિયાદ નોંધાવવાની ધમકી આપીને પૈસા પડાવવાનો પ્રયાસ કર્યા બાદ તેની હત્યા કરી હોવાની કબૂલાત કરી હતી. જાંગરાએ જણાવ્યું હતું કે તેણે ૩૧ ડિસેમ્બર, ૨૦૨૧ના રોજ મહિલાને સેક્ટર ૧૬માં મળવા કહ્યું હતું, જ્યાં તેણે તેનું ગળું દબાવીને હત્યા કરી હતી. તેમણે જણાવ્યું કે, “ત્યારબાદ તે મૃતદેહને સાયકલ પર કેનાલમાં ફેંકી દેવા માટે લઈ ગયો. ભૂપાનીમાં રહેતા તેના પરિવારે ૨ જાન્યુઆરી, ૨૦૨૨ના રોજ જૂના ફરીદાબાદ પોલીસ સ્ટેશનમાં ગુમ થયાની ફરિયાદ નોંધાવી હતી. જોકે, આ વખતે, લાશ લીલમાં ફસાઈ ગઈ હતી અને ૬ જાન્યુઆરી, ૨૦૨૨ના રોજ પોલીસે તેને શોધી કાઢ્યો હતો.” તપાસકર્તાઓના જણાવ્યા મુજબ, ૫ જાન્યુઆરીના રોજ, રાજે મહિલાના પરિવારને ફોન કર્યો અને તેની હત્યા કર્યાની કબૂલાત કરી હતી. તેના પરિવારે બીજા ફોન પર તેની કબૂલાત રેકોર્ડ કરી હતી અને પોલીસનો સંપર્ક કર્યો હતો. જાંગરાએ જણાવ્યું કે, “હત્યા સમયે મૃતક અને સિંહનું સેલ ટાવર લોકેશન એક જ જગ્યાએ હોવાનું જાણવા મળ્યું હતું. સ્થળ પર તેની કબૂલાતની રેકોર્ડિંગ ૨૯ સાક્ષીઓ સાથે કાર્યવાહી માટે મુખ્ય પુરાવા હતા.” એડિશનલ સેશન્સ જજ પુરૂષોત્તમ કુમારની કોર્ટે ભારતીય દંડ સંહિતાની કલમ ૩૦૨ (હત્યા), ૩૬૪ (હત્યા કરવાના ઇરાદાથી અપહરણ) અને ૨૦૧ (પુરાવા ગાયબ કરવા) તેમજ અનુસૂચિત જાતિ અને અનુસૂચિત જનજાતિ (અત્યાચાર નિવારણ) અધિનિયમની કલમ ૩(૨)(દૃ) હેઠળ દોષિત ઠેરવીને દોષિત સિંહ રાજ પર કુલ રૂા.૨.૧ લાખનો દંડ પણ ફટકાર્યો હતો.
