લંડન, તા.૨૨
હિંદ રજબ ફાઉન્ડેશને સોમવારે જણાવ્યું હતું કે, તેણે ઇટાલીના સત્તાવાળાઓ સમક્ષ એક ઇઝરાયેલી સૈનિક વિરુદ્ધ ફોજદારી ફરિયાદ નોંધાવી છે. સંસ્થાના જણાવ્યા અનુસાર આ સૈનિક હાલમાં ઇટાલીની મુલાકાતે છે અને તેના પર ગાઝા પટ્ટીમાં ઇઝરાયેલની સૈન્ય કાર્યવાહી દરમિયાન આંતરરાષ્ટ્રીય કાયદાના ઉલ્લંઘનમાં સામેલ હોવાનો આરોપ મૂકવામાં આવ્યો છે. બ્રસેલ્સ સ્થિત આ સંસ્થાએ સૈનિકની ઓળખ યોનાતન શાલિખ તરીકે કરી છે અને જણાવ્યું છે કે, તેમની ફરિયાદમાં યુદ્ધ અપરાધો, માનવતા વિરુદ્ધના ગુનાઓ અને નરસંહારની કૃત્યોમાં સંડોવણીનો સમાવેશ થાય છે. સંસ્થાએ તેની વેબસાઇટ પર પ્રકાશિત એક નિવેદનમાં જણાવ્યું હતું કે, ‘હિંદ રજબ ફાઉન્ડેશને ઇટાલીમાં ઇઝરાયેલી સૈનિક યોનાતન શાલિખ વિરુદ્ધ ફોજદારી ફરિયાદ નોંધાવી છે.’ ફાઉન્ડેશનના જણાવ્યા અનુસાર શાલિખ હાલમાં ટસ્કનીમાં રજાઓ ગાળી રહ્યા છે. સંસ્થાએ કહ્યું કે, તેમણે ગાઝામાં કાર્યવાહી દરમિયાન ૪૦૧મી આર્મર્ડ બ્રિગેડના કમાન્ડ હેઠળ કાર્યરત ઇઝરાયેલની ગિવાતી બ્રિગેડની એક કંપની સાથે સેવા આપી હતી. ફરિયાદમાં કરવામાં આવેલા આરોપોમાં એ વાતનો પણ સમાવેશ થાય છે કે, શાલિખ માર્ચ અને એપ્રિલ ૨૦૨૪માં ગાઝા શહેરમાં અલ-શિફા મેડિકલ કોમ્પ્લેક્સની આસપાસની ઇઝરાયેલી સૈન્ય કાર્યવાહીમાં સામેલ હતા, જેમાં તે સ્થળ પર વ્યાપક વિનાશ પણ થયો હતો. ફાઉન્ડેશને એમ પણ કહ્યું હતું કે, શાલિખની ટુકડી ડિસેમ્બર ૨૦૨૩માં ગાઝા શહેરના અલ-નસર વિસ્તારમાં આવેલી અલ-હજ હમદી હરઝલ્લાહ મસ્જિદને સળગાવવાની ઘટનામાં સામેલ હતી.સંસ્થાના જણાવ્યા અનુસાર તે સમયગાળાની તસવીરોમાં સૈનિકોને મકાન સળગી રહ્યું હતું ત્યારે તેની અંદર પોઝ આપતા જોઈ શકાય છે. ફાઉન્ડેશનનું કહેવું છે કે, મસ્જિદ ઇઝરાયેલી સૈન્યના નિયંત્રણ હેઠળ હતી અને તે સમયે પેલેસ્ટીની સશસ્ત્ર જૂથો દ્વારા તેનો ઉપયોગ કરવામાં આવતો ન હતો. તેમણે દલીલ કરી હતી કે, આ ઘટના આંતરરાષ્ટ્રીય માનવતાવાદી કાયદા હેઠળ સુરક્ષિત ધાર્મિક સ્થળ પર ગેરકાયદેસર હુમલો ગણી શકાય છે અને આરોપ મૂક્યો હતો કે, તે ગાઝામાં ધાર્મિક ઇમારતોને અસર કરતા વિનાશની વ્યાપક પેટર્નનો એક ભાગ છે.