સિવિલ ડિફેન્સના જણાવ્યા અનુસાર શનિવારે યમનના હૌથી મિલિશિયા દ્વારા છોડવામાં આવેલી બે બેલેસ્ટિક મિસાઇલોને હવામાં જ તોડી પાડવામાં આવી હતી, જેના અવશેષો સઉદી અરેબિયાના મક્કા અને મદીના ક્ષેત્રોમાં વિવિધ સ્થળોએ પડ્યા હતા
(એજન્સી) રિયાધ, તા.૨૬
શનિવારે પશ્ચિમ સઉદી અરેબિયામાં, પવિત્ર શહેર મક્કાની નજીક સહિત અનેક સ્થળોએ, ઈરાન સમર્થિત યમનના હુથી મિલિશિયા દ્વારા છોડવામાં આવેલી બે બેલેસ્ટિક મિસાઇલોને તોડી પાડ્યા બાદ તેના અવશેષો પડ્યા હતા. સઉદી સિવિલ ડિફેન્સના પ્રવક્તાએ જણાવ્યું હતું કે, મિસાઇલો તેમના લક્ષ્યો તરફ આગળ વધી રહી હતી ત્યારે તેમને હવામાં જ આંતરીને તોડી પાડવામાં આવી હતી. મિસાઇલોના કેટલાક ભાગો ‘વાદી અલ-મુઘમ્માસ’માં પડ્યા, જે ઇસ્લામના સૌથી પવિત્ર સ્થળ – મક્કાની ગ્રાન્ડ મસ્જિદથી માત્ર ૨૦ કિલોમીટર દૂર છે. પ્રવક્તાએ જણાવ્યું કે, મિસાઇલો તોડી પાડ્યા બાદ તેના અવશેષો જેદ્દાહના અલ-નુઝા વિસ્તારમાં, તાઈફના વાદી જલીલમાં અને રાબિઘ ગવર્નોરેટના મસ્તૂરાહમાં પણ પડ્યા હતા. આ નિવેદનમાં કોઈ જાનહાનિ કે નુકસાન અંગેની અન્ય કોઈ વિગતો આપવામાં આવી નથી. યમનની કાયદેસરની સરકારને સમર્થન આપતા ગઠબંધન દળોએ શનિવારે અગાઉ જણાવ્યું હતું કે, તેમણે હૌથી મિલિશિયા દ્વારા સઉદી અરેબિયાની રાજધાની રિયાધ, તાઈફ અને યાનબુ તરફ છોડવામાં આવેલી બેલેસ્ટિક મિસાઇલોને તોડી પાડી હતી. ગઠબંધને શનિવારે વહેલી સવારે એમ પણ જણાવ્યું હતું કે, ‘ઈસ્ટર્ન પ્રોવિન્સ’ (પૂર્વીય પ્રાંત) ઉપર એક ડ્રોનને પણ તોડી પાડવામાં આવ્યું હતું. હૌથીઓએ તાજેતરના અઠવાડિયામાં સઉદી અરેબિયા સામેના હુમલાઓ તીવ્ર બનાવ્યા છે, જેમાં તેઓ એરપોર્ટ, ઊર્જા માળખાકીય સુવિધાઓ અને નાગરિક સ્થળોને નિશાન બનાવી રહ્યા છે. તેમણે મક્કા અને મદીનામાં આવેલા ઇસ્લામના બે સૌથી મહત્વપૂર્ણ સ્થળો તરફ પણ હુમલા કર્યા છે. સઉદી અરેબિયાની ‘કાઉન્સિલ ઓફ સિનિયર સ્કોલર્સ’ (વરિષ્ઠ વિદ્વાનોની પરિષદ)એ ગયા અઠવાડિયે આ હુમલાઓની નિંદા કરતા તેને મુસ્લિમો વિરુદ્ધ આક્રમકતાનું ગંભીર કૃત્ય ગણાવ્યું હતું. ઈરાન સમર્થિત મિલિશિયા દ્વારા કિંગડમ (સઉદી અરેબિયા) વિરુદ્ધનો સૌથી ઘાતક હુમલો ૧૦ ઓક્ટોબરના રોજ થયો હતો, જ્યારે તેમણે રિયાધમાં આવેલા કિંગ ખાલિદ આંતરરાષ્ટ્રીય હવાઈ મથકને નિશાન બનાવ્યું હતું; આ હુમલામાં ૧૩ લોકોનાં મોત થયાં હતાં અને ૩૦૦થી વધુ લોકો ઘાયલ થયા હતા.