(સંવાદદાતા દ્વારા) જામનગર, તા.૨૭
જામનગરના શંકરટેકરી ઉદ્યોગનગરમાં આવેલા એક કારખાનામાં અકસ્માતે આગ ભભૂકી હતી. જામનગરના શંકરટેકરી ઉદ્યોગનગરમાં આવેલા કોમેટ મેટલ ઈન્ડસ્ટ્રીઝ નામના કારખાનામાં ધુમાડાના ગોટેગોટા નીકળવાનું શરૂ થતાં ફાયરબ્રિગેડને જાણ કરવામાં આવી હતી. જાણના પગલે દોડી ગયેલા ફાયરના જવાનો વિનાયક કોલ્ડ સ્ટોરેજ સામે આવેલા આ કારખાના સુધી પહોંચ્યા હતા પરંતુ આ કારખાનું સેલરમાં આવેલું હોય તેમાં પ્રવેશવું મુશ્કેલ બન્યું હતું. આમ, છતાં ફાયરબ્રિગેડે અગ્નિશમનની પૂર્ણ તૈયારીઓ આરંભી બહારના ભાગમાં પાણીનો મારો ચલાવવાનું શરૂ કર્યું હતું. સતત બે ગાડી વડે પાણીનો મારો ચલાવાતા દોઢેક કલાકની જહેમત પછી આગ કાબૂમાં આવી ગઈ હતી. આગના કારણે તે કારખાનામાં પડેલી મશીનરી પૈકીના પચ્ચીસ મશીનો અને ઓફિસનો કેટલોક માલ-સામાન સળગીને ખાખ થઈ ગયો હતો. કારખાનાના માલિક મહિપતભાઈ મોલિયાએ આગ અકસ્માતે લાગી હોવાનું ફાયર બ્રિગેડને જણાવ્યું હતું.
- Tue, November 10, 2026
- Top Stories
- Trending
- Tue, November 10, 2026