અમદાવાદ, તા.૧૧
કોરોનાના કહેર વચ્ચે અમદાવાદ મ્યુનિસિપલ કોર્પોરેશન વારંવાર વિવાદમાં આવી રહ્યું છે. હવે ફરીથી વિવાદમાં સપડાયું હોય તેમ જણાય છે. શ્યામલ ચાર રસ્તા નજીક આવેલી પારેખ્સ હોસ્પિટલમાં ગત સાંજે ૭ જેટલા કોરોના પોઝિટિવ દર્દીઓને સોલા સિવિલ હોસ્પિટલમાં ખસેડવા માટેની જાણ કરતાં જ પરિવારજનોમાં ભારે રોષ ઊભો થયો હતો.
પરિવારજનો આરોપ છે કે, હોસ્પિટલના સત્તાધીશોઓ અમને ફોન કરીને જાણ કરી હતી કે હોસ્પિટલમાં ઓક્સિજનનો જથ્થો ખૂટી ગયો હોવાથી તેમના સગાને અન્ય હોસ્પિટલમાં સારવાર માટે લઇ જવા પડશે. પરિવારજનોનું કહેવું છે કે, હોસ્પિટલમાં ઓક્સિજન પુરતા પ્રમાણમાં આવતો ન હોવાને કારણે તેઓ આ પગલું ભરી રહ્યા છે. આ અંગે હોસ્પિટલના સત્તાધીશો કશું જ કહેવાનું ઇન્કાર કરી રહ્યા છે. બીજી તરફ અમદાવાદ મ્યુનિસિપલ કોર્પોરેશનના અધિકારીનું કહેવું છે કે પારેખ્સ હોસ્પિટલ કોસ્મિક એજન્સી પાસેથી મેડિકલ ઓક્સિજન મેળવે છે. આ એક પ્રાઈવેટ એજન્સી છે. આ એજન્સી હોસ્પિટલને પુરતા પ્રમાણમાં ઓક્સિજનનો જથ્થો પૂરો પાડવા માટે સક્ષમ ન હોવાથી આ દર્દીઓને સોલા સિવિલ હોસ્પિટલમાં ખસેડવાની ફરજ પડી છે. હોસ્પિટલો સાથે કરવામાં આવતા એમઓયુ પ્રમાણે લોજિસ્ટિક સપોર્ટ, દવાઓ, ફૂડ, ઓક્સિજન વગેરે હોસ્પિટલ દ્વારા જ આપવાના થાય છે. છતાં પણ મ્યુનિસિપલ કોર્પોરેશનના અધિકારીઓ સતત આ પરિસ્થિતિનું મોનિટરિંગ કરી રહ્યા છે અને ઓક્સિજનના સપ્લાયર અને પ્રોડ્યુસરના સંપર્કમાં પણ છે. ઓક્સિજનનો જથ્થો પૂરો પાડવા માટે નિર્દેશ આપવામાં આવ્યા હોવાનું અધિકારીએ વધુમાં જણાવ્યું હતું.