હિઝબુલ્લાહે એક નિવેદનમાં જણાવ્યું હતું કે, તેના યોદ્ધાઓએ ગોલાન હાઇટ્સમાં ઇઝરાયેલી સૈન્ય ચોકી પર કાત્યુષા રોકેટ ફાયરિંગ કર્યું હતું જે દક્ષિણ લેબેનોનના ગામો પર ઇઝરાયેલે કરેલા હવાઇ હુમલાના જવાબમાં હતું
(એજન્સી) તેલ અવીવ, તા.૨૮
ઇઝરાયેલે જણાવ્યું હતું કે, દક્ષિણ લેબેનોન પર ઇઝરાયેલે કરેલા હવાઈ હુમલામાં પ્રતિકાર જૂથ હિઝબુલ્લાહ જૂથના ત્રણ સભ્યો માર્યા ગયાના કલાકો પછી ઇઝરાયેલ દ્વારા નિયંત્રિત ગોલાન હાઇટ્સમાં સોકર મેદાન પર રોકેટ હુમલામાં ઓછામાં ઓછા ૧૧ લોકો માર્યા ગયા અને બાળકો સહિત અન્ય ૩૭ લોકો ઘાયલ થયા હતા.
ઇઝરાયેલની રાષ્ટ્રીય એમ્બ્યુલન્સ સેવા મેગેન ડેવિડ એડોમે એક નિવેદનમાં જણાવ્યું હતું કે, ઉત્તરી ગોલાન હાઇટ્સના મજદલ શમ્સ શહેર પર મિસાઇલ પડતાં ૧૧ લોકોનાં મોત થયા છે અને ૩૭ અન્ય ઘાયલ થયા છે. તેમાં ઉમેર્યું હતું કે, ઘાયલોમાંથી ૧૭ની હાલત ગંભીર છે.
તેના ભાગ માટે ઇઝરાયેલી સેનાએ એક નિવેદનમાં જણાવ્યું હતું કે, ઇઝરાયેલી હેલિકોપ્ટર અને સૈન્ય દળો, મેગેન ડેવિડ એડોમના સહયોગથી મજદલ શમ્સમાંથી મૃતકો અને ઘાયલોને બહાર કાઢવા માટે કામ કરી રહ્યા છે. દરમિયાન ઇઝરાયેલની ચેનલ ૧૨એ અહેવાલ આપ્યો છે કે, વડાપ્રધાન બેન્જામિન નેતાન્યાહુ મજદલ શમ્સમાં ઓપરેશનને અનુસરી રહ્યા છે. અગાઉ ઇઝરાયેલી સેનાએ કહ્યું હતું કે, મજદલ શમ્સ પર ડ્રોન નહીં પરંતુ મિસાઇલ છોડવામાં આવી હતી. લેબેનીઝ જૂથ હિઝબુલ્લાહે એક નિવેદનમાં જણાવ્યું હતું, લેબેનોનમાં ઇસ્લામિક પ્રતિકાર કેટલાક દુશ્મન મીડિયા અને મજદલ શમ્સને નિશાન બનાવવા અંગેના વિવિધ મીડિયા પ્લેટફોર્મ દ્વારા કરવામાં આવેલા દાવાઓને સ્પષ્ટપણે નકારે છે. હિઝબુલ્લાહ અને ઇઝરાયેલી દળો વચ્ચે સરહદ પારના હુમલાઓ વચ્ચે લેબેનોનની ઇઝરાયેલ સાથેની સરહદ પર તણાવ વધ્યો છે કારણ કે, તેલ અવીવ ગાઝા પટ્ટી પર તેના ઘાતક આક્રમણને આગળ ધપાવે છે, જેમાં હમાસના હુમલા પછી ગયા ઓકટોબરથી લગભગ ૩૯,૦૦૦ લોકો માર્યા ગયા છે. હિઝબુલ્લાહે કહ્યું કે, તેણે લેબેનોનના એક ગામ પર ઇઝરાયેલી હુમલાનો બદલો લેવા ગોલાન હાઇટ્સમાં લશ્કરી મથક પર હુમલો કર્યો. હિઝબુલ્લાહના મુખ્ય પ્રવક્તા મોહમ્મદ અફીફે મીડિયાને જણાવ્યું હતું કે, જૂથ ‘મજદલ શમ્સ પર હુમલો તેણે કર્યો હોવાનો સ્પષ્ટપણે ઇન્કાર કરે છે.’
ઇઝરાયેલના મુખ્ય પ્રવક્તા રીઅર એડમ, ડેનિયલ હગારીએ પત્રકારોને ભારપૂર્વક જણાવ્યું હતું કે, ‘હિઝબુલ્લાહ જૂઠું બોલી રહ્યું છે.’ તેમણે કહ્યું કે, માર્યા ગયેલા તમામ ૧૦ લોકો ૧૦થી ૨૦ વર્ષની વયના હતા અને અન્ય ૨૦થી વધુ લોકો ઘાયલ થયા હતા.
ઇઝરાયેલી સૈન્યએ એક નિવેદનમાં જણાવ્યું હતું કે, ગુપ્ત માહિતી અનુસાર ‘મજદલ શમ્સ તરફ રોકેટ હુમલો હિઝબુલ્લાહ સંગઠન દ્વારા કરવામાં આવ્યો હતો.’ નિવેદનમાં કહેવામાં આવ્યું છે કે, ‘મજદલ શમ્સના એક સોકર મેદાનમાં રોકેટ હુમલા પાછળ હિઝબુલ્લાહનો હાથ છે, જેના કારણે આજે સાંજે બાળકો સહિત અનેક નાગરિકોની જાનહાનિ થઈ હતી.’ ઇઝરાયેલની મેગેન ડેવિડ એડોમ પેરામેડિક સેવાએ શરૂઆતમાં ૧૧ લોકો ઘાયલ થયાની જાણ કરી હતી, જેમાં નવ ગંભીર રીતે અને તમામની ઉંમર ૧૦થી ૨૦ વર્ષની વચ્ચે હતી. ઇઝરાયેલના મીડિયાએ મજદલ શમ્સ શહેરમાં સોકર ફિલ્ડમાંથી કેટલાકને સ્ટ્રેચર પર એમ્બ્યુલન્સમાં લઈ જવાના ફૂટેજ પ્રસારિત કર્યા હતા.
ઇઝરાયેલી સૈન્યએ જણાવ્યું હતું કે, લેબેનોનથી વિસ્તાર તરફ એક રોકેટ આ તરફ આવી રહ્યું હોવાનું દેખાયું હતું અને ઉમેર્યું હતું કે, તે ઘાયલોને બહાર કાઢવા માટે એમડીએ સાથે સહયોગ કરી રહ્યું છે. મીડિયાએ શહેરની એક ખીણમાં મોટા વિસ્ફોટના ફૂટેજ પ્રસારિત કર્યા. હિઝબુલ્લાહે એક નિવેદનમાં જણાવ્યું હતું કે, તેના લડાકૂઓએ ગોલાન હાઇટ્સમાં ઇઝરાયેલી સૈન્ય ચોકી પર કાત્યુષા રોકેટ ફાયરિંગ કર્યું હતું તે દક્ષિણ લેબેનોનના ગામો પર ઇઝરાયેલના હવાઈ હુમલાના જવાબમાં હતું. જૂથે જણાવ્યું હતું કે, અગાઉ તેના ત્રણ સભ્યોની હત્યા કરવામાં આવી હતી. ઇઝરાયેલી સૈન્યએ જણાવ્યું હતું કે, તેની વાયુસેનાએ કિફાર કિલાના સરહદી ગામ પર હિઝબુલ્લાહ હથિયારોના ડેપોને નિશાન બનાવ્યું હતું. ઇઝરાયેલે ૧૯૬૭ના મધ્યપૂર્વ યુદ્ધ દરમિયાન સીરિયામાંથી ગોલાન હાઇટ્સ પર કબજો મેળવ્યો હતો અને બાદમાં ૧૯૮૧માં તેને કબજે કરી લીધો હતો. ઓકટો. ૭ના રોજ હમાસના આશ્ચર્યજનક હુમલા પછી ગાઝામાં યુદ્ધ શરૂ થયું ત્યારથી ઇઝરાયેલ અને હિઝબુલ્લાહે દરરોજ એકબીજા સામે આગ ઓકી છે અને લગભગ ૧૨૦૦ લોકો માર્યા ગયા છે અને અન્ય ૨૫૦ને બંધક બનાવ્યા છે. ઇઝરાયેલે આક્રમણ શરૂ કર્યું જેમાં અત્યાર સુધીમાં પેલેસ્ટીનના ૩૯,૦૦૦થી વધુ લોકો માર્યા ગયા છે, સ્થાનિક આરોગ્ય અધિકારીઓના જણાવ્યા અનુસાર પ્રદેશના ૮૦%થી વધુ લોકો વિસ્થાપિત થયા છે અને ગાઝા પટ્ટીમાં માનવતાવાદી આપત્તિ સર્જી છે.
છેલ્લા અઠવાડિયામાં લેબેનોન-ઇઝરાયેલના સામસામા ગોળીબારને કારણે ઇઝરાયેલી હવાઈ હુમલાઓ અને હિઝબુલ્લાહ દ્વારા સરહદથી વધુ ઊંડે અને વધુ દૂર પ્રહાર કરીને રોકેટ અને ડ્રોન હુમલાઓ સાથે તીવ્ર બન્યા છે. ઓકટોબરની શરૂઆતથી લેબેનોનમાં ઇઝરાયેલી હવાઈ હુમલામાં ૪૫૦થી વધુ લોકો માર્યા ગયા છે, જેમાં મોટાભાગે હિઝબુલ્લાહના સભ્યો હતા, પરંતુ લગભગ ૯૦ નાગરિકો અને બિન-લડાકૂઓ પણ હતા. ઇઝરાયેલના પક્ષે ૨૧ સૈનિકો અને ૧૩ નાગરિકો માર્યા ગયા હતા.