(સંવાદદાતા દ્વારા) સુરત,તા.૭
સુરત મહાનગરપાલિકાના નગર સેવકો મહાનગરપાલિકાના અધિકારી કર્મચારીઓને ગણકારતા ન હોય તે રીતે વ્યવહાર કરી રહ્યા છે. પુણાગામ વિસ્તારમાં દબાણ હટાવવા ગયેલા મનપાના કર્મચારીઓ પર કોર્પોરેટર સોનલ દેસાઈએ ઉપરા છાપરી તમાચા ઝીંકીં દેતા મામલો તંગ બનાવ્યો હતો.
કોર્પોરેટરની ઉશ્કેરણીથી લારીવાળાઓએ પણ હુમલો કરતાં બે કર્મચારીઓને ઈજા પહોંચતા તેમને સારવાર અર્થે સ્મીમેર હોસ્પિટલમાં ખસેડવામાં આવ્યાં હતાં. કોર્પોરેટર દ્વારા સર્જવામાં આવેલા બખેડાનો વીડિયો વાઈરલ થયો હતો.
પ્રાપ્ત માહિતી અનુસાર પુણા વિસ્તારના યોગી ચોક નજીક મહાલક્ષ્મી માર્કેટ સામે ગજાનંદ સોસાયટી બહાર કિરણ ચોકમાં મનપાના દબાણ ખાતા દ્વારા દબાણ હટાવવાની કામગીરી હાથ ધરવામાં આવી હતી. રોડ પર લારીઓ ઉભી રહેતા ચક્કાજામ સર્જાતો હતો. શાકભાજી વિક્રેતાઓ સામે ફરિયાદો ઉઠી હતી. જેના ભાગરૂપે મનપાના કર્મચારીઓ દબાણ હટાવવા પહોંચ્યા હતાં. મનપાના કર્મચારી પ્રતિક પટેલ તેમજ મહેન્દ્ર પાટીલને દબાણ હટાવતા પહેલ જ ભાજપ મહિલા કોર્પોરેટર સોનલ દેસાઈ ત્યાં પહોચી ગઈ હતી. લારીવાળાઓનું ઉપરાણું લઈને પાલિકાના કર્મચારીઓ સાથે તું તું મે મે કરી તેમને ધક્કે ચડાવ્યા હતા. મહિલા કાઉન્સિલર સોનલ દેસાઈએ કોલર પકડી માર માર્યો હતો. નગર સેવિકાના આ વર્તનના કારણે મનપાનો સ્ટાફ ડઘાઈ ગયો હતો. મહિલા કાઉન્સિલરે માર મારતાં લારીવાળા ઉશ્કેરાયા હતાં. લારીવાળા ગેલમાં આવી જઈને રકઝક દરમિયાન ટોળાએ મનપાના કર્મચારીઓને માથા અને કમરના ભાગે ઈજા પહોંચાડી હતી. જેથી તેમને સારવાર માટે સ્મિમેર હોસ્પિટલ લઈ જવામાં આવ્યાં હતાં. કોર્પોરેટર સોનલ દેસાઈ દ્વારા કરવામાં આવેલા ગેરવર્તનનો વીડિયો પણ વાયરલ થયો હતો. છાશવારે થતા હુમલાને લઈને પાલિકાના કર્મચારીઓમાં ભારે રોષ ફેલાયો છે.