ભીમ આર્મી સ્ટુડન્ટ્‌સ ફેડરેશને છત્રપતિ શાહુજી મહારાજ યુનિવર્સિટીમાં M.Ed.. વિદ્યાર્થિનીની સાથે થયેલા જાતિગત ભેદભાવ અને માનસિક ઉત્પીડન સામે વિરોધ પ્રદર્શન શરૂ કર્યું છે અને યુનિવર્સિટી વહીવટીતંત્ર તેમજ પોલીસ સામે ગંભીર આક્ષેપો કર્યા છે

(એજન્સી) લખનૌ, તા.૧૭
કાનપુર સ્થિત છત્રપતિ શાહુજી મહારાજ યુનિવર્સિટી (CSJMU)ના ‘ડિપાર્ટમેન્ટ ઓફ ટીચર એજ્યુકેશન’માં અભ્યાસ કરતી દલિત M.Ed. વિદ્યાર્થીની (સત્ર ૨૦૨૪-૨૬) પ્રેમા દેવીને ન્યાય અપાવવા માટે ભીમ આર્મી સ્ટુડન્ટ્‌સ ફેડરેશન (BASF)ના નેતૃત્વમાં અને (આઈસા) વિદ્યાર્થી સંગઠનના સમર્થન સાથે વિવિધ વિદ્યાર્થી સંગઠનોએ આંદોલન શરૂ કર્યું છે. વિદ્યાર્થી સંગઠનોના જોડાતા જ પોલીસ તંત્રે સમગ્ર કેમ્પસને છાવણીમાં ફેરવી દીધું હતું, પરંતુ ભીમ આર્મી સ્ટુડન્ટ્‌સ ફેડરેશન પોતાની માગણીઓ પર અડગ રહ્યું અને ઉગ્ર વિરોધ પ્રદર્શન કર્યું. ભીમ આર્મી સ્ટુડન્ટ્‌સ ફેડરેશને યુનિવર્સિટીના કુલપતિને એક વિસ્તૃત આવેદનપત્ર સોંપીને આરોપી શિક્ષકો સામે કડક કાર્યવાહી કરવાની માંગ કરી છે. વિદ્યાર્થી નેતાઓએ યુનિવર્સિટી વહીવટીતંત્ર પર કેમ્પસમાં બની રહેલી જાતિગત ઉત્પીડન અને ભેદભાવની ઘટનાઓને દબાવી દેવાનો આરોપ લગાવ્યો છે. આવેદનપત્ર આપતી વખતે ભીમ આર્મી સ્ટુડન્ટ્‌સ ફેડરેશનના જિલ્લા સંયોજક હેમંત વિદ્યાર્થીએ જણાવ્યું હતું કે, યુનિવર્સિટીમાં આ કોઈ પહેલો કિસ્સો નથી; અગાઉ પણ સંશોધકો અને વિદ્યાર્થીઓ સાથે જાતિગત ભેદભાવ અને વહીવટી બેદરકારીની ઘણી ઘટનાઓ સામે આવી ચૂકી છે. તેમણે આક્ષેપ કર્યો કે, જ્યારે પણ વિદ્યાર્થીઓ પોતાના અધિકારો માટે અવાજ ઉઠાવે છે, ત્યારે વહીવટીતંત્ર સંવેદનશીલતા દાખવવાને બદલે મામલાને દબાવી દેવાનો પ્રયાસ કરે છે. વિરોધ પ્રદર્શન દરમિયાન વિદ્યાર્થી નેતા સચિન ચંદ્રાએ કહ્યું કે, કુલપતિ પ્રેમા દેવીને ન્યાય અપાવવા માટે કોઈ ઉતાવળ કે ગંભીરતા બતાવી રહ્યા નથી. બીજી તરફ અભિષેક કોમરેડે પોતાના સંબોધનમાં જણાવ્યું હતું કે, યુનિવર્સિટીમાં જાતિવાદ વ્યાપક છે અને જો પીડિતાને ન્યાય નહીં મળે, તો આ સ્થળને ‘જંતર-મંતર’ (આંદોલનનું કેન્દ્ર) બનાવી દેવામાં આવશે. સંસ્થાએ કડક ચેતવણી આપી છે કે જો પીડિતા, પ્રેમા દેવીને તાત્કાલિક ન્યાય નહીં મળે, તો આ લડતને યુનિવર્સિટી કેમ્પસથી લઈને સમગ્ર રાજ્ય સ્તરે એક વિશાળ જન આંદોલનમાં ફેરવી દેવામાં આવશે. પીડિતા દ્વારા દાખલ કરવામાં આવેલી ફરિયાદ મુજબ પ્રવેશ પરીક્ષામાં તે તેના વર્ગમાં ચોથા ક્રમે આવી હતી, તેમ છતાં વિભાગના વડા ડૉ.તનુજા ભટ્ટે જાહેરમાં તેને બદનામ કરતા એવો દાવો કર્યો કે, તેણે ‘આજીજી કરીને’ (વિનંતી કરીને) પ્રવેશ મેળવ્યો છે. વિદ્યાર્થીનીનો એવો પણ આરોપ છે કે, શિક્ષક ડૉ.વિમલ સિંહે વર્ગખંડમાં તેની સાથે અપમાનજનક ભાષાનો પ્રયોગ કર્યો હતો. ફરિયાદમાં વધુમાં જણાવાયું છે કે, વિદાય સમારંભ (ફેરવેલ સેરેમની) દરમિયાન તેને જાહેરમાં અપમાનિત કરવામાં આવી હતી, તેની ગરિમાને ઠેસ પહોંચાડે તેવી જાતિસૂચક ટિપ્પણીઓ કરવામાં આવી હતી અને તેનું ભવિષ્ય બરબાદ કરી નાખવાની ધમકીઓ આપવામાં આવી હતી.