National

આ વખતે કર્ણાટકના ધારાસભ્યો માટે કોંગ્રેસ ફરી બેંગલુરૂ રિસોર્ટમાં

(એજન્સી) બેંગલુરૂ, તા. ૧૬
કર્ણાટકમાં સરકાર બનાવવાના જાદૂઇ ૧૧૨ના આંકડા સુધી પહોંચવા માટે ભાજપને ઓછામાં ઓછા ૮ ધારાસભ્યોની જરૂર હોવાથી ભાજપ કોંગ્રેસ અને જનતાદળ (એસ)ના ધારાસભ્યોને પોતાની તરફ ખેંચવાના પ્રયાસો કરી રહ્યો હોવાથી કોંગ્રેસ અને જનતાદળ (એસ) બંને પોતાના ધારાસભ્યોનું રક્ષણ કરવાના પ્રયાસો કરી રહ્યા છે. ગુજરાત પછી હવે કર્ણાટક માટે કોંગ્રેસે તેના ધારાસભ્યોને બેંગલુરૂ નજીક આવેલા ઇગલટન ગોલ્ફ રિસોર્ટમાં લઇ જવાનો નિર્ણય કર્યો છે. કર્ણાટકમાં કોંગ્રેસના નવા ધારાસભ્યો આ ફાઇવ સ્ટાર રિસોર્ટમાં પેડ હોલિડે પર છે. ૧૧૨ના જાદૂઇ આંકડા માટેની ભીષણ રેસમાં પોતાના ધારાસભ્યોને બચાવવા માટે કોંગ્રેસ ભારે ચિંતિત છે. કોંગ્રેસના નવા ચૂંટાયેલા ૭૮ ધારાસભ્યોની બુધવારે સવારે યોજાનારી બેઠક પહેલાં ત્રણ ધારાસભ્યો લાપતા થયા હતા. પક્ષ દ્વારા આ ત્રણ ધારાસભ્યોનો સંપર્ક સાધી શકાયો ન હતો. આખરે પક્ષની બેઠક શરૂ થઇ ત્યારે એક ડઝન ધારાસભ્યોની અનુપસ્થિતિ કોંગ્રેસ માટે ચિંતાજનક હતી. કોંગ્રેસના નેતા ડીકે શિવકુમારે જણાવ્યું કે ભાજપ અમારા ધારાસભ્યોને પોતાની પડખે લઇ જવાના પ્રયાસો કરી રહ્યો છે અને આ બાબત અમે જાણીએ છીએ. દરરોજ ભારે દબાણ છે પરંતુ બંને પક્ષો પાસે જરૂરી સંખ્યા હોવાથી ભાજપ માટે આ આટલું સરળ નથી. તેમ છતાં અમે જરૂરી બધા જ પગલાં ભરી રહ્યા છીએ.