(એજન્સી) ન્યૂયોર્ક, તા.૩૦
૨૬ વર્ષની વયે અમેરિકા જનાર આંધપ્રદેશમાં જન્મેલ એક અસ્પૃશ્ય દ્વારા ભારતમાં જ્ઞાતિ આધારિત ભેદભાવનું હૃદયદ્રાવક અને હૃદયસ્પર્શી વર્ણન આજકાલ અત્રેના પ્રકાશન વર્તુળોમાં જબરદસ્ત ધૂમ મચાવી રહ્યું છે. આઇઆઇટી મદ્રાસની પૂર્વ વિદ્યાર્થિની અને હાલ ન્યૂયોર્ક સબવેમાં કન્ડક્ટર તરીકેે કામ કરતા સુજાતા ગિડલા દ્વારા લિખિત પુસ્તક ‘એન્ડ્સ એમંગ એલિફન્ટ્સ’ પુસ્તકમાં ભારતમાં એક દલિત મહિલા તરીકેના પોતાના ઉછેરની યાદોનો સંચય કરવામાં આવ્યો છે.
ગિડલા ભારતમાં જે રીતે દલિતો ભેદભાવ અને અપમાનોનો સામનો કરી રહ્યા છે તેના અનેક કિસ્સાઓ પોતાના પુસ્તકમાં રજૂ કરે છે. આ પુસ્તકની પ્રસ્તાવનામાં લેખિકા સુજાતા ગિડલા લખે છે કે તેમનો જન્મ તત્કાલિન આંધ્રપ્રદેશના નાના શહેર કાઝીપેટમાં થયો હતો. તેમના માતા-પિતા કોલેજમાં વ્યાખ્યાતા હતા તેમ છતાં તેઓ અસ્પૃશ્ય ગણાતા હતા. પ્રકાશનની વેબસાઇટ પર ઉપલબ્ધ પુસ્તકના અંશોમાં ગિડલા ભારતના અસ્પૃશ્યોની તુલના અમેરિકામાં અશ્વેત વિરૂદ્ધ વંશવાદ સાથે કરે છે.
જેમની વારસાગત ફરજ અન્યોના ખેતરોમાં મજૂરી કરવાની અથવા તો હિંદુ સમાજ જેને ગંદા માને છે તેવા કાર્યો કરવાની છે એવા આ અસ્પૃશ્યોને ગામમાં રહેવા દેવામાં આવતા નથી. તેઓ ગામના સિમાડાની બહાર રહે છે. તેમને મંદિરમાં પણ પ્રવેશ મળતો નથી. એટલું જ નહીં અન્ય જ્ઞાતિઓ દ્વારા ઉપયોગમાં લેવાતા પાણીના સ્ત્રોત નજીક પણ તેમને આવવા દેવામાં આવતા નથી. તેમને સવર્ણ હિંદુની બાજુમાં બેસીને ખાવા દેવા અને તેના વાસણોનો ઉપયોગ કરવા દેવામાં આવતો નથી. આવા હજારો નિયંત્રણો છે.
દરરોજ ભારતીય અખબારોમાં અસ્પૃશ્યો સાથે મારપિટ અથવા સેન્ડલ પહેરવા બદલ કે સાઈકલ ચલાવવા બદલ હત્યા કરવાની ઘટનાઓ પ્રસિદ્ધ થાય છે એવું ગિડલા લખે છે. ન્યૂયોર્ક ટાઇમ્સ સહિત મોટાભાગના અમેરિકન પ્રકાશનોએ આ પુસ્તકની સમિક્ષા કરી છે અને ભારતના સામાજિક તેમજ સાંસ્કૃતિક માળખાની સમજની ગહન ઝાખી પર ટિપ્પણી કરી છે. આ પુસ્તક અમેરિકામાં ફરાર , સ્ટ્રાઉસ અને ગિરોક્સ દ્વારા પ્રસિદ્ધ થયું છેે. જો કે હજુ આ પુસ્તક ભારતની બજારોમાં આવવાનું બાકી છે.
- Mon, November 9, 2026
- Top Stories
- Trending
- Mon, November 9, 2026