(એજન્સી) તા.પ
ભીમા-કોરેગાંવ જાતિ આધારિત રમખાણો અંગે પોલીસ અને સરકાર દ્વારા કરવામાં આવી રહેલા દાવાઓને નકારતાં પૂણે મ્યુનિસિપલ કોર્પોરેશનના ડેપ્યુટી મેયર સિદ્ધાર્થ ધાંડેએ કહ્યું હતું કે સરકાર અને પોલીસ બકવાસ કરી રહી છે. તેઓ જૂઠ્ઠા દાવા કરે છે કે ભીમા-કોરેગાંવ હિંસાને કોઇ નક્સલીઓ સાથે સંબંધ હતા. ધાંડેએ દાવો કર્યો હતો કે ભીમા-કોરેગાંવ રમખાણો પાછળ હિન્દુ સંગઠનો, મનોહર ભીડે અને મિલિંદ એકબોટેએ કાવતરું ઘડ્યું હતું. આ લોકો જ ભીમા-કોરેગાંવ રમખાણો માટે જવાબદાર છે. તેમણે દાવો કર્યો હતો કે રમખાણોની એક રાત પહેલા જ કેરોસીનથી ટેન્કરો ભરીને તૈયાર રાખવામાં આવ્યા હતા. તેમણે કહ્યું હતું કે આ રમખાણો કોઈ ઓચિંતા થયા ન હતા પણ તેમની પહેલાથી જ તૈયારીઓ કરવામાં આવી હતી અને આ તમામ ઘટનાઓ પૂર્વાયોજિત હતી. ધાંડે રિપબ્લિકન પાર્ટી ઓફ ઇન્ડિયા(આરપીઆઇ)ના નેતા છે અને કોલ્હાપુર રેન્જના સ્પેશિયલ ઇન્સ્પેક્ટર ઓફ જનરલ વિશ્વાસ નાનગરે પાટિલ સાથે મુલાકાત કર્યા બાદ આઠવલે ગ્રુપે ભીમા-કોરેગાંવ, વધુ-બરદૂક, સાણસગાંવ અને અન્ય રમખાણ પીડિત ગામડાઓની મુલાકાત લીધી હતી. પાટિલે પોલીસના સહયોગથી એક સમિતિની રચના કરી હતી અને આ સમિતિને એક અહેવાલ રજૂ કરવાની જવાબદારી સોંપી હતી. ધાંડેએ દાવો કર્યો હતો કે અમે પીડિત ગામમાં લોકો સાથે મુલાકાત કરી હતી. તેમની સાથે વાતચીત કરી હતી. તેમણે કહ્યું કે અમે અહીં એલગાર પરિષદ અને રમખાણો વચ્ચેના સંબંધોને ચકાસવાનો પ્રયાસ કર્યો હતો. જોકે તપાસકાર સભ્યોની સમિતિએ નોંધ લીધી હતી કે એલગાર પરિષદમાં જે ભાષણો આપવામાં આવ્યા હતા તેમાં અને અન્ય રમખાણો વચ્ચે કોઇ સામ્યતા નહોતી. તેમની વચ્ચે કોઇ સંબંધો નહોતા. નોંધનીય છે કે આ રમખાણો ૧ જાન્યુઆરીના રોજ થયા હતા.
- Tue, November 10, 2026
- Top Stories
- Trending
- Tue, November 10, 2026