(સંવાદદાતા દ્વારા)
અમદાવાદ, તા.૧
મ્યુનિસિપલ કોર્પોરેશન દ્વારા જમાલપુર વોર્ડમાં વિવિધ ૧૪ રોડ રીસરફેસ કરવા જનરલ બજેટમાંથી મંજૂરી મળ્યા છતાં છેલ્લા એક વર્ષમાં ૧૪માંથી માત્ર પ રોડ જ રીસરફેસ કરવામાં આવ્યા છે. આથી જમાલપુરના મ્યુનિ.કાઉન્સિલર શાહનવાઝ શેખે કલેકટરને રજૂઆત કરતાં કલેકટરે મ્યુનિ.કમિશનરને પત્ર પાઠવી નિયમાનુસાર ઘટતી કાર્યવાહી કરવા વિનંતી કરી છે. જમાલપુર વોર્ડના જમાલપુર દરવાજાથી મુંડા દરવાજા, કાચની મસ્જિદ, આસ્ટોડિયા દરવાજા, પીળી બિલ્ડીંગથી ચૌધરીવાસ, મચ્છીપીર, ખાંડની શેરી, ખાનપુર દરવાજા, ખાનપુર ચકલા, ખાનપુર ભીસ્તીવાડ રોડ, ગન હાઉસથી એર ઈન્ડિયા કોર્નર, દિનબાઈ ટાવરથી જેપી ચોક, રાયખડ ચાર રસ્તાથી હવેલી રોડ, ખાનજહાન દરવાજાથી જમાલપુર દરવાજા સુધીનો રોડ અને રાયખડ કાદરીની ચાલીથી પથ્થરવાલી મસ્જિદ થઈ પેશન્ટ હાઉસ સુધીનો રોડ રીસરફેસ કરવા વર્ષ ર૦૧૭-૧૮ના જનરલ બજેટમાં મંજૂરી આપવામાં આવી હતી. આ અંગે જમાલપુર વોર્ડના મ્યુનિ. કાઉન્સિલર શાહનવાઝ શેખે કલેકટર ડૉ.વિક્રાંત પાંડેને પત્ર પાઠવી રજૂઆત કરી હતી કે મંજૂર થયેલ ૧૪માંથી પાંચ રોડ જ બનાવવામાં આવ્યા છે. બાકીના રોડ ન બનાવાતા શહેરીજનો ખાસ કરીને વાહનચાલકો મુશ્કેલીનો સામનો કરી રહ્યા છે. આ અંગે વારંવાર વોર્ડના આસિસ્ટન્ટ એન્જિનિયરથી મ્યુનિ.કમિશનર સુધી લેખિતમાં રજૂઆત કરવા છતાં આજદિન સુધી આ રોડ બનાવાયા નથી. આ રજૂઆતને ધ્યાને લઈ કલેકટરે ગત તા.ર૬-૭-ર૦૧૮ના રોજ મ્યુનિ.કમિ.ને પત્ર પાઠવી નિયમાનુસાર ઘટતી કાર્યવાહી કરી મ્યુનિ.કાઉન્સિલરને યોગ્ય પ્રત્યુત્તર પાઠવવા વિનંતી કરી છે.
- Tue, November 10, 2026
- Top Stories
- Trending
- Tue, November 10, 2026