અમદાવાદ,તા. ૨૫
શહેરમાં સરખેજ વિસ્તારમાં ધાડપાડુઓની ગેંગે ત્રાટકીને લૂંટ મચાવતાં ભારે ચકચાર મચી ગઇ છે, તો સ્થાનિકોમાં ધાડપાડુઓની દહેશતને પગલે ફફડાટની લાગણી ફેલાઇ ગઇ છે. ગઇકાલે મોડી રાત્રે સરખેજ વિસ્તારમાં આવેલી એકતા હોટલની પાછળના એક ફાર્મમાં ૧૦ જેટલા હથિયારધારી લૂંટારુઓએ ઘરમાં ઘૂસી ગરીબ પરિવારના લોકોને ઢોર માર મારી ઉધાર લાવેલા રોકડા રૂ.એક લાખથી વધુની લૂંટ ચલાવી ફરાર થઇ ગયા હતા. ઘટનાની જાણ થતાં જ સરખેજ પોલીસને થતાં ઉચ્ચ પોલીસ અધિકારીઓ સહિતનો કાફલો ઘટનાસ્થળે પહોંચી ગયો હતો અને વધુ તપાસ હાથ ધરી હતી. સરખેજ પોલીસે ૧૦ અજાણ્યા શખ્સ વિરુદ્ધ ધાડનો ગુનો નોંધી તેમની શોધખોળ શરૂ કરી છે. આ અંગે પ્રાપ્ત માહિતી મુજબ, સરખેજ વિસ્તારમાં આવેલા શ્રીનાથ કોલ્ડ સ્ટોરેજની બાજુમાં ગુલાબભાઇ ભરવાડનું ફાર્મ આવેલું છે. આ ફાર્મમાં સુરતારામ ઉર્ફે ભૂટોસિંગ સિસોદિયા (ઉં.વ.૪પ) તેના પરિવાર સાથે રહે છે. સુરતારામ મજૂરીકામ કરી પોતાનું ગુજરાન ચલાવે છે. ગઇકાલે રાત્રે મજૂરીકામથી આવી પરિવાર જમી-પરવારીને સૂઇ ગયો હતો. દરમ્યાન મોડી રાતના ૧૦ જેટલા પેન્ટ-શર્ટમાં સજ્જ હથિયારો સાથે યુવકો ઘરમાં ધસી આવ્યા હતા. હથિયારધારી લૂંટારૂઓએ સુરતારામને માથામાં લાકડી મારીને માર માર્યો હતો. લૂંટારુઓએ ઘરનાં અન્ય પરિવારજનો પર પથ્થરમારો કર્યો હતો. લૂંટારુઓએ ઘરમાં રહેલા રોકડા રૂ.એક લાખની લૂંટ ચલાવી હતી. થોડા દિવસ પહેલાં જ સુરતારામ એક લાખ રૂપિયા ઉધાર લાવ્યો હતો. ૨૭મીના રોજ રાજસ્થાન ખાતે સત્સંગ હોઈ પરિવાર સત્સંગમાં જવાનો હોવાથી રૂપિયા ઉધાર લાવ્યા હતા. લૂંટ કરી લૂંટારાઓ ત્યાંથી નાસી ગયા હતા. ઇજાગ્રસ્ત સુરતારામને સારવારઅર્થે હોસ્પિટલમાં ખસેડવામાં આવ્યો હતો. ઘટના અંગે પોલીસને જાણ કરાતાં સરખેજ પોલીસ, એસીપી, ડીસીપી સહિતનો પોલીસ કાફલો ઘટનાસ્થળે દોડી આવ્યો હતો અને સમગ્ર મામલાની ગંભીરતા ધ્યાને લઇ તપાસ હાથ ધરી હતી. શહેરમાં ફરી એક વાર ધાડપાડુ ગેંગ સક્રિય બનતાં પોલીસ તંત્ર દોડતુ થઇ ગયુ હતું, તો બીજીબાજુ, સ્થાનિકોમાં પણ ભારે ડર અને ફફડાટની લાગણી ફેલાઇ ગઇ હતી.
- Tue, September 22, 2026
- Top Stories
- Trending
- Tue, September 22, 2026