Ahmedabad

સ્માર્ટસિટી સાથેના મ્યુનિ. કોર્પોરેશનના પ્રોજેક્ટ ૧પ મહિના પછી પણ અધૂરા !!

અમદાવાદ, તા.૨૯
ગત વર્ષે ૨૫મી જૂનના રોજ અમદાવાદ શહેર સાથે સંકળાયેલા સ્માર્ટ સિટી સાથેના વિવિધ પ્રોજેકટોની મ્યુનિસિપલ કોર્પોરેશન દ્વારા જાહેરાત કરવામાં આવી હતી. જે આજે ૧૫ મહીનાના સમય પછી પણ હજુ પાઈપલાઈનમાં જ છે.જે પ્રોજેકટોની જાહેરાત કરવામાં આવી હતી તેમાં ઓનલાઈન જન્મ કે મરણના સર્ટીફિકેટ,ઈ-રીક્ષા,ઈ-ટેકસી સહીતના પ્રોજેકટોનો સમાવેશ થાય છે.આ અંગે પ્રાપ્ત થતી વિગતો મુજબ,ગત ૨૫મી જૂન-૨૦૧૬ના રોજ અમદાવાદ શહેરમાં સ્માર્ટસિટી પ્રોજેકટ હેઠળ શહેરમાં ઈ-રીક્ષા અને ઈ-ટેકસી પ્રોજેકટની જાહેરાત કરવામાં આવી હતી.જે મુજબ શહેરમાં કાલુપુર રેલવે સ્ટેશનથી લઈને શિવરંજની અને હેલ્મેટ સર્કલ સહીતના વિવિધ વીસ જેટલા સ્થળોએથી શહેરીજનોને આ રીક્ષા કે ટેકસીની સર્વિસ મળી રહે તે માટેની વ્યવસ્થા કરવામાં આવશે એ પ્રકારની જાહેરાત તંત્ર તરફથી કરવામાં આવી હતી.આજે પરિસ્થિતિ એ છે ૧૫ મહીનાનો સમય પસાર થઈ જવા છતાં હજુ સુધી આ આયોજન માત્ર કાગળ ઉપર જ જોવા મળી રહ્યું છે.આ ઉપરાંત શહેરીજનોને મ્યુનિસિપલ વહીવટીતંત્ર તરફથી એક કોમન પેમેન્ટ કાર્ડ ઈશ્યૂ કરવામાં આવનાર હતા.આ કાર્ડ માટે કોઈ મિનીમમ બેલેન્સની જોગવાઈ રાખવામાં આવી ન હતી.પરંતુ આ એક જ કાર્ડની મદદથી અમદાવાદનો નાગરિક તેનો મિલ્કતવેરો પણ ભરી શકવાનો હતો,ઈલેકટ્રીક બીલ પણ અને સાથે જ આ કાર્ડની મદદથી તે એએમટીએસ કે બીઆરટીએસમાં પણ મુસાફરી કરી શકવાનો હતો.આ કોમન પેમેન્ટકાર્ડ માટે હજુ સુધી સોફટવેર પણ તૈયાર ન હોવાનું મ્યુનિસિપલ કોર્પોરેશનના ઈ-ગવર્નન્સ પ્રોજેકટ સાથે સંકળાયેલા સૂત્રોએ જણાવ્યું છે.બીજી તરફ શહેરીજનોને ઓનલાઈન એપ્લીકેશન કરવાની સાથે જ જન્મ કે મરણ અંગેના સર્ટીફિકેટ આપવાની યોજનામાં હજુ સુધી માત્ર શહેરની ૨૭૦ જેટલી હોસ્પિટલોને જ સાંકળવાની કામગીરી પુરી કરવામાં આવી છે.તો કુરીયરથી સર્ટીફિકેટ પહોંચાડવા માટે હજુ સુધી માત્ર ડમી ડેમોન્સ્ટ્રેશન જ કરાયુ છે.આમ મોટા ઉપાડે જાહેર કરવામાં આવેલા આ પ્રોજેકટ કયારે પુરા થશે તે અંગે મ્યુનિ.માં કોઈ ખોંખારીને કહી શકતું નથી.