ઈર્બિલ એરપોર્ટ નજીક ડ્રોન તૂટી પડ્યા બાદ કામગીરી પુનઃ શરૂ, જોર્ડનમાં આવેલા યુએસ એરબેઝ પર ઈરાનનો હુમલો; બહરીન અને કુવૈતમાં ઈરાની મિસાઈલો ઈન્ટરસેપ્ટ કરાઈ

(એજન્સી) તા.૨૪
ઈર્બિલ શહેર પર થયેલા ડ્રોન હુમલા દરમિયાન ઈર્બિલ ઈન્ટરનેશનલ એરપોર્ટ નજીક એક ડ્રોન ક્રેશ થતાં એરપોર્ટ સેવાઓ પ્રભાવિત થઈ હતી, પરંતુ બાદમાં એરપોર્ટને પુનઃ શરૂ કરી દેવામાં આવ્યું છે. બીજી તરફ, ઈરાની સેનાએ દાવો કર્યો છે કે તેણે જોર્ડનમાં આવેલા ‘અલ-અઝરક’ યુએસ એરબેઝ પર હુમલો કર્યો છે. આ સિવાય, બહરીન અને કુવૈત બંને દેશોએ ઈરાની મિસાઈલોને હવામાં જ નિષ્ફળ બનાવી હોવાની જાહેરાત કરી છે, જેના પગલે બહરીનમાં એલાર્મ વાગ્યા હતા. યુએસ સેન્ટ્રલ કમાન્ડે માહિતી આપી છે કે તેમણે સતત ૧૩મી રાત્રે ઈરાન સામે હવાઈ હુમલા પૂર્ણ કર્યા છે. ઈરાની મીડિયાના અહેવાલો અનુસાર ખુર્રમાબાદ, જસ્ક, અહવાઝ, બંદર અબ્બાસ તેમજ કેશ્મ આઈલેન્ડ સહિતના અનેક શહેરોમાં મોટો વિસ્ફોટ થવાના અહેવાલો મળ્યા છે. અહવાઝમાં થયેલા અમેરિકી હુમલામાં ૪ લોકોના મોત થયા છે. બહરીનના સંરક્ષણ દળોએ સત્તાવાર રીતે જણાવ્યું છે કે તેમની એર ડિફેન્સ સિસ્ટમે ઈરાન તરફથી થયેલા અનેક હવાઈ હુમલાઓને સફળતાપૂર્વક નિષ્ફળ બનાવ્યા છે. સોશિયલ મીડિયા પર શેર કરવામાં આવેલા એક સંદેશમાં, બહરીન આર્મીએ તમામ નાગરિકોને સાવચેતી રાખવા અને હુમલાના કાટમાળ કે શંકાસ્પદ વસ્તુઓથી દૂર રહેવાની સૂચના આપી છે. સેનાએ ઉમેર્યું હતું કે ઈરાન દ્વારા નાગરિકો અને ખાનગી મિલકતોને લક્ષ્ય બનાવવા માટે મિસાઈલ અને ડ્રોનનો ઉપયોગ આંતરરાષ્ટ્રીય માનવાધિકાર કાયદાનું ભારે ઉલ્લંઘન છે. બીજી તરફ, કબ્જા હેઠળના વેસ્ટ બેંકમાં ઈઝરાયેલી સેના અને સેટલર્સ (વસાહતીઓ)ની હિંસક પ્રવૃત્તિઓ સતત વધી રહી છે : હુમલા અને ગોળીબાર : કાલકિલ્યાના પૂર્વમાં આવેલા ફાર’આતા ગામ પર સેટલર્સના હુમલા દરમિયાન એક પેલેસ્ટીની નાગરિકને છાતીમાં ગોળી વાગતા તેની હાલત ગંભીર છે. આ સિવાય નાબ્લુસના દક્ષિણમાં આવેલ તાલ ગામમાં સેટલર્સે કરેલા ગોળીબારમાં ચાર પેલેસ્ટાઈનીઓ અને એક ઈઝરાયેલી સેટલરનું મોત થયું છે. સુરક્ષા દળોનું નેટવર્કઃ ઘટનાની ગંભીરતાને ધ્યાનમાં રાખીને ઈઝરાયેલી સૈન્યએ કમાન્ડો બ્રિગેડ, નાહલ બ્રિગેડ અને પેરાટ્રૂપર્સ બ્રિગેડની કંપનીઓને તૈનાત કરી છે અને વધુ ૫ વધારાની સૈન્ય ટુકડીઓ મોકલવાનો નિર્ણય લીધો છે. મિલકતોને નુકસાન : જીત ગામ અને ખિરબેટ ઈમરેહામાં સેટલર્સે ઘરો પર પથ્થરમારો કર્યો, પેપર સ્પ્રે છાંટ્યો અને વાહનો તેમજ મિલકતો સળગાવવાનો પ્રયાસ કર્યો હતો. આ દરમિયાન ઈઝરાયેલી દળોએ ટીયર ગૅસના સેલ છોડ્યા હતા જેનાથી સ્થાનિકોને શ્વાસ લેવામાં તકલીફ પડી હતી. હિંસાનો આંકડો : જેરીકો નજીક કાર બગડી જતાં રોકાયેલા એક પેલેસ્ટીની ડ્રાઈવર પર પણ સેટલર્સે હુમલો કરી પીઠમાં છરી મારી હતી. પેલેસ્ટીન આરોગ્ય મંત્રાલયના રિપોર્ટ અનુસાર, જાન્યુઆરીથી અત્યાર સુધીમાં વેસ્ટ બેંકમાં ૮૭ પેલેસ્ટીનીઓ માર્યા ગયા છે, જેમાંથી ૨૧ લોકોને સેટલર્સે ગોળી મારી હતી.