કમરડાંગા સાર્વજનિક દુર્ગોત્સવ સમિતિના સભ્યોએ ThePrintને જણાવ્યું કે, તેઓ મરીચઝાપી હત્યાકાંડને વિસ્મૃતિના અંધકારમાંથી બહાર લાવવાનો પ્રયાસ કરી રહ્યા છે
(એજન્સી) તા.૨૦
૧૯૭૮-૭૯ દરમિયાન સુંદરવનના એક દૂરના ટાપુ પર દલિત શરણાર્થીઓ સાથે થયેલો અને હવે લગભગ ભુલાઈ ગયેલો એ હત્યાકાંડ, કોલકાતાના એન્ટાલી વિસ્તારમાં આવેલી ‘કમરડાંગા સાર્વજનિક દુર્ગોત્સવ સમિતિ’ના દુર્ગા પૂજા પંડાલની મુખ્ય થીમ બન્યો છે. આ આયોજન સમિતિ દ્વારા તૈયાર કરવામાં આવેલી ‘વામ બોધ’ (ડાબેરી વિચારધારાના ઉન્મૂલન) નામની વ્યાપક થીમનો એક ભાગ છે. ૧૦૭ વર્ષ જૂની ‘કમરડાંગા સાધારણ દુર્ગોત્સવ સમિતિ’ના પ્રમુખ સૂરજ કુમાર સિંહે ‘ધ પ્રિન્ટ’ને કહ્યું, ‘આ વર્ષે અમે ‘સનાતન હિન્દુ રાષ્ટ્ર’ની સ્થાપનાના સ્વપ્ન સાથે દુર્ગા પૂજાનું આયોજન કરી રહ્યા છીએ.’ તેમણે વધુમાં કહ્યું કે, ભારતની આઝાદી પહેલાં અને પછી બંગાળી હિન્દુઓએ જે ઐતિહાસિક સંઘર્ષો કર્યા છે, તે નવી પેઢી માટે જાણવા ખૂબ જરૂરી છે. ‘આઝાદ ભારતમાં બંગાળી દલિતોનો સૌથી મોટો હત્યાકાંડ એ જ રાજકીય પક્ષ દ્વારા કરવામાં આવ્યો હતો, જે પક્ષ તેમના અધિકારો માટે લડવાનો દાવો કરે છે.’ ૧૯૭૮માં તત્કાલીન પૂર્વ પાકિસ્તાન (હાલનું બાંગ્લાદેશ)થી આવેલા લગભગ એક લાખ દલિત શરણાર્થીઓ સુંદરવનના ‘મરીચઝાપી’ નામના એક નાના ટાપુ પર એકઠા થયા હતા. તેઓ ત્યાં પોતાનું એક અલગ ગામ વસાવવાની આશા રાખતા હતા. આ શરણાર્થીઓ દંડકારણ્ય વિસ્તારમાંથી મરીચઝાપી આવ્યા હતા. આ વિસ્તાર મધ્યપ્રદેશ, ઓરિસ્સા, મહારાષ્ટ્ર અને આંધ્રપ્રદેશ રાજ્યોમાં ફેલાયેલો છે. ૧૯૫૬ની શરૂઆતમાં, ભારત સરકારે પૂર્વ પાકિસ્તાનથી આવેલા હિન્દુ શરણાર્થીઓ માટેની ‘દંડકારણ્ય પુનર્વસન યોજના’ હેઠળ તેમને ત્યાં મોકલ્યા હતા.