પોલીસે જણાવ્યું હતું કે, ૨૨ વર્ષીય અનુસૂચિત જાતિના યુવકે પોલીસમાં ફરિયાદ નોંધાવી છે કે ચાંદખેડામાં કેટલાક માણસોએ તેના અને તેના મિત્ર પર હુમલો કર્યો, જાતિગત અપશબ્દો બોલ્યા અને પીછો કર્યો હતો, જેમણે બાદમાં તેના સ્કૂટરમાં તોડફોડ કરી અને આગ ચાંપી દીધી હતી

(એજન્સી) તા.૧૦
૮ જાન્યુઆરીના રોજ નોંધાયેલા પ્રથમ માહિતી અહેવાલ (FIR) મુજબ, ચાંદખેડાના રહેવાસી કિર્તનભાઈ મનીષભાઈ વડનાગરાએ આરોપ લગાવ્યો કે આ ઘટના ૫ જાન્યુઆરીના રોજ સાંજે કે બી રોયલ હોમ્સ નજીક બની હતી. કિર્તનભાઈએ જણાવ્યું હતું કે તેઓ તેમના મિત્ર વેદાંત પ્રદીપભાઈ વર્મા સાથે તેમના એક્ટિવા સ્કૂટર પર મુસાફરી કરી રહ્યા હતા, ત્યારે મંથન ઠાકોર અને સિદ્ધરાજ ઠાકોરે તેમને હાઉસિંગ સોસાયટીના ગેટ પાસે રોક્યા હતા. આરોપીઓએ કથિત રીતે કિર્તનભાઈની વેદાંત વર્મા અને અન્ય મિત્ર કાવ્યા ઉર્ફે સી કે ચૌહાણ સાથેની મિત્રતા સામે વાંધો ઉઠાવ્યો હતો અને તેમની જાતિનો ઉલ્લેખ કરીને અપશબ્દો બોલ્યા હતા અને અપમાનજનક ટિપ્પણીઓ કરી હતી. FIRમાં જણાવાયું છે કે બંને માણસોએ કથિત રીતે કીર્તનભાઈ અને વેદાંત પર લાકડાના દંડા વડે હુમલો કર્યો હતો. થોડીવાર પછી, કિશુ ઠાકોર અને અમિત ઠાકોર સહિત અન્ય કેટલાક લોકો, લગભગ પાંચ અજાણ્યા યુવાનો સાથે, છરીઓ, લોખંડના પાઈપો અને લાકડીઓ લઈને સ્થળ પર પહોંચ્યા હતા. જીવ બચાવવાના ડરથી, કીર્તનભાઈ અને તેનો મિત્ર ઘટનાસ્થળેથી ભાગી ગયા હતા. ફરિયાદમાં જણાવાયું છે કે, “જ્યારે તેમણે દૂરથી પાછળ જોયું, ત્યારે તેઓએ જોયું કે એક જૂથ લોખંડના પાઈપો અને લાકડાના પાઈપોથી સ્કૂટરને તોડફોડ કરી રહ્યું હતું અને પછી તેને આગ લગાવી દીધી હતી”. સ્કૂટર સંપૂર્ણપણે બળીને ખાખ થઈ ગયું હતું, જેના કારણે અંદાજે ૮૦,૦૦૦ રૂપિયાનું નુકસાન થયું હોવાનો ફરિયાદીએ આરોપ લગાવ્યો હતો. કીર્તનભાઈએ પોલીસને વધુમાં જણાવ્યું હતું કે ઠાકોર સમુદાયના એક યુવકની હત્યા બાદ વિસ્તારમાં તણાવ ચાલી રહ્યો હતો અને તેમને અગાઉ કેટલાક મિત્રો સાથે સંબંધ ન રાખવાની ચેતવણી આપવામાં આવી હતી. તેમણે બીજા દિવસે તેની માતાને ઘટના વિશે જાણ કરી, જેના પગલે ફરિયાદ દાખલ કરવામાં આવી હતી. પોલીસે જણાવ્યું હતું કે ભારતીય ન્યાય સંહિતા (BNS)ની સંબંધિત કલમો, રમખાણો, ગુનાહિત ધાકધમકી, આગ દ્વારા દુષ્કર્મ અને અનુસૂચિત જાતિ અને અનુસૂચિત જનજાતિ (અત્યાચાર નિવારણ) અધિનિયમની કલમો હેઠળ FIR નોંધવામાં આવી છે. એક વરિષ્ઠ પોલીસ અધિકારીએ જણાવ્યું હતું કે, ‘ઝીણવટપૂર્વક તપાસ ચાલી રહી છે અને સંડોવાયેલા તમામ લોકોને ઓળખવા અને પકડવાના પ્રયાસો ચાલુ છે’.