(એજન્સી) તા.૧૩
નવ મહિનાના કિનાન અહેમદ રકીક – જેના નામનો અર્થ “આશ્રય” થાય છે – તેનું ખાન યુનિસમાં તેના વિસ્થાપિત પરિવારના તંબુમાં ઠંડીથી થીજી જઈને મૃત્યુ થયું છે. આ ઘટના એવા સમયે બની છે જ્યારે ઈઝરાયેલ ગાઝામાં શિયાળાની જરૂરી સામગ્રીના પ્રવેશ પર સતત પ્રતિબંધો લાદી રહ્યું છે. તેનું નામ કિનાન હતું. અરબી ભાષામાં ’કિનાન’નો અર્થ થાય છે “આશ્રય”, “રક્ષણાત્મક આવરણ”, “ઢાંકણ” અથવા “સુરક્ષિત છુપાયેલું સ્થાન”. ખાન યુનિસમાં, જ્યાં તેનો વિસ્થાપિત પરિવાર તંબુમાં રહેતો હતો, ત્યાં નવ મહિનાના કિનાન અહેમદ રકીકનું ઠંડીને કારણે મૃત્યુ થયું. તેના પિતા અને એક ડૉક્ટરે આ માહિતી આપી છે. આ દરમિયાન, યુદ્ધગ્રસ્ત ગાઝામાં ઈઝરાયેલ દ્વારા શિયાળાની સામગ્રીના પ્રવેશ પર કડક પ્રતિબંધો ચાલુ છે. ગુરુવારે એએફપી સમાચાર એજન્સી સાથે વાત કરતા એક ડૉક્ટરે (જેમણે નામ જાહેર ન કરવાની શરતે વાત કરી) જણાવ્યું કે, કિનાનનું મૃત્યુ “હાઈપોથર્મિયા” (અતિશય ઠંડીને કારણે શરીરનું તાપમાન ઘટી જવું)ને કારણે થયું હતું. તેના પિતા, અહેમદ રકીકે એએફપીને જણાવ્યું કે રાત્રિ દરમિયાન ગાઝામાં તાપમાન ખૂબ ઘટી ગયું હતું, જેના કારણે તેમના પુત્રનું મૃત્યુ થયું. તેમણે કહ્યું, “હું જાગ્યો ત્યારે જોયું કે તેના શરીરની ચામડી વાદળી પડી ગઈ હતી. હું તેને તાત્કાલિક નાસર હોસ્પિટલ લઈ ગયો, પરંતુ ત્યાં સુધીમાં તો તેનું હાઈપોથર્મિયાને કારણે મૃત્યુ થઈ ચૂક્યું હતું; તે ઠંડીથી થીજી ગયો હતો.” હોસ્પિટલની બહાર ઊભેલા અહેમદના ચહેરા પર સૂકાઈ ગયેલા આંસુ હતા અને તેમણે પોતાના બાળકને સફેદ ચાદરમાં વીંટાળીને પકડી રાખ્યું હતું. તેમણે કહ્યું, “હું સંપૂર્ણ આઘાતમાં છું. મેં જોયું કે મારા હાથમાં મારો પુત્ર હતો, જે કફનમાં વીંટળાયેલો હતો.” જે બાળકનું નામ જ “આવરણ” કે “રક્ષણ” સૂચવતું હતું, તેને અંતે માત્ર એક જ આવરણ મળ્યુંઃ કફનનું સફેદ કપડું. જે બાળકના નામનો અર્થ “સુરક્ષિત છુપાયેલું સ્થાન” થાય છે, તેને તે તંબુમાં ક્યાંય સુરક્ષા ન મળી, જેને તેનો પરિવાર ઘર માનવા મજબૂર બન્યો હતો. પેલેસ્ટીન ન્યૂઝ નેટવર્ક ’અલ-કુદ્‌સ’ના અહેવાલ મુજબ, ગાઝાના સિવિલ ડિફેન્સના પ્રવક્તા મહમૂદ બસલે પુષ્ટિ કરી છે કે અતિશય ઠંડીના સંપર્કમાં આવવાને કારણે આ શિશુનું મૃત્યુ થયું છે.કિનનનું મૃત્યુ ત્યારે થયું જ્યારે યુનાઇટેડ કિંગડમ, કતાર અને જોર્ડન ૫૦થી વધુ દેશો અને સંગઠનોના ગઠબંધનના નેતૃત્વમાં ઇઝરાયેલને ગાઝામાં આશ્રય, બળતણ, પાણી, સ્વચ્છતા અને આરોગ્ય માટે મહત્વપૂર્ણ વસ્તુઓના તાત્કાલિક પ્રવેશને મંજૂરી આપવા હાકલ કરી રહ્યા હતા. શિયાળાના આગમન સાથે, જૂથે ચેતવણી આપી હતી કે “ગાઝામાં ઘણા બધા લોકો હજુ પણ પર્યાપ્ત આશ્રય વિના છે, અને હાયપોથર્મિયા, શ્વસન ચેપ, પાણીજન્ય રોગો અને અન્ય અટકાવી શકાય તેવી બીમારીઓનો ભોગ બનવાનું જોખમ ધરાવે છે.”યુનાઇટેડ સ્ટેટ્‌સની આગેવાની હેઠળના બોર્ડ ઓફ પીસ અને યુનાઇટેડ નેશન્સના માનવતાવાદી વડા ટોમ ફ્લેચર દ્વારા ઇઝરાયેલના પ્રતિબંધોની તાજેતરની ટીકામાં આ નિવેદનનો સમાવેશ થાય છે.