આરોપી ઉસ્માન આ છોકરીને લલચાવીને પોતાની કારમાં લઈ ગયો હતો અને આ જઘન્ય ગુનો કર્યો હોવાનું કહેવાય છે

(એજન્સી)                             નૈનીતાલ, તા.૧
ઉત્તરાખંડના નૈનીતાલમાં ૬૦ વર્ષીય વૃદ્ધ દ્વારા ૧૨ વર્ષની છોકરી પર બળાત્કાર થયા બાદ કોમી તણાવ ફાટી નીકળ્યો હતો, જેના કારણે વિરોધ પ્રદર્શનો અને અનેક સ્થાનોએ તોડફોડ થઈ હતી. પોલીસના જણાવ્યા અનુસાર, આ ઘટના ૧૨ એપ્રિલના રોજ બની હતી. કોન્ટ્રાક્ટર તરીકે કામ કરતા આરોપી ઉસ્માન, છોકરીને લલચાવીને પોતાની કારમાં લઈ ગયો અને આ ગુનો કર્યો હોવાનું કહેવાય છે. ૩૦ એપ્રિલના રોજ, તેની માતાએ પોલીસ ફરિયાદ નોંધાવી, અને ઉસ્માનની જાતીય ગુનાઓથી બાળકોના રક્ષણ (POCSO) કાયદા હેઠળ ધરપકડ કરવામાં આવી છે. જો કે, આ સમાચાર આગની જેમ ફેલાઈ ગયા, જેના કારણે નૈનીતાલમાં કોમી તણાવ ફેલાયો. હિન્દુત્વવાદી સંગઠનોના સભ્યોએ આરોપીઓ સામે કડક કાર્યવાહીની માંગણી સાથે પોલીસ સ્ટેશનની બહાર દેખાવો કર્યા. ગુસ્સે ભરાયેલા ટોળાએ બજાર વિસ્તારમાં ઉસ્માનની ઓફિસમાં તોડફોડ કરી. તેઓ ત્યાં જ અટક્યા નહીં. તેમણે મુસ્લિમો દ્વારા સંચાલિત દુકાનો અને ખાણીપીણીની દુકાનોમાં પણ તોડફોડ કરી. નજીકની એક મસ્જિદ પર કથિત રીતે પથ્થરમારો કરવામાં આવ્યો હતો. સોશિયલ મીડિયા પ્લેટફોર્મ પર ટોળા દ્વારા પાકિસ્તાન વિરૂદ્ધ સૂત્રોચ્ચાર, વાહનોને નુકસાન પહોંચાડવું અને લઘુમતી સમુદાયના દુકાનદારોને ખેંચીને, થપ્પડ મારતા અને લાત મારતા દર્શાવતા વીડિયો સામે આવ્યા છે. નજીકની એક મસ્જિદ અને ઘરો પર કથિત રીતે પથ્થરમારો કરવામાં આવ્યો હતો. પોલીસ અધિક્ષક (શહેર) જગદીશ ચંદ્રા સહિત વરિષ્ઠ અધિકારીઓએ દરમિયાનગીરી કરી અને પ્રદર્શનકારીઓને ખાતરી આપી કે આરોપીઓ સામે કડક કાર્યવાહી કરવામાં આવશે, જેનાથી પરિસ્થિતિ શાંત કરવામાં મદદ મળશે. મધ્યરાત્રિ પછી પણ વિરોધ પ્રદર્શન ચાલુ રહ્યા હતા જેના કારણે પોલીસે લોકોને વધુ ઉગ્ર બનતા અટકાવવા માટે રાત્રે ૨ વાગ્યા સુધી પેટ્રોલિંગ વધાર્યું હતું.
વરિષ્ઠ પોલીસ અધિક્ષક (જીજીઁ) પ્રહલાદ મીણાએ શાંતિ અને સાંપ્રદાયિક ભાઈચારો જાળવવા અપીલ કરી છે. તપાસ શરૂ કરવામાં આવી છે અને આરોપીઓ સામે કડક કાનૂની કાર્યવાહી સુનિશ્ચિત કરવામાં આવશે. અધિકારીએ નૈનીતાલના રહેવાસીઓને અફવાઓ પર વિશ્વાસ ન કરવા વિનંતી કરી છે. તેમણે કહ્યું કે, હું નૈનીતાલના તમામ રહેવાસીઓ અને મુલાકાતીઓને શાંતિ, સંવાદિતા અને પરસ્પર ભાઈચારો જાળવવા અપીલ કરૂં છું. કૃપા કરીને કોઈપણ પ્રકારની અફવાઓ પર ધ્યાન ન આપો અને કાયદો અને વ્યવસ્થા જાળવવામાં પોલીસને સહયોગ આપો. નૈનીતાલની ગરિમાને નુકસાન પહોંચાડે તેવી અથવા પ્રવાસન સ્થળ તરીકેની તેની છબીને નકારાત્મક અસર કરતી કોઈપણ પ્રવૃત્તિમાં ભાગ ન લો. શાંતિ જાળવવા માટે શહેરમાં ભારે પોલીસ બંદોબસ્ત ગોઠવવામાં આવ્યો છે.