(એજન્સી) તહેરાન,તા.૧૦
ઈરાનિયન સિસ્મોલોજિકલ સેન્ટરે આપેલી જાણકારી મુજબ સ્થાનિક સમય પ્રમાણે બપોરે ૧.૪૬ વાગે પશ્ચિમ ઈરાનના ગિલાન-એ-ગાર્બ શહેરની નજીક આઠ કિ.મી.ની ઉંડાઈએ ભૂકંપનો આંચકો અનુભવાયો હતો. આ ભૂકંપમાં સારપોલ-એ-ઝહાબ, કસર-એ-શિરીન, કિરમાનશાહ અને ઓરામનાતનો વિસ્તાર પણ અસરગ્રસ્ત થયો હતો. જો કે આ ભૂકંપમાં કોઈ મોટા નુકસાન કે જાનહાનિના અહેવાલો નથી. ઉલ્લેખનીય છે કે ૧ર નવેમ્બર ર૦૧૭ના રોજ ઈરાનના પશ્ચિમ પ્રાંત કિરમાનશાહમાં આવેલા સારપોલ-અલ-ઝહાબમાં ૭.૩ની તીવ્રતાનો ભૂકંપ આવ્યો હતો. આ ભૂકંપમાં લગભગ ૯૦,૦૦૦ મકાનોને સંપૂર્ણ અથવા તો આંશિક નુકસાન પહોંચ્યું હતું. આ ભૂકંપમાં ૬૬૦ લોકોએ જીવ ગુમાવ્યા હતા તેમજ ૧૦,૦૦૦થી વધુ લોકો ઘાયલ થયા હતા. ર૦૧૭માં આવેલા ૭.૩ની તીવ્રતાના ભૂકંપ પછી કિરમાનશાહ પ્રાંતમાં અત્યાર સુધી ૬૦૦૦થી વધુ ભૂકંપના આંચકા નોંધાઈ ચૂકયા છે.