બાંકે બિહારીમાં ભગવાન કૃષ્ણ માટે મુસ્લિમો દ્વારા બનાવેલા પોશાક પર પ્રતિબંધની અરજી મંદિરના અધિકારીઓએ નકારી કાઢી અને કહ્યું કે, જો શ્રદ્ધા અને ભક્તિથી બનાવવામાં આવે તો કોઈપણ સમુદાય તરફથી આપવામાં આવતા પ્રસાદ પર કોઈ વાંધો નથી
(એજન્સી) તા.૧૩
ઉત્તરપ્રદેશના બાંકે બિહારી મંદિર પ્રશાસને ભગવાન કૃષ્ણની મૂર્તિ માટે મુસ્લિમ વણકર દ્વારા બનાવવામાં આવેલા પોશાક પર પ્રતિબંધ મૂકવાના પ્રસ્તાવને ફગાવી દીધો છે. ધાર્મિક લાગણીઓનો હવાલો આપીને કેટલાક હિન્દુ જૂથોએ આવા વસ્ત્રો પર પ્રતિબંધ મૂકવાની માંગ કર્યા બાદ આ પગલું લેવામાં આવ્યું છે. દેશમાં ધર્મ એ અત્યંત સંવેદનશીલ બાબત છે અને તરત જ સાંપ્રદાયિક તણાવ ભડકી શકે છે, ત્યાં ભાગ્યે જ આપણે એવી વાર્તાઓ સાંભળીએ છીએ જે માનવતાને અન્ય કોઈપણ ધર્મ કરતાં વધુ મહત્ત્વ આપે છે. બાંકે બિહારી મંદિર, વૃંદાવન જે મોટાભાગે કૃષ્ણના કેન્દ્ર તરીકે ઓળખાય છે અને દર વર્ષે વિશ્વભરમાંથી લાખો ભક્તો આવે છે. છતાં શું તમે જાણો છો કે, કેટલાક અહેવાલો અનુસાર ભગવાન કૃષ્ણ જે ‘પોશાક’ પહેરે છે તે મસ્જિદમાં બનાવવામાં આવે છે ? હા, તમે સાચું સાંભળ્યું છે ! દૈનિક ભાસ્કર અનુસાર ફક્ત વૃંદાવનમાં જ ભગવાનના કપડાં બનાવતી લગભગ ૪૦ ફેક્ટરીઓ છે. આમાંથી ૧૦,૦૦૦થી વધુ મુસ્લિમો દિવસ-રાત તે ઉત્કૃષ્ટ કૃતિ માટે કામ કરે છે, જે પવિત્ર ભગવાનને પહેરાવશે. ન્યૂઝ પોર્ટલ અનુસાર આ કાર્ય વૃંદાવનમાં લગભગ ૫૦-૬૦ વર્ષથી ચાલી રહ્યું છે અને કોઈને ક્યારેય કોઈ સમસ્યા થઈ નથી. ફક્ત કૃષ્ણ જ નહીં, ‘કારીગરો’ પણ શહેરના ઘણા મંદિરોમાં રાધા અને અન્ય દેવતાઓ માટે પોશાક બનાવે છે.બધી બાબતો કરતાં ભગવાન માટે પ્રેમ આ કારીગરોના જણાવ્યા મુજબ ભગવાન માટે પોશાક સીવતી વખતે ખાસ કાળજી લેવામાં આવે છે, જેમાં શુદ્ધતા અને સ્વચ્છતાનો સમાવેશ થાય છે. કારીગરો કહે છે કે, તેમનો મુખ્ય ઉદ્દેશ્ય બાંકે બિહારીને ખુશ કરવાનો છે. તેઓએ એમ પણ કહ્યું કે, જ્યારે કૃષ્ણનો પોશાક ફક્ત ૧-૨ દિવસનો સમય લે છે, ત્યારે રાધા રાણીનો લહેંગા એક અઠવાડિયા સુધીનો સમય લઈ શકે છે અને તેની કિંમત ૮-૧૦,૦૦૦ની વચ્ચે હોઈ શકે છે. એક કારીગરે કહ્યું કે, ફક્ત વૃંદાવનમાં જ નહીં, તેમના વસ્ત્રો અમેરિકા, ઇંગ્લેન્ડ, ફ્રાન્સ, જાપાન, નેપાળ, થાઇલેન્ડ અને ઇન્ડોનેશિયા જેવા દેશોમાં પણ આયાત કરવામાં આવે છે. આ અઠવાડિયાની શરૂઆતમાં વૃંદાવનના બાંકે બિહારી મંદિરના અધિકારીઓએ મુસ્લિમ વણકર દ્વારા કૃષ્ણ માટે બનાવેલા વસ્ત્રો પર પ્રતિબંધ મૂકવાની માગણી કરતી દરખાસ્તને ફગાવી દીધી હતી. વહીવટીતંત્રે સ્પષ્ટતા કરી હતી કે, આવો કોઈ ફેરફાર કરવામાં આવ્યો નથી. આ અગાઉ શ્રી કૃષ્ણ જન્મભૂમિ સંઘર્ષન્યાસના પ્રમુખ દિનેશ ફલાહારીએ મંદિર સત્તાવાળાને એક મેમોરેન્ડમ સુપરત કર્યું હતું, જેમાં માંગ કરવામાં આવી હતી કે, જે કોઈ ઠાકુરજીના ધર્મનું પાલન કરતું નથી અને તેમના માટે કંઈક બનાવવામાં સામેલ છે, તે ગંભીર પાપ કરી રહ્યો છે. તેના જવાબમાં મંદિર વહીવટના સભ્ય જ્ઞાનેન્દ્ર કિશોર ગોસ્વામીએ જણાવ્યું કે, અમને મુસ્લિમ વણકર દ્વારા બનાવેલા પોશાકનો ઉપયોગ બંધ કરવાનો પ્રસ્તાવ મળ્યો છે. અમારી પ્રાથમિક ચિંતા ઠાકુરજીને ચઢાવવામાં આવતા વસ્ત્રોની શુદ્ધતા અને પવિત્રતા સુનિશ્ચિત કરવાની છે. જો મુસ્લિમ સમુદાયના સભ્યોને ઠાકુરજીમાં શ્રદ્ધા હોય તો અમને તેમની પાસેથી તે સ્વીકારવામાં કોઈ વાંધો નથી. કોઈપણ વ્યક્તિ દરખાસ્તો સબમિટ કરવા માટે સ્વતંત્ર છે.શ્રી કૃષ્ણ જન્મભૂમિ સંઘર્ષન્યાસના પ્રમુખ દિનેશ ફલાહારીએ આ પ્રસ્તાવ રજૂ કર્યો હોવાનું કહેવાય છે, જેઓ મથુરામાં ચાલી રહેલા શાહી ઇદગાહ મસ્જિદ વિવાદમાં પણ સામેલ છે. મેમોરેન્ડમમાં દલીલ કરવામાં આવી હતી કે, બિન-હિન્દુઓ દ્વારા બનાવેલા વસ્ત્રો દેવતાને ચઢાવવા એ ગંભીર પાપ હશે. તેમ છતાં મંદિર વહીવટીતંત્રે સ્પષ્ટતા કરી હતી કે, દેવતાના વસ્ત્રો માટે પસંદગી પ્રક્રિયામાં કોઈ ફેરફાર કરવામાં આવ્યો નથી. સોમવારે બાંકે બિહારી મંદિરમાં શરૂ થયેલા હોળી ઉજવણી પહેલા આ વિવાદ ઊભો થયો હતો. આ મંદિરમાં દરરોજ ૩૦,૦૦૦થી ૪૦,૦૦૦ ભક્તો દર્શનાર્થે આવે છે અને સપ્તાહના અંતે અને તહેવારોમાં એક લાખથી વધુ લોકો આવે છે. ફાલ્ગુન શુક્લ પક્ષની રંગભરી એકાદશીના અવસરે ભવ્ય હોળી ઉજવણી શરૂ થઈ હતી. ભક્તિ અને પરંપરાના પ્રદર્શનમાં સફેદ પોશાક પહેરેલા અને ચાંદીના સિંહાસન પર બેઠેલા ઠાકુર બાંકે બિહારી મહારાજની મૂર્તિએ સોના અને ચાંદીના પાણીની પિચકારીનો ઉપયોગ કરીને ભક્તો પર રંગો છાંટ્યા હતા. વ્રજ ક્ષેત્રમાં હોળી ઉજવણીની સત્તાવાર શરૂઆત તરીકે તહેવાર માટે ખાસ તૈયાર કરાયેલ કેસરયુક્ત પાણીનો ઉપયોગ કરવામાં આવ્યો હતો. મંદિરના પૂજારી પ્રહલાદવલ્લભ ગોસ્વામીએ આ પ્રસંગનું મહત્ત્વ વર્ણવતા કહ્યું કે, રંગભરી એકાદશી પર બાંકે બિહારીજી માટે શુદ્ધ કેસરી રંગ તૈયાર કરવામાં આવે છે. સેવાયતો પહેલા સોના અને ચાંદીના પિચકારીઓનો ઉપયોગ કરીને દેવતા પર આ રંગ છાંટતા હોય છે, જે હોળીની પરંપરાગત શરૂઆત દર્શાવે છે.
મંદિર પૂર્ણિમા (પૂર્ણિમા) સુધી હોળી ઉજવવાનું ચાલુ રાખશે, જેમાં તેસુ ફૂલો, ચંદન, અબીર અને ગુલાલથી બનેલા રંગો ચઢાવવામાં આવશે. હોળીના બીજા દિવસે ધુળંદી પર, દેવતાને ગુલાબી શાહી પોશાક પહેરીને સુવર્ણ સિંહાસન પર બેસાડવામાં આવે છે, જ્યારે ભક્તો તેમની હાજરીમાં હોળી રમે છે. રાધાવલ્લભ મંદિરથી વાર્ષિક પ્રિયા-પ્રીતમરંગીલી હોળી શોભાયાત્રામાં હજારો ભક્તોએ ભાગ લીધો હતો. ભક્તોની સલામતી અને ટ્રાફિક સુગમ રહે તે માટે જિલ્લા વહીવટીતંત્રે શોભાયાત્રાવાળા વિસ્તારોમાં ત્રણ અને ચાર પૈડાવાળા વાહનો પર કડક પ્રતિબંધ લાદ્યો હતો. ઉજવણી દરમિયાન વ્યવસ્થા જાળવવા માટે પોલીસ અધિક્ષક (શહેર) અરવિંદકુમારે વ્યક્તિગત રીતે સુરક્ષા વ્યવસ્થાનું નિરીક્ષણ કર્યું હતું. વૃંદાવનમાં હોળીનું એક વિશેષ સ્થાન છે, કારણ કે, એવું વ્યાપકપણે માનવામાં આવે છે કે, ભગવાન કૃષ્ણે પ્રદેશના જંગલોમાં રાધા અને અન્ય ‘ગોપીઓ’ સાથે હોળી રમી હતી. સૌથી મનમોહક ઉજવણીઓમાંની એક ‘ફૂલંકી હોળી’ છે, જ્યાં રંગોને બદલે ફૂલોનો ઉપયોગ કરવામાં આવે છે, જે દર વર્ષે બાંકે બિહારી મંદિરમાં એક મંત્રમુગ્ધ કરનારૂં દૃશ્ય છે.૧૪ માર્ચે જુમ્માની નમાઝ અને હોળી વચ્ચે ઉત્તરપ્રદેશ અને બિહારના કેટલાક ભાગોમાં વધતા સાંપ્રદાયિક તણાવ સાથે, ભક્તોમાં સંવાદિતા અને એકતાને પ્રોત્સાહન આપવા માટે મંદિર વહીવટીતંત્રના સમાવેશી વલણની વ્યાપક પ્રશંસા કરવામાં આવી રહી છે.
