૧૧ વર્ષના પુત્ર સામે જ દલિત પશુપાલક પર હુમલો, મુસ્લિમ કસાઈને બળદ વેચવાનો આરોપ લગાવી જાતિવાચક શબ્દો કહ્યા; છ લોકો સામે ગુનો નોંધાયો

(એજન્સી) નવી દિલ્હી / જાલના, તા.ર૯
મહારાષ્ટ્રના જાલના જિલ્લામાં કાયદો અને વ્યવસ્થાને શરમાવે તેવી એક અત્યંત શરમજનક ઘટના સામે આવી છે. અહીં છ કથિત ગૌરક્ષકોએ એક દલિત પશુપાલકને આંતરીને તેની સાથે ક્રૂરતાપૂર્વક મારપીટ કરી હતી અને તેના મોંમાં બળજબરીથી ગાયનું છાણ ઠાંસી દીધું હતું. આ સમગ્ર ઘટના પીડિતના ૧૧ વર્ષના નિર્દોષ પુત્રની નજર સામે જ ઘટી હતી. સોશિયલ મીડિયા પર આ અમાનવીય અત્યાચારનો વીડિયો વાયરલ થયા બાદ પોલીસે આરોપીઓ સામે કડક ગુનો નોંધી વધુ તપાસ હાથ ધરી છે. આ ઘટના જાલના જિલ્લાના કન્હૈયાનાગર વિસ્તારમાં બની હતી. પીડિત પરમેશ્વર સુભાષ હિવાળે પોતાના ૧૧ વર્ષના પુત્ર અને સાથી નારાયણ મારોતી કાંબળે સાથે દેઉલગાંવ રાજાના અઠવાડિક પશુ બજારમાંથી એક બળદ ખરીદીને પરત ફરી રહ્યા હતા. આ દરમિયાન પોતાને બજરંગ દળ અને ગૌરક્ષા સંસ્થાઓ સાથે જોડાયેલા ગણાવતા છ શખ્સોએ તેમનું વાહન રોક્યું હતું. આરોપીઓએ હિવાળે પર એવો ખોટો આરોપ લગાવ્યો હતો કે તેઓ આ બળદને કોઈ મુસ્લિમ કસાઈને વેચવા જઈ રહ્યા છે. હિવાળેએ ખરીદીની રસીદ અને કાયદેસરના કાગળો બતાવવા છતાં આરોપીઓ શાંત થયા નહોતા. પીડિત હિવાળેના જણાવ્યા અનુસાર, આરોપીઓએ પહેલાં તેમની જાતિ પૂછી હતી અને દલિત હોવાની ખબર પડતાં જ જ્ઞાતિવાચક અપશબ્દો બોલીને મારપીટ શરૂ કરી દીધી હતી. હુમલાખોરોએ નિર્દયતાની તમામ હદો વટાવીને હિવાળેના મોંમાં બળજબરીથી ગાયનું છાણ ઘૂસાડી દીધું હતું. એટલું જ નહીં, તેમણે તેના ૧૧ વર્ષના પુત્રના મોંમાં પણ છાણ નાખવાનો પ્રયાસ કર્યો હતો, પરંતુ હિવાળેએ પુત્રનો બચાવ કર્યો હતો. આ હુમલામાં તેના સાથી કાંબળે સાથે પણ મારપીટ કરવામાં આવી હતી અને તેમના વાહનને નુકસાન પહોંચાડવામાં આવ્યું હતું. હુમલો કરનારાઓએ આ સમગ્ર ઘટનાનો વીડિયો પણ શૂટ કર્યો હતો અને જો તેઓ પોલીસ પાસે જશે તો પરિવારને જાનથી મારી નાખવાની ધમકી આપી હતી. આ ડરના કારણે હિવાળે શરૂઆતમાં પોલીસ સ્ટેશને જઈ શક્યા નહોતા. પરંતુ તાજેતરમાં જ્યારે આ ઘટનાનો વીડિયો ઇન્સ્ટાગ્રામ પર વાયરલ થયો, ત્યારે પીડિત હિંમત કરીને ૨૧ ઓગસ્ટે જાલના તહસીલ પોલીસ સ્ટેશને પહોંચ્યા હતા અને લેખિત ફરિયાદ નોંધાવી હતી. પીડિતની ફરિયાદના આધારે પોલીસે તાત્કાલિક કાર્યવાહી કરીને તમામ છ આરોપીઓ સામે ગેરકાયદેસર રીતે અટકાયત કરવી, સ્વેચ્છાએ ઈજા પહોંચાડવી અને ગેરકાયદેસર મંડળી રચવા બદલ ગુનો નોંધ્યો છે. આ ઉપરાંત, દલિત સમુદાય પર થયેલા જુલમને ધ્યાનમાં રાખીને અનુસૂચિત જાતિ અને અનુસૂચિત જનજાતિ (અત્યાચાર નિવારણ) કાયદા (SC/ST એક્ટ) હેઠળ પણ ગુનો દાખલ કરવામાં આવ્યો છે. પોલીસ ઈન્સ્પેક્ટર સંતોષ સાબળે અને અતિરિક્ત પોલીસ સુપ્રિટેન્ડેન્ટ વિક્રમ સાલીએ જણાવ્યું છે કે આ ગંભીર મામલાની તપાસ ઉચ્ચ પોલીસ અધિકારી દ્વારા કરવામાં આવી રહી છે અને આરોપીઓને વહેલી તકે જેલ ભેગા કરવામાં આવશે.