(એજન્સી)                         મેરઠ, તા.૯
યુપીના બુલંદશહેરમાં એક પ્રખ્યાત શાળાના આઠ શિક્ષકો પર ધોરણ ૧૨ના વિદ્યાર્થીને લાકડીઓ વડે માર મારવા અને તેના વાળ કાપવા બાબતે જાતિવાદી અપશબ્દો બોલવા બદલ ગુનો નોંધવામાં આવ્યો હતો. ૧૭ વર્ષીય દલિત વિદ્યાર્થી માથામાં ઈજાઓ સાથે ઘરે પાછો ફર્યો હતો જેના કારણે બંને હાથમાં ટાંકા અને ફ્રેક્ચરની સારવારની જરૂર પડી હતી. આ ઘટનાને પગલે અન્ય જાતિના શિક્ષકોને શાળાના અધિકારીઓ દ્વારા તાત્કાલિક સસ્પેન્ડ કરવામાં આવ્યા હતા. આ મામલો ત્યારે પ્રકાશમાં આવ્યો જ્યારે પીડિતાના માતા-પિતાને ‘દબાણને પગલે શરૂઆતમાં સમાધાન’ બાદ  ‘આરોપીઓ દ્વારા વારંવાર ધમકીઓ’ને કારણે એફઆઈઆર નોંધાવવાની ફરજ પડી હતી. માતા-પિતાએ દાવો કર્યો હતો કે આરોપીએ તેમના પુત્રને ફેબ્રુઆરીના અંતમાં શરૂ થતી યુપી બોર્ડ પરીક્ષામાં બેસતા અટકાવવાનો પણ પ્રયાસ કર્યો હતો. સર્કલ ઓફિસર શોબિત કુમારે શુક્રવારે જણાવ્યું હતું કે,“સોનુ કુમાર, વિપિન કુમાર, દીપક કુમાર, મનોજ કુમાર (I), મનોજ કુમાર (II), યોગેશ કુમાર, યોગેન્દ્ર અને પ્રશાંત વિરૂદ્ધ ૫ માર્ચે મ્દ્ગજીની કલમ ૧૯૧ (૨) (હુલ્લડ), ૧૧૦ (ગુનાહિત હત્યા), ૧૧૫ (૨), ૧૧૭ (૪) (જાણીજોઇને ઇજા પહોંચાડવી) અને SC/ST  એક્ટની કલમ ૩ (૧) (૨) હેઠળ  FIR નોંધવામાં આવી હતી. તપાસ ચાલુ છે અને તે મુજબ કાર્યવાહી કરવામાં આવશે. વિદ્યાર્થીની હાલત સ્થિર છે અને તે તેની પરીક્ષા આપી રહ્યો છે,”. સરસ્વતી વિદ્યા મંદિર સ્કૂલના પ્રિન્સિપાલ પુરુષોત્તમ શર્માએ કહ્યું, “આપણી જેવી શિસ્તબદ્ધ શાળામાં આવું વર્તન સહન કરી શકાય નહીં. તે શિક્ષકોને સસ્પેન્ડ કરવામાં આવ્યા હતા અને અમે પોલીસને તેમની તપાસમાં સહકાર આપીશું.” બુલંદશહેરના દિબાઈની માયા રાનીએ પોતાના પુત્રની કરમ કથની વર્ણવતા કહ્યું કે જાન્યુઆરીમાં તેના વાળ કાપવામાં આવ્યા હતા, જેનો શિક્ષકોએ વાંધો ઉઠાવ્યો હતો. તેમણે ઉમેર્યું કે, “તે ઘરે આવ્યો અને મને કહ્યું કે તેને તેમના શિક્ષકો દ્વારા ઠપકો આપવામાં આવ્યો હતો અને બીજા દિવસે (૨૫ જાન્યુઆરી) તેને શાળામાં લાકડીઓથી નિર્દયતાથી મારવામાં આવ્યો. મારો પુત્ર એક મહિનાથી વધુ સમય સુધી ઇજા અને આઘાતને કારણે પથારીવશ રહ્યો અને તેના બોર્ડ માટે યોગ્ય રીતે તૈયારી કરી શક્યો નહીં.” તેમણે આરોપ લગાવ્યો કે તેમને સમાધાન કરવા માટે પણ દબાણ કરવામાં આવ્યું હતું. “પરંતુ આરોપી શિક્ષકોએ પરીક્ષા દરમિયાન અમારા પુત્રને ડરાવવાનું અને ધમકાવવાનું ચાલુ રાખ્યું. બીજો કોઈ વિકલ્પ ન હોવાથી, અમે અમારી ફરિયાદ સાથે સ્થાનિક પોલીસનો સંપર્ક કર્યો. અમે ઇચ્છીએ છીએ કે તેમની ધરપકડ કરવામાં આવે…”