(એજન્સી) લંડન, તા.૩૧
ઇઝરાયેલી કબજા હેઠળના પશ્ચિમ કાંઠે ઇંધણની અછત વધતી જાય છે, તેથી ગેસોલિન માટે નજીકના ઇઝરાયેલી વસાહતો તરફ વળેલા પેલેસ્ટીનીઓને હવે નવા પ્રતિબંધોનો સામનો કરવો પડી રહ્યો છે જે તેમની ગતિશીલતા અને કામ કરવાની ક્ષમતાને વધુ મર્યાદિત કરી શકે છે. પેલેસ્ટીની અને ઇઝરાયેલી મીડિયાના અહેવાલ મુજબ ઉત્તર પશ્ચિમ કાંઠે આવેલા બાર્કન ઇન્ડસ્ટ્રિયલ પાર્કના પેલેસ્ટીની કર્મચારીઓએ જણાવ્યું હતું કે, તેમને બુધવારે કહેવામાં આવ્યું હતું કે તેઓ નજીકના ઇઝરાયેલી વસાહત એરિયલમાં ગેસ સ્ટેશનો પર હવે ઇંધણ ભરી શકશે નહીં.ધ ટાઇમ્સ ઓફ ઇઝરાયેલના અહેવાલ મુજબ વોટ્‌સએપ દ્વારા પ્રસારિત અને કેટલાક કિસ્સાઓમાં મૌખિક રીતે આપવામાં આવેલી નોટિસમાં ચેતવણી આપવામાં આવી હતી કે, ગુરૂવારથી જે કામદારોએ ઇંધણ ભરવાનો પ્રયાસ કર્યો તેમને અટકાયત, પૂછપરછ અથવા કાર્યસ્થળ પર દંડનો સામનો કરવો પડી શકે છે. સંદેશમાં એરિયલ મ્યુનિસિપાલિટીના સુરક્ષા અધિકારીઓના માર્ગદર્શનનો ઉલ્લેખ કરવામાં આવ્યો હતો અને કહેવામાં આવ્યું હતું કે, પેલેસ્ટીની કર્મચારીઓને પશ્ચિમ એરિયલના ટેન ગેસ સ્ટેશન અને વસાહતના પ્રવેશદ્વાર પર સોનોલ ગેસ સ્ટેશનમાં પ્રવેશવા પર પ્રતિબંધ મૂકવામાં આવશે. મજૂર હિમાયતીઓએ ઝડપથી આ નિર્ણયની ટીકા કરી હતી. ઇઝરાયેલ સ્થિત MAAN વર્કર્સ એસોસિએશનના એક્ઝિક્યુટિવ ડિરેક્ટર અસફ આદિવે જણાવ્યું હતું કે, ગેસ સ્ટેશનો લાંબા સમયથી ઇઝરાયેલી અને પેલેસ્ટીની બંનેને સેવા આપતા હતા અને આ પ્રતિબંધમાં કોઈ કાનૂની આધાર ન હોય તેવું લાગે છે. તેમણે એરિયલના મેયર અને બાર્કન ઇન્ડસ્ટ્રિયલ પાર્કના વડાનો સંપર્ક કરીને આ નિર્દેશને રદ કરવા વિનંતી કરી હોવાનું કહેવાય છે અને તેને કામદારોના અધિકારોનું ઉલ્લંઘન ગણાવ્યું છે. આ ત્યારે આવ્યું છે જ્યારે પેલેસ્ટીની વિસ્તારો ઇંધણના વધતા જતા સંકટનો સામનો કરી રહ્યા છે. પુરવઠાની અછતના પરિણામે તેમના પેલેસ્ટીની સમકક્ષો સંઘર્ષ કરી રહ્યા હોવાથી પશ્ચિમ કાંઠે ઇઝરાયેલી ગેસ સ્ટેશનો પર માંગમાં વધારો થયો છે. પેલેસ્ટીની અધિકારીઓ આ વિક્ષેપ માટે ઇઝરાયેલી બેંકો સાથે સંકળાયેલા વ્યાપક આર્થિક સંકટને જવાબદાર ઠેરવે છે જેના કારણે વ્યવસાયો રોકડ જમા કરી શકતા નથી અને સામાન્ય કામગીરી જાળવી શકતા નથી. ઇઝરાયેલી સંગઠન બિમકોમ – પ્લાનિંગ એન્ડ હ્યુમન રાઇટ્‌સ સાથે ક્ષેત્ર સંશોધક ડાયના માર્ડીએ પશ્ચિમ કાંઠે પરિસ્થિતિઓને ‘આપત્તિજનક’ ગણાવી હતી. તેણીએ કહ્યું કે, ઇંધણની ઉપલબ્ધતા, પ્રદેશમાં સામાન્ય જીવનની ઝલક ટકાવી રાખતા છેલ્લા તત્ત્વોમાંનું એક હતું.