અરજદારે જણાવ્યું હતું કે, તેમને વિશ્વાસ છે કે તેમની ઉત્તરવહીઓનું કડક મૂલ્યાંકન તેમની જાતિને કારણે કરવામાં આવ્યું હતું
(એજન્સી) લખનૌ, તા.ર૩
અલાહાબાદ હાઇકોર્ટે પ્રયાગરાજ સ્થિત ડૉ. રાજેન્દ્ર પ્રસાદ નેશનલ લૉ યુનિવર્સિટીમાં જાતિગત ભેદભાવના આરોપોની તપાસનો આદેશ આપ્યો છે. સાથે જ, કોર્ટે એક લૉ વિદ્યાર્થીની ઉત્તરવહીનું પુનઃમૂલ્યાંકન કરવાનો પણ નિર્દેશ આપ્યો છે; આ વિદ્યાર્થીએ આરોપ લગાવ્યો હતો કે જાતિને કારણે તેની ઉત્તરવહીની તપાસ વધુ કડકાઈથી કરવામાં આવી હતી. ન્યાયમૂર્તિ વિનોદ દિવાકરની સિંગલ બેન્ચે તાજેતરમાં આ આદેશ આપ્યો હતો. આ બેન્ચ BA LL.B વિદ્યાર્થી અને અન્ય એક વ્યક્તિ દ્વારા દાખલ કરવામાં આવેલી અરજી પર સુનાવણી કરી રહી હતી, જેમાં આરોપ મૂકવામાં આવ્યો હતો કે લૉ વિભાગના વડા અને બોયઝ હોસ્ટેલના વોર્ડને તેમના શૈક્ષણિક અને વહીવટી અધિકારોનો ઉપયોગ ‘જાતિ-આધારિત અપમાન અને બદલાની ભાવના’ માટેના સાધન તરીકે કર્યો હતો. અરજદારોએ એમ પણ કહ્યું હતું કે તેમણે આ અંગે વાઇસ-ચાન્સેલરને ફરિયાદ કરી હતી, પરંતુ યુનિવર્સિટીના સક્ષમ અધિકારીએ તે ફરિયાદ પર કોઈ કાર્યવાહી કરી ન હતી અને આમ, વાસ્તવમાં તે બે અધિકારીઓને બચાવ્યા હતા. અરજદારોમાંના એકે જણાવ્યું હતું કે તેમણે ‘કોન્સ્ટિટ્યુશનલ લૉ-ૈં’ (બંધારણીય કાયદો-ૈં)માં સૌથી વધુ ગુણ મેળવ્યા હતા. ચોથા સેમેસ્ટરની શરૂઆતમાં, એક અધિકારીએ ટિપ્પણી કરી હતી કે ’જેણે કોન્સ્ટિટ્યુશનલ લૉમાં સૌથી વધુ ગુણ મેળવ્યા છે, તે હવે મારા વિષયમાં પણ મેળવી બતાવે’.અરજદારે કહ્યું કે તેમને ખાતરી હતી કે તેમની ઉત્તરવહીઓનું કડક મૂલ્યાંકન તેમની જાતિને કારણે કરવામાં આવ્યું હતું, કારણ કે એવા અનેક પ્રસંગો બન્યા હતા જ્યારે સંબંધિત અધ્યાપક (જેઓ ઉચ્ચ જાતિના સમુદાયના હતા) દ્વારા જાતિ અને અનામત અંગે જાહેરમાં ઈરાદાપૂર્વક અપમાનજનક ટિપ્પણીઓ કરવામાં આવી હતી. કોર્ટે વાઇસ-ચાન્સેલરને એક સ્વતંત્ર સમિતિની રચના કરવાનો નિર્દેશ આપ્યો છે. આ સમિતિ અરજદારની તે ઉત્તરવહીઓનું પુનઃમૂલ્યાંકન કરશે જેનું મૂલ્યાંકન પાંચમા સેમેસ્ટરમાં પ્રતિવાદી (સંબંધિત અધ્યાપક) દ્વારા કરવામાં આવ્યું હતું, તેમજ અન્ય એવા વિષયોનું પણ મૂલ્યાંકન કરશે જેનો અરજદાર નિર્દેશ કરે.