બલરામપુરના ગેસડી વિસ્તારમાં ૩૮ વર્ષીય કારીગર રામ સનેહીના મૃત્યુ મામલે હત્યા અને SC/ST એક્ટ હેઠળ કેસ દાખલ કરવામાં આવ્યો છે. વીડિયો ફૂટેજ અને અન્ય પુરાવાઓના આધારે હવે સત્ય બહાર લાવવાના પ્રયાસો ચાલી રહ્યા છે

SC/ST એક્ટ હેઠળ કેસ દાખલ કરવામાં આવ્યો

(એજન્સી) બલરામપુર, તા.૧૪
ઉત્તરપ્રદેશના બલરામપુર જિલ્લામાં એક દલિત યુવાનના મૃત્યુનો મામલો જોર પકડી રહ્યો છે. ગેસડી પોલીસ સ્ટેશન વિસ્તારમાં આવેલા ઠાકુરપુર ગામમાં ૩૮ વર્ષીય કારીગર રામ સનેહીની કથિત રીતે માર મારવાના વીડિયોએ વિસ્તારમાં સનસનાટી મચાવી દીધી છે. વાયરલ વીડિયોમાં એક યુવાન તેને થાંભલા સાથે બાંધીને લાકડીથી માર મારતો જોવા મળે છે, જ્યારે પીડિત દયાની વિનંતી કરતો સાંભળવામાં આવે છે. પરિવારનો આરોપ છે કે, ગુંડાઓ દ્વારા તેને નિર્દયતાથી માર મારવામાં આવ્યો હતો. આરોપી પક્ષનો દાવો છે કે, રામ સનેહી ચોરી કરવાના ઇરાદાથી આવ્યો હતો. પોલીસે હત્યા અને જીઝ્ર/જી્‌ એક્ટ હેઠળ ગુનો નોંધીને તપાસ શરૂ કરી છે. આ મામલો બલરામપુરના ગેસડી પોલીસ સ્ટેશન વિસ્તારના ઠાકુરાપુર ગામનો છે. મૃતકની ઓળખ ૩૮ વર્ષીય રામ સનેહી તરીકે થઈ છે, જે વિશુનપુર કલાનના કારીગર હતા. પરિવારના સભ્યોના જણાવ્યા અનુસાર, રામ સનેહી મજૂરી કરીને પોતાનું ગુજરાન ચલાવતા હતા. તેમની પત્ની તેમને છોડીને ગઈ હતી અને તે તેમના ભાઈઓ સાથે રહેતો હતો. બુધવારે સોશિયલ મીડિયા પર ૩૩ સેકન્ડનો એક વીડિયો વાયરલ થયો હતો. વીડિયોમાં રામ સનેહીને થાંભલા સાથે બાંધીને માર મારતો જોઈ શકાય છે. આ વીડિયો સામે આવ્યા બાદ સમગ્ર કેસમાં નવો વળાંક આવ્યો હોવાનું જાણવા મળે છે. મૃતકના ભાઈ ફૂલ કુમારે જણાવ્યું હતું કે, કોઈએ ફેસબુક પર વીડિયો પોસ્ટ કર્યો હતો. જ્યારે પરિવારને આ વાતની જાણ થઈ, ત્યારે તેમણે વીડિયો ડાઉનલોડ કર્યો અને પુરાવા તરીકે પોલીસને સુપરત કર્યો. ફૂલ કુમારનો આરોપ છે કે, ઠાકુરપુરના રહેવાસી ગુડ્ડુ, તેના પિતા અકબર અલી, મગ્ગે નૌ અને તેમના સાથીઓએ રામ સનેહીને માર માર્યો હતો, જેના પરિણામે તેનું મૃત્યુ થયું હતું. પરિવારે આરોપીઓ સામે કડક કાર્યવાહીની માંગ કરી છે. આરોપી પક્ષનો દાવો છે કે, રામ સનેહી ચોરી કરવાના ઇરાદાથી આવ્યો હતો. ત્યારબાદ લોકોએ તેને પકડી લીધો અને માર માર્યો. જો કે, આ દાવાની તપાસ ચાલી રહી છે અને પોલીસ તમામ હકીકતોની તપાસ કરી રહી છે. વાયરલ વીડિયો અને પરિવારની ફરિયાદના આધારે પોલીસે ત્રણ નામાંકિત અને એક અન્ય આરોપીઓ સામે કેસ દાખલ કર્યો છે. આ કેસમાં હત્યા અને અનુસૂચિત જાતિ અને અનુસૂચિત જનજાતિ (અત્યાચાર નિવારણ) કાયદાની કલમો લાગુ કરવામાં આવી છે. સૂત્રોના જણાવ્યા અનુસાર, પોલીસે કેટલાક શંકાસ્પદોની અટકાયત કરી છે અને તેમની પૂછપરછ શરૂ કરી છે. પોલીસે કહ્યું કે, તેઓ તથ્યોના આધારે આગળની કાર્યવાહી કરશે. ગેસડી કોટવાલીના ઇન્ચાર્જ ઇન્સ્પેક્ટર રાજકુમાર પાંડેએ જણાવ્યું હતું કે, ‘યુવાનની હત્યાના સંદર્ભમાં કેટલાક શંકાસ્પદોની પૂછપરછ કરવામાં આવી રહી છે. શરૂઆતની તપાસમાં જાણવા મળ્યું છે કે, યુવક ચોરીના ઇરાદાથી ત્યાં ગયો હતો. લોકોએ તેને પકડી લીધો અને માર માર્યો. પોસ્ટમોર્ટમ રિપોર્ટ અને તપાસમાં બહાર આવેલા તથ્યોના આધારે આગળની કાર્યવાહી કરવામાં આવશે.’