ઝારખંડના ધનબાદમાં એક દુકાનદાર પર આ કેસના સંદર્ભમાં ગુનો નોંધવામાં આવ્યો છે

(એજન્સી) તા.૨૮
ઝારખંડના ધનબાદમાં એક ૪૬ વર્ષીય દલિત મહિલાને દુકાનનો આગળનો ભાગ સાફ કરવાનો ઇન્કાર કરવા બદલ એક દુકાનદાર દ્વારા ઝાડુથી માર મારવામાં આવ્યો હતો અને જાતિવાદી દુર્વ્યવહાર કરવામાં આવ્યો હતો. પોલીસે જણાવ્યું હતું કે આરોપી સામે હ્લૈંઇ નોંધવામાં આવી છે અને ટૂંક સમયમાં તેની ધરપકડ કરવામાં આવશે. ઝારિયાના વાલ્મિકી કોલોનીના સફાઈ કાર્યકર મંજુ દેવી વાલ્મિકી દ્વારા દાખલ કરવામાં આવેલી ફરિયાદ મુજબ, જ્યારે તે પોતાના ખાનગી સફાઈ કાર્યના ભાગ રૂપે બજાર નજીક સફાઈ કરી રહી હતી ત્યારે આ ઘટના બની હતી. તેણે આરોપ લગાવ્યો હતો કે કાપડના દુકાનદાર સુનીલ કેસરી (૫૫)એ તેને પૈસા આપ્યા વિના તેની દુકાન સામે કચરો સાફ કરવાનું કહ્યું હતું. જ્યારે તેણે ના પાડી ત્યારે તેણે કથિત રીતે જાતિવાદી અપશબ્દોનો ઉપયોગ કરીને તેના પર દુર્વ્યવહાર કર્યો અને તેનું ઝાડુ છીનવી લીધા પછી તેના પર શારીરિક હુમલો કર્યો હતો. આ ઘટનાનો એક વીડિયો સોશિયલ મીડિયા પર વાયરલ થયો હતો, જેમાં કથિત રીતે તે વ્યક્તિ ફરિયાદી પર હુમલો કરતો અને અપશબ્દો બોલતો જોવા મળ્યો હતો. દેવીના પુત્ર, રાજા કુમાર વાલ્મીકીએ મીડિયાને જણાવ્યું હતું કે તેની માતા એક ખાનગી સફાઈ કર્મચારી છે જે બજારમાં અને રસ્તા પર દુકાનો સાફ કરે છે. તેમણે કહ્યું કે, ‘મારી માતાએ ઘણી વખત પૈસા લીધા વિના તેની દુકાન સાફ કરી છે, પરંતુ આ વખતે, તેણે ના પાડી. પછી, સંઘર્ષ વધુ વધ્યો અને કેસરી હિંસક બન્યો. તે મારી માતા સામે જાતિવાદી અપશબ્દોનો ઉપયોગ કરી રહ્યો હતો અને મારી માતાને પૂછ્યું હતું કે તે દુકાન સાફ કરવાની ના પાડવાની હિંમત કેવી રીતે કરી’. વાલ્મીકીએ કહ્યું કે તેણે ફક્ત ‘અમારા સમુદાય વિરૂદ્ધ અપશબ્દો’ જ ન બોલ્યા, પણ તેની માતાનો હાથ પકડીને ઝાડુના હાથાથી તેના માથા પર જોરથી ફટકો માર્યો. પુત્રએ કહ્યું કે, ‘અમે તેની વિરૂદ્ધ ફરિયાદ નોંધાવી છે’. મંજુ દેવી વાલ્મીકીએ પોતાની ફરિયાદમાં આરોપ લગાવ્યો હતો કે આરોપીએ ભૂતકાળમાં પણ અયોગ્ય વર્તન કર્યું હતું અને તેના પ્રત્યે ખરાબ ઇરાદા રાખ્યા હતા. રાજ કુમારે કહ્યું કે, “એક રાહદારીએ હુમલાનો વીડિયો રેકોર્ડ કર્યો હોવાનું કહેવાય છે, જેના પછી અન્ય સમુદાયના સભ્યો અને મેં દરમિયાનગીરી કરી. જો કે, તે સમયે, કોઈ મારી માતાના સમર્થનમાં આવ્યું ન હતું અને તેને બચાવી ન હતી”. ઝારિયા પોલીસ ઇન્સ્પેક્ટર ભીમ લાલ પાસવાને જણાવ્યું હતું કે એફઆઈઆર નોંધીને તાત્કાલિક કાર્યવાહી કરવામાં આવી છે, અને કહ્યું કે આરોપીની ટૂંક સમયમાં ધરપકડ કરવામાં આવશે. તેમણે કહ્યું કે, ‘અમને દેવી અને તેના સમુદાય તરફથી ફરિયાદ મળી છે કે આરોપીઓએ જાતિ આધારિત અપશબ્દોનો ઉપયોગ કર્યો છે અને તેના પર શારીરિક હુમલો કર્યો છે. અમે વાયરલ વીડિયો જોયો છે અને કાર્યવાહી શરૂ કરી છે,’ તેમણે એમ પણ કહ્યું કે અનુસૂચિત જાતિ અને અનુસૂચિત જનજાતિ (અત્યાચાર નિવારણ) અધિનિયમની કલમો લાગુ કરવામાં આવી છે.