(એજન્સી) તા.૨૨
ઇઝરાયેલની સૈન્યએ ઉત્તર ગાઝામાં શિફા હોસ્પિટલ પર હુમલો ચાલુ રાખ્યો, દાવો કર્યો કે તેના દળોએ ૧૪૦થી વધુ લોકોને મારી નાખ્યા અને “હમાસના વરિષ્ઠ અધિકારીઓ”ની ધરપકડ કરી. સેનાએ ગુરૂવારે એક નિવેદનમાં જણાવ્યું કે, લગભગ ૬૦૦ પેલેસ્ટીનીઓને પકડવામાં આવ્યા છે અને ૧૪૦ થી વધુ લોકો મૃત્યુ પામ્યા છે અને દાવો કર્યો છે કે તે બધા આતંકવાદી હતા. નિવેદન અનુસાર, હોસ્પિટલની શોધ દરમિયાન, “અસંખ્ય હથિયારો અને ગુપ્તચર દસ્તાવેજો” મળી આવ્યા હતા. સેનાએ જણાવ્યું કે, “હોસ્પિટલ પરિસરમાં ઇસ્લામિક જેહાદ કાર્યકર્તાઓએ સૈનિકોને આત્મસમર્પણ કર્યુ.” સૈન્યએ જણાવ્યું કે હમાસના “વરિષ્ઠ અધિકારીઓ”, એક સશસ્ત્ર સમુહ અને ગાઝા ચલાવતા ચળવળ અને ઇસ્લામિક જેહાદ, એક નાના પેલેસ્ટીની ઉગ્રવાદી સમૂહની ધરપકડ કરવામાં આવી છે. ઓપરેશન માટે કોઈ અંતિમ તારીખ આપવામાં આવી નથી. નિવેદનમાં જણાવવામાં આવ્યું છે કે, “દળો તેમની કામગીરી ચાલુ રાખી રહ્યા છે અને વિસ્તારની શોધ કરવામાં આવી રહી છે, હથિયારો શોધી કાઢવામાં આવી રહ્યા છે અને નજીકના એન્કાઉન્ટરમાં ઉગ્રવાદીઓને પકડવામાં આવી રહ્યા છે.” તાજેતરની કાર્યવાહી સોમવારની વહેલી શરૂ થઈ, જ્યારે ઇઝરાયેલી દળોએ ગાઝા સિટીના કમ્પાઉન્ડ પર ટેન્ક અને હવાઈ હુમલાઓથી હુમલો કર્યો. ગુરૂવારે, સત્તાવાર પેલેસ્ટીની સમાચાર એજન્સી ઉછહ્લછએ અહેવાલ આપ્યો કે ઇઝરાયેલી દળોએ વિશેષ સર્જિકલ ઇમારતને ઉડાવી દીધી હતી અને તબીબી સંકુલની અંદરની તમામ તબીબી ટીમો સાથે સંદેશાવ્યવહાર તૂટી ગયો હતો. શિફા, જે યુદ્ધ પહેલાં ગાઝાની સૌથી મોટી તબીબી સુવિધા હતી, તે હવે દરિયાકાંઠાના ક્ષેત્રમાં કાર્યરત કેટલીક હોસ્પિટલોમાંની એક છે અને વિસ્થાપિત પેલેસ્ટીનીઓ માટે આશ્રયસ્થાન તરીકે પણ સેવા આપે છે. ઇઝરાયેલે અગાઉ હોસ્પિટલને નિશાન બનાવીને દાવો કર્યો હતો કે હમાસે તેનો કમાન્ડ સેન્ટર તરીકે ઉપયોગ કર્યો હતો અને સંકુલની નીચે ભૂગર્ભ ટનલમાં શસ્ત્રો અને લડાકુઓ છૂપાવ્યા હતા.